Read Zokam Joshua 21 Bible Online

Joshua 21 - Zokam bible

Joshua 21

¹Tu-in Canaan gam Shiloh a om siampi Eleazar, Nun’ tapa Joshua, le Israel beh innkuan lutangte kiangah Levi-te innkuan lutangte va pai uh a amaute kiangah,

²"Ka ten nading uh khuapi le ka ganhonte uh ading lonona mun nong piak nadingun Moses tungtawnin TOPA in thu pia hi," a ci uh hi.

³Tua ciangin TOPA thupiaksa bangin amau gouluah sung panin Israel-te in a nuai-a khuapite le lonona munte Levi-te tungah a pia uh hi:

⁴Kohath a bawng’bawng’te adingin ai masa pen a pha hi. Siampi Aaron suan Levi-te in Judah, Simeon, le Benjamin behte aa panin sehtanh khuapi sawm le thum a ngah uh hi.

⁵A om lai Kohath’ suante in Ephraim, Dan le Manasseh behte alang a bawng’bawng’te tung panin sehtanh khuapi sawm a ngah uh hi.

⁶Gershon suante in Issachar, Asher, Naphtali le Bashan a om Manasseh beh alang a bawng’ bawng’-te tung panin sehtanh khuapi sawm le thum a ngah uh hi.

⁷Merari suante in Reuben, Gad le Zebulun beh a bawng’bawng’te tung panin khuapi sawm le nih a ngah uh hi.

⁸Tuaci-in Israel-te in Moses tungtawna TOPA thupiak bangin hih khuapite le lonona munte sehtanh in a pia uh hi.

⁹Judah le Simeon behte tung panin a nuai-a khuapite a minminin

¹⁰(Levi-te Kohath bawng’ panin Aaron suante tungah hih khuapite kipia hi, bang hang hiam cih leh ai a masa pen amau tungah tu hi) kipia hi:

¹¹Amaute in Judah mualtung gama om Kiriath Arba (tua pen Hebron) a kimkot a lonona mun tawh amaute a pia uh hi. (Arba in Anak pu ahi hi.)

¹²Ahi hangin khuapi kimkot a lote le khuaneute Jephunneh’ tapa tanh dingin a piaksa uh ahi hi.

¹³Tua ahi ciangin siampi Aaron suante tungah Hebron (mi thata kingawhpa bukna khuapi), Libnah,

¹⁴Jattir, Eshtemoa,

¹⁵Holon, Debir,

¹⁶Ain, Juttah le Beth Shemesh, a lonona mun uh tawh piakhawm a - hih beh nih panin khuapi kua ahi hi.

¹⁷Tuateh Benjamin beh panin amaute in Gibeon, Geba,

¹⁸Anathoth le Almon, a lonona munte tawh piakhawm uh a - khuapi li ahi hi.

¹⁹Aaron suan siampite ading a lonona munte tawh khuapi sawm le thum ahi hi.

²⁰A om lai Levi-te bawng’ ahi Kohath-te Ephraim beh panin khuapi sehtanhte kipia a:

²¹Ephraim mualtung gam sungah amaute Shechem (mi thata kingawhpa bukna khuapi) le Gezer,

²²Kibzaim le Beth Horon, a lonona munte tawh kipia khawm a - khuapi li ahi hi.

²³Dan behte panin zong amaute in Eltekeh, Gibbethon,

²⁴Aijalon le Gath Rimmon, a lonona munte tawh ngah khawm uh a - khuapi li ahi hi.

²⁵Manasseh beh alang panin amaute in Taanach le Gath Rimmon, a lonona munte tawh ngah khawm uh a - khuapi nih ahi hi.

²⁶Hih khuapi sawmte le a lonona munte khempeuh a om lai Kohath bawngte tungah kipia hi.

²⁷Gershon mi Levi bawngte tunga kipiate in: Manasseh beh lang panin, Bashan a Golan (mi thata kingawhpa bukna khuapi) le Be Eshtarah, a lonona munte tawh - khuapi nih hi a;

²⁸Issachar beh panin, Kishion, Daberath,

²⁹Jarmuth le En Gannim, a lonona munte tawh - khuapi li hi a;

³⁰Asher beh panin, Mishal, Abdon,

³¹Helkath le Rehob, a lonona munte tawh khuapi li hi in;

³²Naphtali beh’ panin, Galilee a Kedesh (mi that a kingawhpa bukna khuapi) Hammoth Dor le Kartan, a lonona munte tawh - khuapi thum ahi hi.

³³Gershon bawng’te neih khuapi khempeuh a lonona munte tawh sawm le thum ahi hi.

³⁴Merari-te bawng’ (Levi-te a om laiteng) a kipiate: Zebulun beh panin, Jokneam, Kartah,

³⁵Dimnah le Nahalal, a lonona munte tawh - khuapi li;

³⁶Reuben beh panin, Bezer, Jahaz,

³⁷Kedemoth le Mephaath, a lonona munte tawh - khuapi li;

³⁸Gad beh panin, Gilead a Ramoth (mi that-a kingawhpa bukna khuapi), Mahanaim,

³⁹Heshbon le Jazer, a lonona munte tawh - a vekin khuapi li ahi hi.

⁴⁰A omlai Levi-te, Merari bawngte tungah sehtanh-a kipia khuapi a vekin sawm le nih ahi hi.

⁴¹Israel-te neih gam sungah Levi-te tanh a vekin a lonona munte tawh khuapi sawmli le giat ahi hi.

⁴²Hih khuapite in a kimah lonona mun nei ciat a, hih khuapi khempeuh adingin tua mah bang ahi hi.

⁴³Tuaci-in TOPA in a pute uh tunga a khapsa gam khempeuh Israel tungah pia-a, amaute in a neih dingun a lak khit uh ciangin tua lai-ah a teng uh hi.

⁴⁴TOPA in a pute uh tunga a ciamsa bang tektekin a kimkot panun gal a vengsak hi. A galte uh khat beek amau langah pang zo lo-a, a galte khempeuh uh TOPA in amaute khutah a pia hi.

⁴⁵TOPA in Israel innkuante tungah kamciam hoih khempeuh khat beek kipelh loin, a vekin a tangtun kim hi.