Read Zokam Joshua 1 Bible Online

Joshua 1 - Zokam bible

Joshua 1

¹TOPA nasempa Moses a sih khit ciangin Moses huhpa Nun’ tapa Joshua tungah TOPA in,

²"Ka nasempa Moses si ta hi. Tua ahi ciangin tu-in amaute - Isreal-te tunga ka piak ding gamah pai dingin, Jordan Gun galkah dingin nang le hih mite khempeuh kithawi un.

³Moses tunga ka ciamsa bangin na siikna mun peuhpeuh nang kong pia ding hi.

⁴Na gam ding uh - sehnel-gam pan Lebanon, gun lianpi Ephrates Hit-te gam sung khempeuh pan nitumna lamah Tuipi lian a[1] dong hi ding hi.

⁵Na nuntak sung teng nang langkhat ah kuamah a pang zo kei ding hi. Moses ka ompih bangin nang kong ompih ding hi; nang kong nusia kei dinga kong taisan ngei kei ding hi.

⁶"Hih mite in a luah dingun amaute piak dinga a pute uh tunga ka ciamsa gamah amaute makaih ding na hi manin hat inla hang in.

⁷Hat inla hang mahmah in. Ka nasempa Moses in nang hong piak thukham khempeuh limtakin mang in; na paina peuhah na gualzawh theih nadingin veilam ahi-a taklam ahi zongin pialsan kei in.

⁸Hih Thukham Laibu sunga kigelh khempeuh limtaka na sep theih nadingin na kam tawh kilawisak kei inla sun le zanin ngaihsunsun in. Tua hileh na dau pai-in na lawhcing ding hi.

⁹Thu hong pia khin hi lo ka hi hiam? Hat inla hang in. Lauthawng kei in; na paina peuhah TOPA note Pasian in hong ompih ding ahi manin lungkia kei in," a ci hi.

¹⁰Tua ciangin Joshua in uliante thu pia a:

¹¹"Giahphual tengah pai unla, ‘Na lam-an ding uh kiging un. Tuni-a kipan nithum sungin TOPA note Pasian in na neih dingun hong piak ding gamah hih lai pan Jordan gal ah kahin na pai ta ding uh hi,’ ci un," ci-in a sawl hi.

¹²Ahi hangin Joshua in Reuben-te, Gad-te Manasseh beh alangte tungah,

¹³"TOPA nasempa Moses in note tungah hong thupiak, ‘TOPA note Pasian in tawlngakna hong pia-in hih gam hong ngahsak ding hi,’ a cih phawk un.

¹⁴Na zite na tate uh le na ganhonte uh, Moses hong piaksa Jordan nisuahna lamah om ding uh a, ahi hangin na galkap mite uh galhiam tawisa-in na sanggamte uh mai ah galkah ding uh hi.

¹⁵TOPA in note tawlngakna hong piak bangin amaute tawlngakna pia a, TOPA note Pasian in na sanggamte uh neih dingin a piak ding gam, amaute in zong a lak khit matengun amaute na huh ding uh hi. Tua khit ciangin na ciah kik ding uh a, TOPA ’ nasempa Moses in hong piaksa Jordan nisuahna-lam - nomau neihsa nisuahna lampang teng na luah ding uh hi," a ci hi.

¹⁶Tua ciangin amaute in, "Nong thupiak peuhpeuh ka sem ding uh a, nong sawlna peuhpeuhah ka pai ding uh hi.

¹⁷Moses thu khempeuh ka man bang tektekun nang thu kong mang ding uh hi. TOPA na Pasian in Moses a ompih bangin nang zong hong ompih tapeuh hen.

¹⁸Na kammal a lehdo peuhmah, le na thupiak mang lo-a, na thupiak dingte a mang lo peuhmah kithat ding hi. Hat inla hang in!" ci-in a dawng uh hi.