Read Zokam Colosse-te 1 Bible Online

Colosse-te 1 - Zokam bible

Colosse-te 1

¹Pasian deihna hanga Christ Jesu sawltakpi Paul le i sanggampa Timothy in,

²Colosse a, Christ sunga a siangtho le a muanhuai a[1] sanggamte tungah: Eite Pa b[2] Pasian tung pana hehpihna le lemna note tungah om ta hen.

³Note ading thu ka nget uh ciangin Pasian, eite Topa Jesu Christ’ Pa tungah lungdam ka ko tawntung uh hi.

⁴Bang hang hiam cih leh Christ Jesu sunga na upna uh le misiangte khempeuh na itna uh ka za zo uh hi.

⁵Tua upna le itna note adinga vantunga kikoihkholsa tua lametna pana piang hi-a, note tunga hong tung na zaksa uh tua lungdamna-thu - thumaan pen mah ahi hi.

⁶Tua lungdamna-thu za-in Pasian hehpihna thutak khempeuh ah na theihtel ni-ua kipan note lakah a gah mah bangin, leitung mun khempeuh ah hih lungdamna thu in gah gahin a khang semsem hi.

⁷Note in ka it uh, ka naseppih uh kote c[3] tanga Christ nasem muanhuai Epaphras tung panin na za uh a,

⁸amah in Kha sunga note itna zong kote hong hilh hi.

⁹Hih thu hangin note thu ka zak ni-ua kipan, note ading khalam pilna le theihtelna khempeuh tungtawna, ama deih bang theihna tawh note hong dimsak nadingin Pasian tungah thunget ka tawp kei uh hi.

¹⁰Hih banga ka thunget uh Topa adingin note a mannei-in nungta a, lam khempeuh ah amah lungkimsakin, na hoih khempeuh ah gah na gah ding uh , Pasian theihna lamah na khan nading uh,

¹¹le a lianpi sikdona le lungduaina lungnuamtaka ama thahatna minthang tawh kituaka vang liatna khempeuh tawh na thakhauh nading uh ahi hi.

¹²Khuavak gama misiangte tawh gouluah khawm dingin note d[4] hong cingsak pa tungah lungdamna ka ko uh hi.

¹³Ahang in, amah in khuamial ukna gam pan eite hong hukhia in, a it a Tapa gam sung hong tun zo a,

¹⁴eite in ama sungah tatkhiatna e[5] le mawhnate maisakna i ngah hi.

¹⁵Amah a kimu thei lo Pasian lim hi a, a kipiangsak nate khempeuh tunga a suak masa pen ahi hi.

¹⁶Ahang in, na khempeuh ama piansak hi a: vantung le leitunga om nate, muh theih le muh theih lohte, kumpi tokhomte ahi zongin, vangliatna ahi zongin, ukte ahi zongin, thuneite ahi zongin, na khempeuh amah in ama adingin a piansak ahi hi.

¹⁷Na khempeuh a om ma-in amah om a, ama sungah na khempeuh a kizom khawm hi.

¹⁸Amah tua pumpi - pawlpi lutang ahi hi; na khempeuh ah amah a tung nungpen ahi theih nadingin, amah a kipatcilna le misite pana suak masa pen ahi hi.

¹⁹Ahang in, ama sungah Pasian kicinna teng a om nading,

²⁰singlamteh tunga luang sisan tungtawnin kilemna piangsakin, leitunga om nate hitaleh vantunga om nate hitaleh na khempeuh ama tungtawnin amah tawh a kilemkik-sakna in Pasian lungkimna ahi hi.

²¹Khatvei lai-in Pasian kiang panin gamdang mi na hi uh a, na gitloh gamtatnate uh hangin f[6] lungsim-a galte na hi uh hi.

²²Ahi hangin tu-in kawkbaanna om loin mawhsakna panin suakta a, ama muhna ah a siangtho-a hong piak theih nadingin Christ in note ama pumpi-a sihna tawh hong kilemkiksak zo hi.

²³Tua pen lungdamna-thu pana piangkhia lametna pan kihei lo-a, kiptakin kilam a, note upna ah na omsuak uh leh cihna ahi hi. Hih lungdamna-thu, van nuai-a nungta khempeuh tungah a kitangko na zaksa uh hi-a, keimah Paul tua lungdamna thu nasempa ka suak zo hi.

²⁴Tu-in note adingin ka thuakna ah ka lung nuama, Christ thuaknate tawh kisai-a pawlpi ahi ama pumpi hanga a sam lai thuaknate ka ci-le-sa in ka hudim hi.

²⁵Pasian thu a kicingtakin note tungah kong piak nadingin Pasian hong sawlna hangin nasempa ka suak hi.

²⁶Tua thuthuk, akhang akhang khanghunte ah a kiselcip hi-a ahi hangin tu-in misiangte tungah hong kipholak ta hi.

²⁷Pasian in a minthang hih thuthuk hauhnate, Gentile-te lak amau kianga a theisak dinga hong teel ahi hi. Note sunga om Christ pen tua thuthuk a minthang lametna ahi hi.

²⁸Mi khempeuh Christ sunga a kicing kim-a ka piak theih nadingun mi khempeuh tungah pilna namkim tawh taihilhin, hilhin amah ka tangko uh hi.

²⁹Tua ngimin kei sunga vangliantaka a sem ama thahatna khempeuh tawh pang tentanin a na ka sem hi.