Read Zokam 1 Thesalonica-te 2 Bible Online

1 Thesalonica-te 2 - Zokam bible

1 Thesalonica-te 2

¹Sanggamte aw, no kianga kong hawhna uh, a guaksuak loh lam na thei uh hi.

²Na theihsa bangun tunung in Philippi ah hong kiselphona ka thuak uh a, langbawlna khauhtak om napi, i Pasian huhna tawh ama lungdamna-thu no tungah ka gen ngam uh hi.

³Ahang in, kote hong ngetna pen zuauthu le ngimna siang lo pan hi loin, khembawla zol hong sawm zong ka hi kei uh hi.

⁴Tua sangsikin Pasian in lungdamna-thu kem dinga a sansa mite bangin ka gen uh hi. Kote in mihing lungkimsak sawm loin kote lungtang hong entel pa Pasian lungkimsak ka sawmzaw uh hi.

⁵Kote in mi maitang phatna ahi zongin, huaihamna selna in maikhuhna ahi zongin ka zat ngei loh lam uh nong thei uh a, hong theihpih Pasian ahi hi.

⁶Kote in, note le mi khatpeuh pan mihing phat ding ka zong kei uh hi. Christ sawltakpi ka hi mah bangun note adingin vangik a suak thei ding mah ka hi uh hi.

⁷Ahi hangin nu in taneute a khoi bangin note lakah kong lungnem uh hi.

⁸Note hong it lua ka hi manun, no tungah Pasian lungdamna-thu bek hi lo, ka nuntakna nangawn uh zong kong hawm nuam uh hi. Bang hang hiam cih leh note, kote it mahmah na suak uh hi.

⁹Sanggamte aw, ka haksatna uh le ka nasep gimnate uh na thei lai takpi uh hi. Note kiangah Pasian lungdamna-thu ka hilh laitakun mi khatpeuh vangik ka suah loh nadingun sun le zanin na ka sem uh hi.

¹⁰Thu um mite note lakah bangzah-a siangtho, thumaan le kawkbaang lo ka hi uh cih, note le Pasian ka tecite na hi uh hi.

¹¹Ahang in, pa in a tate a bawl bangin note kong bawl kim lam uh na thei uh hi;

¹²ama gam le a minthanna sunga hong sampa Pasian tawh kilawma nungta dingin note kong hanthawn uh a, hong hehnem in kong kun uh hi.

¹³Kote pana na zaksa uh Pasian thu na ngah uh ciangin, mihing thu bangin sang loin Pasian thu a hinatak bangin na sangpah uh a, tua thu in a um note sungah na sem ahi manin Pasian tungah ka lungdam tawntung uh hi.

¹⁴Ahang in, no ka sanggamte aw, Christ Jesu sunga om, Judea gam sunga Pasian pawlpite etteh-a gamtate na suak uh hi. Tua pawlpite in Jew-te khut a thuak uh bangin note in zong nomau gam mite khut na thuak uh hi.

¹⁵Tua Jew mite in Topa Jesu le kamsangte that uh a, kote zong hong hawlkhia uh hi. Amaute in Pasian lungkimsak lo uh a mite khempeuh langah pangin,

¹⁶Gentile-te a kihotkhiat theih nadingin amaute kianga thu ka hilh ding uh hong kham uh hi. Hih bangin a hih theih zahzah un mawhnate in amaute a kivuk uh hi. A tawpna a[3] ah amau tungah Pasian thangpaihna a tung petmah hi.

¹⁷Ahi hangin sanggamte aw, tomvei sung note tawh hong kikhen ciangin (ngaihsutna hi lo, pumpi in) note kong ngaih luat manun, muh teitei kong sawm uh hi.

¹⁸Ahang in, no kianga pai ding ka ut mahmah uh a, keimah Paul mahmah in .ka sawm thithe hangin Satan in hong khaktan hi.

¹⁹Ahang in, eite Topa Jesu Christ hong pai cianga ama mai-a ka minthanpih dingua ka lamet uh, ka lungnopna uh, ka pahtakna lukhu ding uh bang ahi hiam? Note hi lo na hi uh hiam?

²⁰Hi lua hi, note ka minthanna uh le ka lungnopna uh na hi uh hi.