Read Zokam Joshua 17 Bible Online

Joshua 17 - Zokam bible

Joshua 17

¹Joseph tacil Manasseh ahi manin hih sehtanh a ngah hi-a, tua pen, Manasseh tacil Makir ading ahi hi. Makir pen Gilead-te pianna hi a, Makir-te galkap thupite ahi manun Gilead le Bashan amau ngahsa ahi hi.

²Tua ahi ciangin hih sehtanh pen Manasseh mi a om lai- Abiezer, Helek, Asriel, Shechem, Hepher le Shemida bawng’te ading ahi hi. Hihte, Joseph’ tapa Manasseh suan pasal dangte amau bawng’ ciat ahi hi.

³Tu-in Manasseh’ tapa, Makil’ tapa Gilead’ tapa Hepher’ tapa Zelophehad in tapa nei lo a, tanu bek a nei hi; tuate min in: Mahlah, Noah, Hoglah, Milcah le Tirzah ahi hi.

⁴Amaute siampi Eleazar, Nun tapa Joshua le makaite kiangah pai uh a, "Kote in ka sanggam pasalte uh lakah gouluah ka ngah ding uh Moses tungah TOPA in thu pia hi," a ci uh hi. Tua ciangin Joshua in TOPA thupiak bangin a pate uh sanggampate tawh gouluah a piakhawm hi.

⁵Manasseh in Jordan nisuahna lama Gilead le Bashan banah leitang khen sawm a tanh thuah hi;

⁶Bang hang hiam cih leh Manasseh beh a tanute in tapate lakah gouluah a ngah uh hi. Gilead gam pen Manasseh suan a om laite aa ahi hi.

⁷Manasseh gam in Asher panin Shechem nisuahna-a Micmethath bansuak hi. Tua lai panin gamgi leitaw lamah pai a, En Tappuah a teng mite a huam hi.

⁸(Manasseh in Tappuah leitang a neih hangin Tappuah mahmah zong Manasseh gamgi huam sungah om a Ephraim-te aa ahi hi.)

⁹Tua ciangin gamgi in Kanah Kuampi leitaw-lam a zom hi. Tua lai-a Manasseh khuapite lakah Ephraim-te khuapite om a, ahi hangin Manasseh gamgi tua Kuampi leilu lamah pai-a tuipi ah a tawp hi.

¹⁰A leitaw lamah Ephraim-te gam hi-a, leilu lamah Manasseh-te gam ahi hi. Manasseh-te gam in tuipi bana, a leilu lamah Asher tawh kigamgi in, nisuahna lamah Issachar tawh kigamgi hi.

¹¹Issachar le Asher sungah Manasseh in zong Beth Shan, Ibleam le Dor, Endor, Taanach le Megiddo mite a kimkot a tengte tawh (a kigualhna ah a thumna Naphoth) a[48] ahi hi.

¹²Tua hi napi Canaan-te tua kualah teng teitei uh ahi manin Manasseh-te in hih khuapite a luah zo kei uh hi.

¹³Ahi hangin Israel-te a thahat zawk uh ciangin Canaan-te zawhthawh thu-in na semsak uh a, a hawlkhia siang kei uh hi.

¹⁴Joseph mite in Joshua kiangah, "Bang hangin kote sehtanh khat bek hong pia-in ka gouluah dingun khenkhat bek hong pia na hi hiam? Kote ka tam mahmah uh a TOPA in thupha a dimin hong pia hi," a ci uh hi.

¹⁵Joshua in, "Na tam luat uh a Ephraim mualtung gam teng no adingin a neu luat leh tulakah pai to unla Periz-te le Rephai-te leitang nomau gam dingin sat un," ci-in a dawng hi.

¹⁶Joseph mite in mualtung gam teng ko adingin a kicing kei ding hi, zanglei a teng Canaan-te khempeuh, Beth Shan le amau tawh a tengte le Jezreel Kuam a tengte in sik sakol-leng a nei uh hi," ci-in a dawng kik uh hi.

¹⁷Ahi hangin Joshua in Joseph innkuan - Ephraim le Manasseh tungah - "Note tam mahmah in na vanglian mahmah uh hi. Sehtanh khat bek na ngah kei ding uh a,

¹⁸mualtung tulak tawh na ngah khawm ding uh hi. Hah siang un, Canaan-te in sik sakolleng a nei uh a, a thahat uh zongin na hawlkhia zo ding uh hi; a kiciangtannasa ciangciang no aa hi ding hi," a ci hi.