Read Zokam Joshua 7 Bible Online

Joshua 7 - Zokam bible

Joshua 7

¹Ahi hangin a ki-apsa nate a[15] ah Israel-te a muanhuai kei uh hi. Judah beh Zerah tapa Zimri’ b[16] tapa Carmi’ tapa Achan in tua nate pawlkhat a la hi. Tua ciangin Israel tungah TOPA hehna a kuang hi.

²Joshua in Jericho panin Bethel nisuahna-lam Beth Aven gei-a om Ai ah mi sawla amaute tungah, "Pai to unla tua kual sung teng va kansim un," a ci hi. Tua ciangin mite pai to uh a Ai a va kansim uh hi.

³Joshua kiangah amaute a kileh kik uh ciangin, "Ai sim dingin mi khempeuh kuantoh a kul kei ding hi. Tua khua la dingin mi tul nih ahikeh, tul thum bek kuansak lel in; mi tawmno bek om ahi manin mi khempeuh gimsak huai lo hi," a ci uh hi.

⁴Tua ciangin mi tul thum khawng kuan to uh a; ahi hangin Ai mite in amaute na delhkekin

⁵sawmthum le guk a that uh hi. Amaute in khuapi kongpi panin suangkhukte c[17] dong delh uh a muala tuahsuknate ah a that uh hi. Hih thu hangin Israel-te lungsim bei keii a, tuisik sat a bang uh hi.

⁶Tua ciangin Joshua in a puansilh balkek a, TOPA’ singkuangpi mai lei lakah khupbawhin nitak dong a om hi. Israel upate zong tuaci om uh a, a lutung uah leivui a theh uh hi.

⁷Tuateh Joshua in, "Ah, Thuneipen TOPA aw, kote hong susia ding, Amor-te khuta nong piak dingin bang hangin hih mite Jordan gal ah hong kahpihsak na hi hiam? Jordan galkhat mah ah na teng zaw le ung maw!

⁸Topa aw, Israel-te a galte un delhkek ta uh hi. Bang gen nawn ding ka hi hiam?

⁹Canaan-te le hih gam sunga om mite in hih thu za ding uh a, kote hong umin leitung pan ka min uh hong phiatsak ding uh hi. Tua ciangin a lian mahmah nangma min bang lawh ding na hi hiam?" a ci hi.

¹⁰TOPA in Joshua tungah, "Dingto in! Bang hangin khupbawh niloh na hi hiam?

¹¹Israel mawh khin ta hi; amaute zuih dinga ka thupiak ahi ka thukhun a palsat uh hi. Amaute in a ki-apsa nate pawlkhat a la uh hi; amaute in gu uh a, zuauphuakin amau neihsate lakah a koih uh hi.

¹²Tua hangin Israel-te in a galte uh nang zo lo uh a; amaute lehngatin a tai uh hi, bang hang hiam cih leh amaute in siat theih nading a bawl khin uh hi. Note lakah siatna sunga a ki-apsa peuhmah na suksiat phot kei uh leh note tawh ka omkhawm nawn kei ding hi.

¹³"Pai inla mipite siansuah in. TOPA Israel Pasian in ‘Israel aw, note lakah a ki-apsa na om hi. Na paihkhiat matengin na galte uh langah na ding thei kei ding uh hi,’ ci ahi manin zingciang adingin no le no kisiansuah ciat un," ci in.

¹⁴"‘Zingciang zingsangin, a bawng’bawng’in hong om kim ciat un. TOPA in a lak beh panin a bawng’bawng’in a mai-ah hong kipaisak dinga, TOPA in a lak bawng’te a inn kuankuanin a mai ah hong kipaisak in, TOPA in a lak innkuante a mimi-in a maiah hong kipaisak ding hi.

¹⁵A ki-apsa na tawh a kiman khawmpa, ama kinaipih khempeuh tawh mei-in kisusia ding hi. Amah in TOPA’ thukhun palsatin Israel a maimawlsak zo hi!’ ci in," a ci hi.

¹⁶A zingciang zingsang tungin Joshua in Israel-te a behbeh in a mai ah paisak a Judah a kiman hi.

¹⁷Judah bawng’te a mai-ah paikhia a Zerah-te a kiman hi. Zerah bawng’te a mai-ah a innkuankuanin paisak a Zimri a kiman hi.

¹⁸Joshua in ama innkuanpihte a mimalin a mai-ah paisak a Judah beh a Zerah tapa Zimri’ tapa Carmi’ tapa Achan a kiman hi.

¹⁹Tua ciangin Joshua in Achan kiangah, "Ka tapa aw, Israel Pasian TOPA d[18] minthangsak inla, amah phatna puak in e[19]. Na hihsa hong gen in; kei tungah hong im kei in," a ci hi.

²⁰Achan in, "Thumaan hi! TOPA, Israel Pasian tungah ka mawh khin hi. Ka hihsa hih ahi hi:

²¹Van lakte lakah Babylon f[20] puan melhoih khat le ngun shekel g[21] zanih tawh, shekel h[22] sawmnga a khai kham tawn khat tawh ka muh ciangin iplah lua-in ka la mah hi. Tuate ka puanbuk sung leilakah ngun nuainunin ka sel hi," ci-in a dawng hi.

²²Tua ciangin Joshua in sawltakte sawlin, amaute puanbuk ah va tai uh a, tua lai-a puanbuk sungah ngun nuainungsakin a na kisel takpi hi.

²³Amaute in puanbuk sung panin nate lakhia uh a, Joshua le Israel khempeuh kiangah puakin TOPA mai-ah a phalh uh hi.

²⁴Tua ciangin Joshua le Israel khempeuh in Zerah’ tapa Achan, a ngun, a puan, a kham tawn, a tanute, a tapate, a bawnghonte, a laate le a tuute, a puanbuk le a neih khempeuh, Achor Kuam ah a paipih uh hi.

²⁵Joshua in, "Bang hangin i tungah hih siatna hong tun zenzen na hi hiam? TOPA in tuni-in nang tungah siatna hong tungsak ding hi," a ci hi. Tua ciangin Israel khempeuh in amah suangin deng uh a, a om lai teng a denlup khit uh ciangin amaute a hal uh hi.

²⁶Achan tungah suangtum tampitak kiciang venvan a tuni dongin a omlai hi. Tua ciangin TOPA hehluatna a dam hi. Tua ahi ciangin tu dongin tua mun Achor i[23] Kuam kici hi.