Read Zokam Joshua 5 Bible Online

Joshua 5 - Zokam bible

Joshua 5

¹Tu-in Jordan nitumna lama Amor-te kumpite khempeuh le tuipi dunga Canaan-te kumpite khempeuh in eite i galkah siang khit matengin TOPA in Israel-te mai-ah Jordan keusak cih a zak uh ciangin lungkia uh a, Israel-te maituah ngam nadingin hanna a nei nawn kei uh hi.

²Tua hun laitakin TOPA in Joshua tungah, "Meisuang tem bawl inla Israel-te vun at kik in," a ci hi.

³Tua ciangin Joshua in meisuang tem bawla, Gibeath Haaraloth d[9] ah Israel-te vun a at hi.

⁴Hih banga a hihna ahang pen: Egypt pana paikhia khempeuh - galkap dinga a kum cing teng - Egypt a nusiat khitun lamkal sehnel-gam ah sikhin uh hi.

⁵Egypt pana paikhia mite khempeuh vun atsa ahi hangin sehnel gama a zin kawikawi sungua suak khempeuh vun at nai loh ahi hi.

⁶Israel-te in TOPA thu mang lo uh ahi manin Egypt a nusiat khit uh galkap dinga kum cingsa khempeuh a sih khit dong kum sawmli sung sehnel gamah a kilehkawikawi uh hi. Ahang in, TOPA in eite hong piak dingin i pate tungah limtaka a ciamsa bawngnawi le khuaizu luanna gam a muh loh nadingun amaute tungah amah kiciam khin hi.

⁷Tua ahi ciangin amah in amaute mun ah a tapate uh koih to-a, Joshua in hihte vun a atsak hi. Lamkal ah amaute vun ki-at nai lo ahi manin vun at loh a om ahi uh hi.

⁸A minam bupun vun a at khit uh a damsiang dongun amau giahphual ciatah a om uh hi.

⁹Tua ciangin TOPA in Joshua kiangah, "Tuni-in note panin Egypt a minsiatna ka zialmang hi," a ci hi. Tua ahi ciangin tua mun tuni dongin Gilgal a[10] kici hi.

¹⁰Jericho zanglei a Gilgal giahphual ah Israel-te a om laitak uh tua kha a ni sawm le lina ni nitak in amaute in, Paisan pawi a bawl uh hi.

¹¹Paisan ni khit a zingciang, tua ni mahmah in amaute in tua gama piang: silngo sawh loh anlum le an hanmin pawlkhat a ne uh hi.

¹²Hih gama piang a nek khit b[11] ua kipanin manna a om nawn kei hi. Israel-te adingin manna a om nawn loh hangin amaute in tua kumin Canaan a piang a ne uh hi.

¹³Jericho kiangah Joshua a tun ciangin a ettoh leh a mai ah namsau dawhsa tawi-a ding mi khat a mu hi. Joshua ama kiangah pai to-a, "Nang ko pawl maw, ka galte uh pawl?" ci-in a dong hi.

¹⁴Amah in, "Kuama pawl hi keng, TOPA’ galkap ukpa-a hong pai ka hi hi," ci-in a dawng hi. Tua ciangin Joshua a bia dingin a mailam leilakah boksuk-a, "Ka Topa c[12] in a nasempa ading bang thupuak nei ahi hiam?" ci-in a dong hi.

¹⁵TOPA’ galkap ukpa in, "Na dinna mun siangtho ahi manin na khedapte suahkhia in," ci-in a dawng hi. Joshua in a cih bangin a hih hi.