Read Zokam Joshua 8 Bible Online

Joshua 8 - Zokam bible

Joshua 8

¹Tua ciangin TOPA in Joshua kiangah, "Lau kei in; zong lungkia kei in. Galkap buppi kuanpih inla paito in Ai va sim un. Na khut sungah Ai kumpipa, a mite, a khuapi le a gam kong pia khin hi.

²A van nusiatte uh le ganhonte na laksak theih ding longal uh Jericho le a kumpipa tunga na hih bangun Ai le a kumpipa tungah na hih ding uh hi. Khuapi nungah a buksimte pangsak in," a ci hi.

³Tua ciangin Joshua le galkap buppi Ai sim dingin a kuankhia uh hi. Amah in galsim a siampente tul sawmthum teelkhia a zanin kuansak a

⁴hih bangin thu a pia hi: "Limtakin na ngai un. Khuapi nunglam mun khatah na buksim ding uh hi. Khuapi tawh a kigamla lua ah pai kei un. Na vekun a kigingsa-in om den un.

⁵Kei le kei tawh a omlai khempeuh in khuapi manawhin kongkuan ding uh a, a masa a bangin kote do dingin mite hong kuankhiat uh ciangin ko ka na tai ding uh hi.

⁶Amaute ko hong delhin khuapi pan a taikhiat khit mateng uh ka na nung kik ding uh hi; tua hileh amaute in, ‘A masa-a bangin ei hong lelin a tai uh hi,’ ci ding uh hi. Tuaci-a amaute mai pan ka tai uh ciangin,

⁷na buksimna panun no hong paikhia-in khuapi nong la ding uh hi. TOPA note Pasian in note khut sungah hong pia ding hi.

⁸Khuapi na lak khit uh ciangin mei-in hal un. TOPA thupiaksa bangin hih un. Thu kong pia khin hi; na hih ding uh thei un," a ci hi.

⁹Tua ciangin Joshua in amaute kuankhiasak a, amaute pai-in Ai nitumna lam, Bethel le Ai kikala a buksim nading uh mun zuanin tua lai-ah a ngak uh hi - ahi hangin tua zanin mipite omna ah Joshua a giak lai hi.

¹⁰A zing ciang zingtungin Joshua in a mite kikhawmsak a, amah le Israel makaite masa in Ai lam manawh in a kuan uh hi.

¹¹Amah tawh a omkhawm galkap khempeuh khuapi lam manawhin kuankhia uh a, khuapi mai a tung uh hi. Amaute in Ai leilu-lam ah giahphual sat uh a; amau le khuapi kikal ah guam khat a om hi.

¹²Joshua in mi tulnga bang sehkhia a khuapi nitumna-lam Ai le Bethel kikalah a buksimsak hi.

¹³Amaute in giahphuala galkapte khempeuh - khuapi leilu-lam le khuapi nitumna lam amau mun ding ciatah a pangsak uh hi. Tua zanin Joshua kuam sungah a pai hi.

¹⁴Ai kumpipa in hih banga kihih a muh ciangin amah le a khuapi mi khempeuh Israel do dingin Arabah kimuh sukna mun khatah zingsang tungin a kuankhia uh hi. Ahi hangin khuapi nunglam ah amah buksim ding a ki-omsak lam a thei kei hi.

¹⁵Joshua le Israel khempeuh kilelsakin amaute mai-ah lehtai uh a, sehnel gam lam a manawh uh hi.

¹⁶Amaute nungdelh dingin Ai mi khempeuh kisam uh a Joshua nungdelhin khuapi panin mi khemsa in a taikhia khin uh hi.

¹⁷Israel-te delhin a kuan lo Ai le Bethel ah pasal khat beek a om kei hi. Israel delh in kuankhia khin uh a, a khuapi uh honsa in a nusia uh hi.

¹⁸Tua ciangin TOPA in Joshua kiangah, "No tungah khuapi hong pia ta ding ka hi manin na khut sunga teipi Ai lam ngatin zan in," a ci hi. Tua ciangin Joshua in a teilot Ai lam a ngat hi.

¹⁹A teilot khuapi lam a ngat phetin a buksimte a omna panun diangkhiapah uh a mailam a nawt henhan uh hi. Khuapi ah lutin la uh a mei-in a hal pah uh hi.

²⁰Ai mite in leh-et uh a khuapi kangkhu van lamah kitung to a muh uh hangin sehnel-gam lam manawha tai Israel-te amau a delhte lamah kihei uh ahi manin lam khat peuhpeuh ah suahtak theih nading hun a nei kei uh hi.

²¹A buksim pawlte in khuapi lakhin uh a, khuapi kangkhu Joshua le Israel khempeuh in a muh uh ciangin kileh hei-in Ai mite a do uh hi.

²²Israel-te alang tuakah pangin amaute a laizangah a mat theih nadingun a buksim pawlte zong khuapi pan a kuankhia uh hi. Israel in amaute khat beek hawi loin that khin a khahsuah zong a nei kei uh hi.

²³Ahi hangin Ai kumpipa hingmat uh a Joshua kiangah a puak uh hi.

²⁴Israel in lopaang le sehnel gama amaute a delh Ai mite khempeuh thatin namsau-in a thah siang khit uh ciangin Israel-te khempeuh Ai ah kileh kik uh a khua sunga om khempeuh a that siang uh hi.

²⁵Tua ni-a a si Ai mite numei pasal a vekpi-in tul sawm le nih a pha hi.

²⁶Ahang in, Joshua in Ai sunga teng khempeuh a kisiat a[24] khit mateng a teilot a letna khut a dok kik kei hi.

²⁷Ahi hangin TOPA in Joshua a lam-lahsa bangin Israel in van kinusiate le ganhingte a puakhia uh hi.

²⁸Tua ciangin Joshua in Ai haltum a, tuni dongin vansia kholna suakin kuama tenlohna mun a suak hi.

²⁹Ai kumpipa sing tungah khai-a, nitak dong tua lai-ah a kinusia hi. Nitum ciangin Joshua in singtung pan a luang lakhiasak a, khuapi lutna kongpi ah a paisuksak hi. Amaute in a tungah suangtum tampi ciang uh a tuni dong a omlai hi.

³⁰Tua ciangin TOPA nasempa Moses in Israel-te a thupiaksa bangin

³¹Joshua in Ebal Vum ah TOPA Israel Pasian adingin biakna-tau khat a dawh hi. Amah in Moses Laibu sunga kigelhsa tawh kizui-in - sik vanzat khatpeuh zanga kisek lo, suangtum omsate in a dawh hi. Amaute in tua tungah meihal biakna le kilawmtakna biakna b[25]TOPA a pia uh hi.

³²Tua lai-ah Joshua in Moses gelhsa thukham, Israel-te muhin suang tungah a teikhia hi.

³³Israel khempeuh - pemtate hitaleh tualsuakte hitaleh a kibangin a upate uh, a uliante uh le a thukhente uh tawh TOPA thukhun singkuangpi a pua Levi siampite maingatin a singkuangpi lang tuakah a ding uh hi. TOPA nasempa Moses in, Israel mite thupha a kipiak ciangin hih dinga lamlahna a piaksa bangin mipi alang in Gerizim Vum maingat uh a alangte in Ebal vum lam maingatin a ding uh hi.

³⁴Tua khit ciangin Joshua in Thukham Laibu sunga om - thuphate le hamsiatnate a kammal om khempeuh a om bang tektekin a sim hi.

³⁵Moses thupiaksa kammal khempeuh, Israel mihon buppi - numei, naupang le amaute laka teng pemtate khempeuh tungah Joshua in a sim loh mal khat zong a om kei hi.