Read Zokam Joshua 11 Bible Online

Joshua 11 - Zokam bible

Joshua 11

¹Hazor kumpipa Jabin in hih thu a zak ciangin Madon kumpipa Jobab kiang, Shimron le Acshaph kumpite kiang,

²le mual laka teng leilu-lam kumpite kiang; Kinnereth leitaw-lama om Arabah, nitumna-lam mualbul-ate le nitumna-a Naphoth Dor a[30] kumpite kiang;

³nisuahna le nitumna a om Canaan-te; mualtung gama teng Amor-te, Hit-te, Periz-te, le Jebus-te kiang; le Mizpah kuala om Hermon nuai lama teng Hiv-te kiangah thu a puak hi.

⁴Galkap a tam lua mahmah tuipi gei-a sehnel zah a tam - galkap honpi le sakol le sakolleng tampitak tawh amaute a kuankhia uh hi.

⁵Hih kumpite khempeuh in a galhatnate uh gawm uh a, Israel sim dingin Merom Tuite ah giahphual a sat khawm uh hi.

⁶TOPA in Joshua kiangah, "Amaute kihta kei in, bang hang hiam cihleh zingciang tu hunin thahsa-in Israel tungah amaute khempeuh kong pia ding hi. A sakol zaguite uh attatsakin a sakol-lengte uh na haltum ding uh hi." a ci hi.

⁷Tuaci-in Joshua le a galkap buppi thakhatin Merom Tuite ah tung vatin sim uh a,

⁸TOPA in Israel-te khut sungah amaute a pia hi. Amaute in zo uh a, Sidon Lianzaw lam, le Misrephoth Maim lam, le nitumna lama Mizpah lamah a suakta khat beek a omloh dongin a delh uh hi.

⁹TOPA lahsa bangin Joshua in amaute tungah bawla: a sakol zaguite uh attatin a sakollengte uh a halsak hi.

¹⁰Tua hun mah in Joshua kileh kik a, Hazor la-a namsau-in a kumpipa a that hi. (Hih kumpi gam khempeuh lutang Hazor ahi hi.)

¹¹A sunga om peuhmah namsau-in a that uh hi. Amaute in a vekun susiamang b[31] kiuhkeuh uh a, a husang peuhmah hawi nei loin Hazor mahmah zong a haltum uh hi.

¹²Joshua in hih kumpi’ khuapite khempeuh la-in kumpite namsau in a that hi. TOPA nasempa Moses thupiaksa bangin amaute susiamang kiuhkeuh hi.

¹³Joshua in a haltum Hazor longal mual neute tunga om khuapite khempeuh Israel in khat beek a hal kei hi.

¹⁴Israel in hih khuapite a van kinusiate le ganhingte khempeuh puakhiamang uh a, ahi hangin a husang khat beek hawi loin mihing khempeuh a susiamang kiuhkeuh uh hi.

¹⁵TOPA in ama nasempa Moses thu pia a, Moses in Joshua a thupiak bangin Joshua in a hih hi; TOPA in Moses a thupiakte sep loh a, a nusiat khat beek a om kei hi.

¹⁶Tua ciangin Joshua in hih gambuppi: Mualtung gam teng, Negev khempeuh, Goshen kual buppi, nitumna lam mualbulte, Arabah le Israel mualliante a mualbulte uh tawh,

¹⁷Halak Vum pan Seir lam manawh a kikhung to, Hermon Vum nuaisan a om Lebanon Kuam sunga Baal Gad ciang dong a la hi. A kumpite khempeuh man-a, sattukin a that hi.

¹⁸Joshua in hih kumpite khempeuh a do hun sung sawtveipi ahi hi.

¹⁹Gibeon a teng, Israel-te tawh kilem nading thuciam a bawl Hiv-te longal a vekpi in sim-a, a lak ahi hi.

²⁰Ahang in, TOPA in Moses a thupiaksa bangin lainat loin a vekpi un susia mang a a cimansak theih nadingin Israel-te do dingin TOPA in amaute lungsim a khauhsak ahi hi.

²¹Tua hun mahin Joshua pai-a mualtung gama om: Hebron, Debir le Anab pan, Judah-te mualtung gam khempeuh pan le Israel mualtung gam khempeuh a Anak-te a susia hi. Joshua in amaute le a khuapite uh a susiamang kiuhkeuh hi.

²²Israel gam sungah Anak-te khat zong om nawn lo a; Gaza, Gath le Ashdod ah a om laisunte bek a om uh hi.

²³TOPA in Moses a lah bang tektekin Joshua in tua gam khempeuh la-a, amau beh khenna tawh kizui-in a luah dingun Israel tungah a pia hi. Tua ciangin tua gamah gal a veng ta hi.