Read Zokam Colosse-te 3 Bible Online

Colosse-te 3 - Zokam bible

Colosse-te 3

¹Tua ahi ciangin, note Christ tawh thokhawm khin na hi nungsang un Pasian taklama a om Christ tutna mun, tunglam nate ah na lungsim uh na nga un.

²Na lungsimte uh, leitung nate ahi lo tunglam nate tungah na nga un.

³Ahang in, note na si zo uh a, tu-in na nuntakna uh, Christ tawh Pasian sungah a kisel zo hi.

⁴Note e[11] nuntakna ahi Christ hong kilat ciangin note zong ama minthanna tawh na kilangkhawm ding uh hi.

⁵Tua ahi manin na leitung pianngei uh ahi: numei-pasal paktatna, siantholohna, kilunggulhluatna, gitlohnate le milim biakna ahi huaihamna na sisak un.

⁶Hihte hangin Pasian thangpaihna hong tung ding hi. f[12]

⁷Khatvei lai-in hih bang nuntakna tawh na nungta uh hi.

⁸Ahi hangin tu-in ahileh tua nate khempeuh: hehna, ngonghehna, etsatna, gendaihatna le a kihhuai kampau, na muk panun na paikhia pelmawh un.

⁹Na milui hinna uh le na gamtatna teng uh na suahkhiat khit nungsangun khat le khat na kikhem kei un.

¹⁰A piangsak-Pa lim sunin theihna lama a kibawlthak mithak na silh un.

¹¹Hih thu ah Greek mi, Jew mi, vunat, vunat lo, mi melmawl, Scythia mi, sila, sila lo, a om kei hi; ahi hangin Christ, na khempeuh hi-a, na khempeuh sungah a om hi.

¹²Tua ahi manin note, Pasian teelsa a siangtho le a ithuai mi na hi bangun no le no in, kikhuatuahna, migitna, kiniam khiatna lungnemna le thuakzawhna na silh un.

¹³Khat le khat kilungnoplohna na neih uh ciangin kithuak zo un. Topa in note hong maisak bangin na kimaisak tek un.

¹⁴Hih a hoih pente khempeuh tungah, tuate khempeuh kicingtakin khata henkhawm itna na silhthuah un.

¹⁵Pum khat a suak dingin lemna ah hong sap nungsangin na lungtangte uh Christ lemna na uksak un. Na lungdam un.

¹⁶Pilna khempeuh tawh note khat le khat kihilhin kithuhilh unla, na sunguah lungdamna tawh Phatna-late, biakna late le khalam-late Pasian tungah na sak kawmun na lungsim sunguhah Christ thu na tengsak phitphet un.

¹⁷Tua ciangin na hih peuhpeuh uh thu-in ahi-a, sepna-in ahi zongin Pa Pasian tungah ama tungtawnin lungdam na ko unla, Topa Jesu minin tuate na hih un.

¹⁸Zite aw, Topa sungah a kilawm bangin na pasalte uh tungah na ki-ap un.

¹⁹Pasalte aw, na zite uh it unla, amau tungah na ngongtat kei un.

²⁰Tate aw, na khempeuh ah na nu na pa-te uh thu na mang un, hih in Topa a lungkimsak hi.

²¹Pate aw, na tate uh hehsak kei un, tua hi kei leh lungkia kha ding uh hi.

²²Silate aw, na khempeuh ah na leitung pute uh thu na mang un; amaute hong muh laitak le amau hong angvan nading deihna hi loin lungsim cihtakna le Topa zahtakna tawh na sem un.

²³Na khat peuhpeuh na hih uh ciangin mihing nasem bang hi lo, Topa nasem bangin na lungsim khempeuh uh tawh sem un.

²⁴Topa tung pan pahtakmanin gouluahna na ngah ding uh hi, cih na thei uh hi. A na nasep uh Topa Christ ahi hi.

²⁵Khialhna a bawl mi peuhmah, angvantuamna om loin a khialhna man kipia kik ding hi.