Read Zokam 1 Thesalonica-te 1 Bible Online

1 Thesalonica-te 1 - Zokam bible

1 Thesalonica-te 1

¹Paul, Silas a[1] le Timothy in, Pa Pasian le Topa Jesu Christ sunga om Thessalonica Pawlpi tungah: Hehpihna le lemna no b[2] tungah om ta hen.

²Kote thungetna sungah na min uh loin note khempeuh hangin lungdam ka ko tawntung uh hi.

³Kote in, upna in a gahsak na sepna uh itna in a sepsak na nasep gimna uh le i Topa Jesu Christ sunga lametna in a guat na thuak zawhnate uh Pa Pasian mai ah ka na phawk den uh hi.

⁴Pasian hong it sanggamte aw, amah in note hong teelsa ahilam ka thei uh hi;

⁵bang hang hiam cih leh kote gen lungdamna-thu, a thu bekin hong tung loin vangliatna, Khasiangtho le kitheih telsakna thukpi tawh no tungah hong tung hi. Note adingin no laka ka nuntak zia uh na thei uh hi.

⁶Kote le Topa etteh-a gamtate na suak uh a, nakpitakin thuak napi Khasiangtho hong piak lungnopna tawh tua thupuak na sang uh hi.

⁷Tua hi-a Macedonia le Achaia a thu-umte khempeuh adingin etteh na suak uh hi.

⁸Macedonia le Achaia bek hi lo, note tung panin Topa thupuak kithangkhia ta a, Pasian na upna uh mun khempeuh ah kithei zo hi. Tua ahi manin tua thu kong gen uh a kul nawn kei hi.

⁹Ahang in, amaute mah in kote nong sanna zia uh hong zasak sawn uh hi. Milimte na biakna uh pan, a nungta a maan Pasian nasem dingin Pasian lama na kihei zia uh le

¹⁰misi pana a thawhsak pa, hong tung ding thangpaihna pana eite hong suaktasak ding pa a Tapa Jesu vantung pana hong pai ding ngaka na om zia uh amaute in hong ko uh hi.