Read Zokam 1 Thesalonica-te 3 Bible Online

1 Thesalonica-te 3 - Zokam bible

1 Thesalonica-te 3

¹Tua ciangin ka thuak zawh nawn het loh uh ciangin Athen ah ko kia hong kinusiat ding a hoih pen dingin ka ngaihsun uh hi.

²Na upna uh hong thakhauhsak ding le hong hanthawn dingin Christ lungdamna-thu zelhsakna ah Pasian na i seppih, i sanggampa b[4] Timothy kong sawl uh hi.

³Tua in hih zia-etnate hanga kuamah a linglawn loh ding deihna ahi hi. Kote zia-etna thuak dinga laitansa ka hilam uh na theih luatsa uh ahi hi.

⁴A taktakin no tawh i omkhawm lai-in kote hong kibawlsiat ding kong gengen zo uh hi. Na theih khitsa bangun a piang petmah hi.

⁵Hih thu hangin ka thuak zawh nawn loh ciangin note upna thu kan dingin kong sawl hi. Mikhempa in bang lam hiam khatin hong khema, ka nasepna uh a mawkna a suah khak ding ka lauthawng hi.

⁶Ahi hangin tumah in no kiang pan Timothy hong tung khinphet hi-a note upna itna le lungdamna thuthak hong puak hi. Amah in ko kiangah a lungdamhuai nong phawk tawntungna uh le kote no tawh i kimuh ding ka ut bang tektek un kote nong muhnopnate uh hong gen hi.

⁷Tua ahi manin sanggamte aw, kote ka lungdonna uh le hong kibawlsiatna khempeuh ah note upna thu in hong hanthawn hi.

⁸Ahang in, tu-in Topa sungah kiptaka na din khit manun ka nungta takpi ta uh hi.

⁹Pasian mai-ah note hanga ka lungnopna khempeuh uh thuk kik nadingin Pasian tungah bangci in a kicing lungdamna a kimin ko kik thei ding ka hi uh hiam?

¹⁰Note tawh kimu kika na upna uh a kisam laite kong huh theih nadingun sun le zanin hahkat theih tawpin hahkatin thu ka ngen uh hi.

¹¹Tu-in Pasian le Pa mahmah le i Topa Jesu in no kianga kong hawh theih nading uh lampi hong honsak ta hen.

¹²No kong itna uh a khan semsem bangin note khat-le-khat le midang khatpeuh na itna uh Pasian in khangsak in dimletsak ta hen.

¹³I Topa Jesu a misiangthote khempeuh tawh hong pai ciangin eite Pasian le Pa mai-ah siangtho-a kawkbaanna a om loh nadingin amah in na lungtang uh hong thakhauhsak ta hen.