Read Zokam Joshua 19 Bible Online

Joshua 19 - Zokam bible

Joshua 19

¹A nihna ah Simeon beh a bawng’bawng’te adingin ai a pha hi. Amaute gouluah in Judah gamsunga omsa a huam hi.

²A huam khakte: Beersheba (ahikeh Sheba) c[51], Moladah,

³Hazar Shual, Balah, Ezem,

⁴Eltolad, Bethul, Hormah,

⁵Ziklag, Beth Marcaboth, Hazar Susah,

⁶Beth Lebaoth le Sharuhen - khuapi sawm le thum le a khua neute ahi hi.

⁷Ain, Rimmon, Ether le Ashan - khuapi li le a khuaneute

⁸le hih khuapite kimkota, Baalath Beer (Negev sunga Ramah) donga khuaneute khempeuh ahi hi. Hih in Simeon-te beh in a bawng’bawng’-a, a gouluah uh ahi hi.

⁹Judah-te tanh amau kisap zah sangin tamzaw ahi manin Judah tanh sung pan Simeon-te gouluah kilaksak hi. Tua ahi ciangin Simeon-te in amau gouluah Judah gam sung panin a ngah uh hi.

¹⁰A thumna ah Zebulun a bawng’bawng’te adingin ai a pha hi: Amaute luah ding gamgi Sarid dongah pai hi.

¹¹Nitumna-lam manawh in Maralah lamah pai-a Dabbesheth nawkin Jokneam kianga ciangpi dongah a kikhung hi.

¹²Sarid panin nisuahna lamah kihei-a, Kisloth Tabor gama nisuahna mun lam manawhin Daberath ciang dong pai-a Japhia ciang dong a ban hi.

¹³Tua ciangin nisuahna lamah Gath Hepher le Eth Kazin dong kizom hi; Rimmon ah suakkhia a, Neah lamah a kihei hi.

¹⁴Tua lai panin Hannathon dong leilu-lam ah kivial a, tuateh Iphtah El Kuam ah tawp hi.

¹⁵A huamkhakte Kattath, Nahalal, Shimron, Idalah le Bethlehem ahi hi. Tua lai-ah khuapi sawm le nih le a khuaneute a om hi.

¹⁶Hih khuapite le khuaneute Zebulun in a bawng’bawng’a, a gouluah uh ahi hi.

¹⁷A lina ah Issachar, a bawng’-bawng’te adingin ai a pha hi.

¹⁸Amau gam in a huamkhakte: Jezreel, Kesulloth, Shunem,

¹⁹Hapharaim, Shion, Anaharath,

²⁰Rabbith, Kishion, Ebez,

²¹Remeth, En Gannim, En Haddah le Beth Pazzez ahi hi.

²²Gamgi in Tabor, Shahazumah le Beth Shemesh nawka Jordan ah a tawp hi. Tua lai-ah khuapi sawm le guk le a khuaneute a om hi.

²³Hih khuapite le a khuaneute, Issachar behte in a bawng’bawng’a a gouluah uh ahi hi.

²⁴A ngana ah Asher beh a bawng’bawng’te adingin ai a pha hi.

²⁵Amau gam in a huamkhakte: Helkath, Hali, Beten, Acshap,

²⁶Allammelech, Amad le Mishal ahi hi. Nitumna-lam gamgi in Carmel le Shihor Libnah a nawk hi.

²⁷Tua ciangin nisuahna-lam Beth Dagon lamah kihei a, Zebulun le Iphtah El Kuam nawkin, leilu-lam manawh in Beth Emek le Neiel ah pai-a, Cabul veilam pangah kantan to hi.

²⁸Abdon d[52], Rehob, Hammon le Kanah ah pai-in Sidon Lianzaw dong a sun hi.

²⁹Tua ciangin gamgi Ramah lamah kilehhei a, kulh-a ki-um Tyre khuapi ah pai-in Hosah lamah kihei-a, Aczib

³⁰Ummah, Aphek le Rehob kual-a tuipi ah suakkhia hi. Tua lai-ah khuapi sawmnih le nih le a khuaneute a om hi.

³¹Hih khuapite le a khuaneute Asher behte in a bawng’bawng’a a gouluah uh ahi hi.

³²A gukna ah Naphtali a bawng’bawng’te adingin ai pha a:

³³Amau gamgi Heleph le Zaanannim a singkung lianpi pan kipanin, Adami Nekeb le Jabneel kantanin Lakkum ah paisuak-a, Jordan ah a tawp hi.

³⁴Gamgi nitumna lamah pai leuleu a, Aznoth Tabor kantanin Hukkok ah a suakkhia hi. Leitaw lamah Zebulun nawkin nitumna lamah Asher hi-a, a nisuahna lamah Jordan a[53] ahi hi.

³⁵Kulh a ki-um khuapite in: Ziddim, Zer, Hammath, Rakkath, Kinnereth,

³⁶Adamah, Ramah, Hazor,

³⁷Kedesh, Edrei, En Hazor,

³⁸Iron, Migdal El, Horem, Beth Anath le Beth Shemesh ahi hi. Tua lai ah khuapi sawm le kua le a khuaneute a om hi.

³⁹Hih khuapite le a khuaneute Naphtali behte in a bawng’bawng’a a gouluah uh ahi hi.

⁴⁰A sagihna ah Dan beh a bawng’bawng’te adingin ai a pha hi.

⁴¹Amau luahna gam in a huamkhak teng: Zorah, Eshtaol, Ir Shemesh,

⁴²Shaalabbin, Aijalon, Ithlah,

⁴³Elon, Timnah, Ekron,

⁴⁴Eltekeh, Gibbethon, Baalath,

⁴⁵Jehud, Bene Berak, Gath Rimmon,

⁴⁶Me Jarkon, le Rakkon, Joppa gal kuam teng tawh ahi hi.

⁴⁷(Ahi hangin Dan-te in amau gam a neih theih nadingun haksapi in la uh a, tua ciangin amaute kuanto in Leshem sim uh a la-in, namsau-in that uh a, a tang uh hi. Amaute Leshem ah teng uh a, a pupi uh min tam in Dan a ci uh hi.)

⁴⁸Hih khuapite le a khuaneute Dan behte in a bawng’bawng’a, a gouluah uh ahi hi.

⁴⁹Amaute in amau sehtanh ciat ding bangin a gam uh a hawm khit uh ciangin TOPA in amaute a thupiaksa bangin Israel-te in amaute lakah Nun’ tapa Joshua gouluah khat a pia uh hi.

⁵⁰Amaute in ama nget khuapi - Ephraim mualtung gama Timnath Serah b[54] a pia uh hi. Tuateh amah in khuapi lama tua lai-ah a teng hi.

⁵¹Hihte in siampi Eleazar, Nun’ tapa Joshua le Israel beh pana a bawng’ lutangte in Shiloh a TOPA omna Kikhopna Puanbuk lutna ah ai lawna, a hawm uh gamte ahi hi. Hih bangin amaute gam hawm a man ta uh hi.