Read Zokam Colosse-te 2 Bible Online

Colosse-te 2 - Zokam bible

Colosse-te 2

¹No ading le Laodicia a omte ading le ka mel hong mu ngei nai lote adingin bangzahtakin na sem ka hi hiam, cih na theih ding uh ka deih hi.

²Ka deihna in, amaute lungsungah kihanthawnin itna ah kigawm a, hauhna kicing theihtelna bukim nei-in Pasian thuthuk - tua Christ a theih theih nading uh ahi hi.

³Ama sungah pilna le theihna goute khempeuh a kisel hi.

⁴Kuamah in note paulam nei-a kamsiam thu tawh hong khem zawh loh nadingin hih thute kong gen hi.

⁵Tua hi-a note tawh ka pumpi a om khawm loh hangin note tawh kha-in ka om khawm a, Christ sunga na upna uh a kipzia le hoihtaka na nuntakzia uh ka muh manin ka nuam hi.

⁶Tua ahi ciangin Christ Jesu, Topa a na sansa bang tektekun ama sungah nungta suakin,

⁷note hong kihilh bangin ama sungah zungkha-in, kilamin upna ah thakhauhin om unla lungdamna tawh kidimlet tawntung un.

⁸Christ tunga kingak sangin mihingte tang ngeinate tung le hih leitung thubulte tunga kinga-a a hawmpi le a khem thei thuguizuihna tungtawnin kuamah in sal-a hong mat loh nadingun kikem un.

⁹Ahang in, Christ sunga Pasian-hina bucing pumpi nei-in a vekpi in om a,

¹⁰vangliatna le thuneihna khempeuh tunga lutang ahipa, Christ sungah kicinna note hong kipia hi.

¹¹Note zong mawhdim pianngei a[7] suahkhia-in ama sungah vunat na hi uh a, mihing khut-a at hilo Christ hong at, vunatsa na hi uh hi.

¹²Baptisena sungah amah tawh na kivui khawm uh a, amah misi pana a thosak Pasian vangliatna ah upna tungtawnin amah tawh na thokhawm zo uh hi.

¹³Note na mawhnate uh le na mawh dim pianngei b[8] vunat lohna sung uhah na sih laitakun Pasian in note c[9] Christ tawh hong nungta khawmsak hi. Amah in i mawhnate khempeuh hong maisaka,

¹⁴eite langa pang eite hong do, a kigelhsa ngeina-bucing le a zuih ding ngeinate phiat-a, singlamteh ah kilhin a lakhiamang hi.

¹⁵A vangliatnate le a thuneihnate suahkhiatsakin, singlamteh tawh d[10] tuate tungah gualzo-a, amah in tuate mipi muhnop a suaksak hi.

¹⁶Tua ahi manin annek tuidawn ahi a, biakna pawikham ni, Kha Det pawi ahikeh Sabbath ni tawh kisai-in note tungah kuamah thu na khensak kei un.

¹⁷Hihte in hong tung ding nate liim ahi hi; a taktak pen ahileh Christ sungah a om hi.

¹⁸Kiniam khiatna man lo le vansawltakte biakna a pakta mi khatpeuh, tua pahtakman ngah zo lo dingin kibawlsak kei un. Tua bang mite in a muhsa uh thute a neng a tawngin gen a, ama khami lo lungsim in thadah ngaihsutnate tawh amah a kisatheisak hi.

¹⁹Amah in, sazang le thagui-in vaka kizomkhawmsakin Pasian in a khansak banga a khang pumpi buppi pan, Lutang tawh a kizopna pa a mansuah hi.

²⁰Note in hih leitunga ngeina bulpite Christ tawh na sihsan nungsangun, bang hangin hih leitung aa ahi lai banga, hih ngeinate:

²¹"Len kei in! Ciam kei in! Lawng kei in!" a cihte nuai-a kipia lai na hi uh hiam?

²²Hihte khempeuh zatna tawh, leitung mite thupiakte le hilhnate kibulphuh ahi manin a kisia khin dinga laitansa ahi hi.

²³Tua bang ngeinate, amau bawltawm biakna, amau kiniamkhiatna man lo pumpi bawlsiatnate pilna takpi tawh kibang napi ci-le-sa deihluatna-a bualna kham nadingin kimanna taktak a nei kei hi.