Read Zokam Joshua 3 Bible Online

Joshua 3 - Zokam bible

Joshua 3

¹A zing ciang zingtung in Joshua le Israel-te khempeuh Shittim panin dingkhia uh a, Jordan tungin a galkah ma-un tua lai-ah a giak uh hi.

²Ni thum khit ciangin a uliante uh giahphual khempeuh ah pai uh a,

³mipite tungah, "TOPA note Pasian thukhun singkuang Levi siampite in a puak na muh uh ciangin na omna mun tek panun paikhia-in na zui ding uh hi.

⁴Hih lampi-ah pai ngei lo na hi manun tua hun ciangin na pai nading uh na thei ding uh hi. Ahi hangin singkuangpi le no kikal yard d[5] tul khat bang kihalin pai un; a kiang neh kei un," ci-in thu a pia uh hi.

⁵Tua ciangin Joshua in mipite tungah, "No le no kisiansuah un, zing ciangin TOPA in note lakah nalamdang hong bawl ding hi," ci-in a gen hi.

⁶Joshua in siampite kiangah, "Thukhun singkuang pua unla, mipite mai-ah galkahpih un," a ci hi. Tua bangin amaute in pua uh a amaute mai-ah a masa uh hi.

⁷Tua ciangin TOPA in Joshua kiangah, "Moses ka ompih bangin nang kong ompih lam Israel-te in a theih theih nadingun tuni-in amaute muhna ah nang kong tawisangna ka kipan ding hi.

⁸Thukhun singkuang a pua siampite tungah, ‘Jordan tuite gei na tun uh ciangin pai-in gun sungah ding un,’ ci-in gen in," a ci hi.

⁹Joshua in Israel-te kiangah, "Hih lai-ah hong pai unla, TOPA note Pasian kammalte ngai un.

¹⁰Hih in a nungta Pasian note lakah a om lam na theih nading uh le amah in note mai-a om Canaan-te, Hit-te, Hiv-te, Periz-te, Girgash-te, Amor-te le Jebus-te hawlkhia takpi ding ahilam na theih nading uh ahi hi.

¹¹En un, leitung khempeuh Topa’ thukhun singkuang note mai Jordan sungah a masa ding hi.

¹²Tua ahi ciangin tu-in Israel behte panin beh khatah mi khat, mi sawm le nih telkhia un.

¹³Leitung khempeuh Topa ahi TOPA ’ singkuang a pua siampite a khe uh le Jordan tui a kisukkhak phetin tui a luangsuk kimlai kikhenin vum venvanin a kiciang ding hi," a ci hi.

¹⁴Tua ciangin mite Jordan galkah dingin a giahphual pan un dingkhia uh a, thukhun singkuangpi pua-in siampite amaute mai-ah a masa uh hi.

¹⁵Anlak hun sung tawntung Jordan a khang hi. Tua hi napi singkuangpi pua siampite khe in Jordan tuimong a sukkhak phetin

¹⁶tui khang kimlai a luang nawn kei hi. A lompi-in kiciang to venvan a gamlapi pek, Zarethan gei-a Adam kici khuapi dong vungto in, a nuaisiah a luangsukte Arabah Tuipi (Ci Tuipi) a[6] dong in a kikhentat siang kiuhkeuh hi. Tuaci-in mipite Jericho galtakah a galkah uh hi.

¹⁷Israel khempeuh in a minam bupun leikeu tung tawnin Jordan a kantan khit kiuhkeuh matengun TOPA ’ thukhun singkuang pua siampite gunpi laizang leikeu tungah a dingkip uh hi.