Read Zokam Colosse-te 4 Bible Online

Colosse-te 4 - Zokam bible

Colosse-te 4

¹Pute aw, note in zong vantung ah pu khat na neih lam uh phawk kawmin na nasemte uh a kilawm a kituak in vak un.

²Lungdamtak le kikem gige kawmin thunget na hahkat un.

³Tua ciangin sikkhainiang buna ka omna, Christ thuthukte ka tangko theih nadingin kote ading zong thu na ngetsak un.

⁴Ka tangko ding banga siangtaka ka tangko theih nadingin thu na ngetsak un.

⁵A pualam mite tungah na gamtatzia uh na pilvang un; hun khempeuh a hoih penpenin zang un.

⁶Mi khatpeuh na dawn nading zia uh na theih nadingun, mi tawh na kihona uah hehpihna tawh kidim, ci sawhsa hi tawntung hen.

⁷Tychicus in kei tunga thuthakte khempeuh hong gen ding hi. Amah i it sanggampa, nasem muanhuai le Topa sunga i naseppih khat ahi hi.

⁸Kote a[13] omzia na theih theih nadingun hong gen ding le na lungsim uh hong hanthawn thei dingin amah note kiangah kong sawl hi.

⁹Note lakah khat, a muanhuai, i it sanggampa Onesimus tawh hong ton uh hi. Amaute in hih lai-a thupiang khempeuh hong gen ding uh hi.

¹⁰Barnabas tupa Mark hong hopih bangin ka thong kiatpih Aristarchus in zong hong hopih hi. (A thu kong gen na zaksa uh ahi hi; amah hong pai leh na muak un,)

¹¹Justus kici Jesu in zong hong hopih hi. Pasian gam adinga ka naseppih Jew mi om sun, hihte hi-a, amaute kei kihehnepna ahi uh hi.

¹²Note lakah Christ Jesu nasem khat ahi Epaphras in hong hopih hi. Amah in note, Pasian deihna khempeuh ah na dinkip nadingun, na picin nading uh le kitelcianna ciantak na neih nading-un nakpi-in thu a ngen den hi.

¹³Note ading le, Laodicea le Hierapolis a omte adingin nakpi-in a sepna ka theihpih hi.

¹⁴I lawm it siavuanpa Luke le Demas in hong hopih uh hi.

¹⁵Laodicea a om sanggamte le Nympha le tuanu inn a pawlpi na hopihsak un.

¹⁶Hih laikhak no kiangah a kisim khit ciangin Laodicea mite pawlpi ah zong na simsak unla, Laodicea pana laikhak zong na sim leuleu un.

¹⁷Archippus kiangah, "Topa sunga na ngahsa nasep zosiang in," ci-in na gen un.

¹⁸Keimah Paul in hih hopihna laite keima khuta ka gelh ahi hi. Ka sik khainiangte na phawk un. Note tawh hehpihna om ta hen.