Read Zokam Joshua 10 Bible Online

Joshua 10 - Zokam bible

Joshua 10

¹Tu-in Joshua in Ai la-in susia c[28] dimdema Jericho le a kumpipa tunga a bawl bangin Ai le a kumpipa tungah bawla, tuateh Gibeon mite in Israel tawh kilemna thuciam bawl uh a, amaute kiangah teng uh hi, ci-in Jerusalem kumpipa Adoni-Zedek in a za hi.

²Hih thu hangin amah le a mite a lauthawng mahmah uh hi; bang hang hiam cih leh Gibeon pen kumpi khua dangte zah mahin a thupi hi a, Ai sangin zong lianzaw-a, a mite khempeuh galdo siam ahi hi.

³Tua ciangin Jerusalem kumpipa Adoni-Zedek in Hebron kumpipa Honam, Jarmuth kumpipa Piram, Lachish kumpipa Japhia le Eglon kumpipa Debir-te tungah,

⁴"Gibeon in Joshua le Israel-te tawh kilemna bawl khin uh ahi manin hong kuan to unla hong simpih un," ci-in a thum hi.

⁵Tua ciangin Amor-te kumpi ngate - Jerusalem, Hebron, Jarmuth, Lachish le Eglon kumpite a pangkhawm uh hi. A galkapte khempeuh uh tawh kisuanto uh a, Gibeon langkhatah panmun la-in a sim uh hi.

⁶Tua ciangin Gibeon-te in Gilgal giahphuala Joshua kiangah, "Na nasemte hong nusia kei in. Ko kiangah hong paito in hong hon meng in! Mualtung gama Amor kumpite khempeuh in a galhatna teng uh gawmin ko hong sim uh hi, hong huh in," ci-in thu a zasak uh hi.

⁷Tua ciangin Joshua, a galkap teng tawh a galdo siampente kengin Gilgal pan a kuan to uh hi.

⁸TOPA in Joshua kiangah, "Amaute kihta kei in; na khut sungah kong pia khin hi. Amaute khat beek in hong nang zo kei ding uh hi," a ci hi.

⁹Gilgal pan zan khat bup a pai khit un Joshua in theihkholh lohin amaute a phawng hi.

¹⁰TOPA in Israel mai-ah galte cimawhsak-a Gibeon ah amaute zawh cihtakin a zo gawp uh hi. Israel in Beth Horon lampi ah amaute nungdelh uh a, Azekah le Makkedah lamdung tawntungah a vattuk uh hi.

¹¹Beth Horon panin Azekah a paisuk lampi ah, Israel mai-a a tai laitakun van panin TOPA in gial lianpi-in deng a, Israel-te in namsau-a a thah uh sangin gialpi a si a tamzaw hi.

¹²TOPA in Israel tungah Amor-te a piak ni-in Israel omin Joshua in TOPA tungah: "Ni aw, Gibeon tungah na dinkhawl inla khapi aw, Aijalon Kuam tungah na dinkhawl in," a ci hi.

¹³Tua ciangin Jashar Laibu a kigelhsa bangin, tua minamin a galte tungah a[29] a lak khit dong ni khawl dide a, khapi a pai kei hi. Ni pai loin van laizangah khawla, a tum ding ni khat tang bang a ziakai hi.

¹⁴Tua nung ahi-a, tua ma ahi zongin TOPA in tua ni banga mihing thu a ngaih hun a om ngei kei hi. TOPA in Israel adingin dosak takpi ahi ve maw!

¹⁵Tua ciangin Joshua le Israel khempeuh Gilgal giahphual ah a ciah kik uh hi.

¹⁶Kumpi ngate tai uh a, Makkedah a suanghawm ah a bu uh hi.

¹⁷Makkedah a suanghawm sungah a bu kumpi ngate a kimuh lam Joshua kiangah a kigen ciangin,

¹⁸amah in, "Suangtum lianpi khukin suanghawm vang hu unla, mi pawlkhat cingsak un.

¹⁹Tawp nai kei un! Na galte uh nungdelhin a nung panin sim unla a khuapi uh tungsak kei un. TOPA note Pasian in amaute na khut sunguah hong pia zo hi," a ci hi.

²⁰Tuaci-in Joshua le Israel-te in, mihing khat dongin - amaute that siang uh a - ahi hangin a om lai sun tawmkha bek a khuapi muanhuai sung uh a tung hi.

²¹Tua ciangin galkap buppi galmuangtakin Makkedah giahphual-a Joshua kiangah ciah kik uh a, tuateh Israel langkhatah kamkek ngam khat beek a om nawn kei hi.

²²Joshua in,"Suanghawm hong unla tua kumpi ngate kei kiangah hong paipih un," a ci hi.

²³Tua ciangin amaute in Jerusalem, Hebron, Jarmuth, Lachish le Eglon kumpite - kumpi nga suanghawm panin a lakhia uh hi.

²⁴Amaute in hih kumpi ngate Joshua kiangah a paipih uh ciangin, amah in Israel mite khempeuh khawma, amah tawh gal kuankhawm galkap ukte kiangah, "Hong pai unla hih kumpite ngawng na khe-un sik un," a ci hi. Amaute a mai-ah paikhia uh a amaute ngawng a siksak uh hi.

²⁵Joshua in amaute kiangah, "Lau kei un; lungkia kei un. Hat unla hang un. Mailam a na do ding uh galte khempeuh TOPA in a hicih ding hi," a ci hi.

²⁶Tua ciangin Joshua in tua kumpite satin that-a, singkung nga tungah khai-in amaute nitak dong singtungah a kinusia hi.

²⁷Nitum ciangin Joshua in thu pia a, amaute in singtung pan lakhia-in amaute bukna suanghawm sungah a paai uh hi. Amaute in suanghawm vangah suangtum lian pipi koih uh a, tuni dongin a om lai hi.

²⁸Tua ni-in Joshua in Mekkedah a la hi. Amah in a khuapi le a kumpipa namsau in that a, a sunga om peuhmah a susia kiuhkeuh hi. Kuamah a hinkhawi kei hi. Jericho kumpipa tunga a bawlsa bangin Makkedah kumpipa tungah a bawl hi.

²⁹Tua ciangin Joshua le amah tawh a omkhawm Israel khempeuh Makkedah pan Libnah ah kuanto in a sim uh hi.

³⁰TOPA in tua khuapi le a kumpipa zong Israel khut sungah a pia hi. Joshua in khuapi le a sunga om peuhmah namsau-in a that hi. Amah in tua lai-ah kuamah a hing khawi kei hi. Jericho kumpipa a bawl bangin a kumpipa tungah a bawl hi.

³¹Tua ciangin Joshua le amah tawh a omkhawm Israel khempeuh Libnah panin Lachish ah kuan uh a, a langah panmun la-in a sim uh hi.

³²TOPA in Israel tungah Lachish pia-a, a ninihna ni-in Joshua in a la hi. Libnah tunga a bawl bang tektekin, khuapi le a sunga om peuhmah namsau-in a thatlum hi.

³³Tua hun sungin Lachish huh dingin Gezer kumpipa Horam kuanto a, ahi hangin Joshua in khat beek hin khawi loin - amah le a galkapte a zo khin hi.

³⁴Tua ciangin Joshua le amah tawh a omkhawm Israel khempeuh Lachish pan Eglon ah kuan uh a; a langah panmun la-in a sim uh hi.

³⁵Amaute in tua ni mah in la zo uh a Lachish a bawl bang tektekun bawlin, namsau-in that uh a, a sunga om khempeuh a susia kiuhkeuh uh hi.

³⁶Tua ciangin Joshua le amah ompih Israel khempeuh tawh Eglon pan Hebron ah kuanto in a sim uh hi.

³⁷Amaute in namsau tawh a khuapi, a kumpipa, a khuaneute le a sunga om teng a that gam uh hi. Khat beek a hinkhawi kei uh hi. Eglon a, a hih bang tektekun khuapi le a sunga om peuhmah a susia kiuhkeuh uh hi.

³⁸Tua ciangin Joshua le amah tawh a omkhawm Israel khempeuh kilehhei kik uh a Debir a sim uh hi.

³⁹Amaute in a khuapi, a kumpipa le a khuaneute la uh a, namsau-in a that khin uh hi. Amaute in a sunga om peuhmah a susia kiuhkeuh uh hi. Khat beek a hinkhawi kei uh hi. Amaute in Libnah le a kumpipa Hebron tunga a bawl bangun Debir le a kumpipa tungah a bawl uh hi.

⁴⁰Tuaci-in Joshua in tua kual buppi, a mualtung gam teng, Negev, nitumna lam zang le kham kicin teng le mualpang suk le amau kumpipa ciat tawh a lakhawm hi. TOPA, Israel Pasian thupiaksa bang tektekin huu a sang khempeuh a susiamang kiuhkeuh hi.

⁴¹Joshua in Kadesh Barnea pan Gaza dong le Goshen kual buppi pan Gibeon dong a zo khin hi.

⁴²TOPA, Israel Pasian in Israel dopih ahi manin Joshua in hih kumpite khempeuh le a gam uh kuan khatin a zo khin hi.

⁴³Tua ciangin Israel khempeuh tawh Joshua Gilgal giahphual ah a ciah kik uh hi.