Read Zokam Joshua 23 Bible Online

Joshua 23 - Zokam bible

Joshua 23

¹Hun sawtpi a bei khit TOPA in Israel, a kimkota galte a vensak khit ciang, Joshua lah tua hunin a kum tam ta in a tek nungin

²Israel khempeuh - upate, makaite, thukhente le uliante sama - amaute kiangah: "Ka kum tamta in ka tek ta hi.

³TOPA note Pasian in hih minamte tungah note tangin a sepsa na khempeuh no mahmah in na mu khin uh hi; note hong dosak TOPA note Pasian ahi hi.

⁴Na behte uh luah dingin kong piaksa a omlai minamte gam - ka zawhsa minamte gam - nitumna lama Tuipi Lian c[58] le Jordan kikala kong piaksa na sehtanhte uh mangngilh kei un.

⁵TOPA note Pasian in na lampi panun amaute a nawhkhia ding hi. Note mai panin amaute nawhkhia dinga, TOPA note Pasian in hong khapsa bangin amaute gam na la ding uh hi.

⁶"Hat mahmah un; Moses Thukham Laibu sunga kigelhsate khempeuh limtakin mang unla veilam ahi a taklam ahi zongin pial kei un.

⁷No laka a om lai minamte tawh kipawl kei un; amau pasiante min lo kei unla tuate in zong kiciam kei un. Tuate na sem loin tuate bia-in zong na kun peuhmah kei ding uh hi.

⁸Tu dong na letkipsa bangun TOPA note Pasian lenkip un.

⁹"TOPA in note mai-ah a vanglian minam liante hawlkhia-a; tuni dong note langah kuamah a pang zo kei hi.

¹⁰Ama hong ciamsa bang tektekin TOPA note Pasian in hong dosak ahi manin note khat in tulkhat na taikeksak uh hi.

¹¹Tua ahi ciangin TOPA note Pasian na it ding uh limtakin ngaihsun un.

¹²"Ahi hangin note lampialin, no laka om hih minam omsunte tawh no mahmah na kinaibawl uh a, amaute tawh na kiten thuk uh leh,

¹³tua ciangin TOPA note Pasian in note mai pan hih minamte a hawlkhia nawn peuhmah kei ding hi cih theician un. Tua hi kei leh TOPA note Pasian in note hong piaksa hih gam hoih panin na manthan matengun note adingin amaute thang le thangzak suak ding uh a, hong kisatna khauteep le na mit uh hong sun ling suak ding uh hi.

¹⁴"Tu-in leitung mi khempeuh ngeina zui-in ka pai ta ding hi. TOPA note Pasian in hong piaksa a hoih kamciamte khat beek pelhem loin a veka hong piak lam na lungsim uh le na hinna khempeuhun na thei zo uh hi. Hong ciamsa peuhmah tangtung khin-a; khat beek kipelh lo hi.

¹⁵Ahi zongin TOPA note Pasian kamciam hoih peuhmah hong tun bang tektek in ama hong piaksa hih gam hoih panin note hong siatsak matengin TOPA in note hong thuaksaksa siatna khempeuh hong thuaksak ding hi.

¹⁶TOPA note Pasian in note hong thupiaksa ama thukhun na palsat uh a, pai-in pasian dangte na semin a mai-ah na kun uh leh TOPA hehna no tungah hong kuang dinga ama hong piaksa gam hoih panin na mangthang pah ding uh hi," a ci hi.