Read Zokam 1 Thesalonica-te 4 Bible Online

1 Thesalonica-te 4 - Zokam bible

1 Thesalonica-te 4

¹A nunung penin sanggamte aw, Pasian na lungkimsak nadingun tu a na nuntaksa bangua na nuntak nadingun lam kong lak uh hi. Tu-in note, a tam semsem a sem dingin Topa Jesu sungah ngenin kong kun uh hi.

²Topa Jesu thu neihna tawh lamlahna kong piakte uh na thei uh hi.

³Pasian deihna ahi: na siantho ding uh, numei pasal paktatna na pelh ding uh,

⁴a kuamah peuh in ama - pumpi siangtho-in a pahtawihuai-a, a uk tek ding a kisin ding uh c[5];

⁵Pasian a thei lo lawkite banga numei pasal kilunggulhluatna neih loh ding;

⁶hih thu-ah kuamah in a sanggam tungah khialin ama tungah hamphatna zong kei hen. Kote in kong vauhilhsa uh le kong gensa bangun hih mawhnate khempeuh hangin Topa in mihingte a gawt ding hi.

⁷Ahang in, Pasian in a nina nungta dingin hong sam lo-a, a siangtho-a nungta dingin hong samzaw hi.

⁸Tua ahi manin hih lamlahna a nialte, mihing nial hi loin note ama Khasiangtho hong pia Pasian nial ahi hi.

⁹Sanggam ki-itna thu tawh kisai ahileh nomau mahmah khat le khat na ki-it ding uh Pasian in hong hilhsa ahi manin lai-a kong gelh ding uh a kisam kei hi.

¹⁰Tua hi-a Macedonia gam khempeuh a sanggamte na it takpi uh hi. Tua hi khin napi sanggamte aw, na it semsem ding uh kong kun lai uh hi.

¹¹Kong gensa bang tektekun daitakin nungta hithiat a, nomau nasep mah semin nomau khut mah tawh na sep ding na tum pen un.

¹²Tua pen a pualam mite in na nisim nuntakna uh a zahtak theih nading uh le kuama tunga kingasawn na hi loh nading uh ahi hi.

¹³Sanggamte aw, a ihmusa mite thu thei lo-a na om ding uh le lametna a nei lo midangte dah banga na dah ding uh ka deih kei uh hi.

¹⁴Eite in Jesu si a, tho kik zo hi, ci-in i um hi. Tua ahi ciangin ama sunga a ihmu khinsate Pasian in Jesu tawh hong tonpih ding hi, ci-in i um hi.

¹⁵Topa hong pai dong a om lai-a a nungta lai eite, a ihmusate sangin i masazaw peuhmah kei ding cih Topa kammal tawh kituakin note kong hilh uh hi.

¹⁶Ahang in, Topa mahmah vantung panin, a ngaih mahmah thupiakna tawh, vansawltak lian aw le Pasian sapna pengkul ging tawh hong kumsuk dinga, tua ciangin Christ sunga a sisate tho masa ding uh hi.

¹⁷Tua khit ciangin a om lai a nungta lai-a om eite, huih lakah Topa dawn dingin amaute tawh meii lakah hong kilato khawm ding hi. Tua tak ciangin Topa tawh i om khawm tawntung ding hi.

¹⁸Tua ahi manin hih thute in na kihanthawn ciat un.