Read Zokam 2 Thesalonica-te 1 Bible Online

2 Thesalonica-te 1 - Zokam bible

2 Thesalonica-te 1

¹Paul, Silas a[1] le Timothy in, Eite Pa Pasian le Topa Jesu Christ sunga om Thessalonica pawlpi tungah:

²Pa Pasian le Topa Jesu Christ tung pana hehpihna le lemna note tungah om ta hen.

³Note hangin Pasian tungah lungdam ka koh den ding uh kilawm hi. Sanggamte aw, amantakpi mah ahi hi, bang hang hiam cih leh na upna uh khangto semsem a, note khempeuh khat le khat na ki-itna uh a khangkhang hi.

⁴Tua ahi manin bawlsiatnate le zia-etnate na thuakna uhah na sikdona uh le na upna uh Pasian pawlpite lakah ka kisialhpih uh hi.

⁵Hihte khempeuh Pasian thukhenna man hi, cih a kilatna hi-a hih thu tawh kizui-in Pasian-gam adinga a santham ding na hina uh hanga a thuak na hi uh hi.

⁶Pasian thutang hi; no hong buaisakte amah in buaisak dinga,

⁷hong kibuaisak note buaina hong vengsakin, kote aa zong hong vengsak ding hi. Topa Jesu ama vansawltak vangliante tawh vantung pan meikuang tawh hong kilat ciangin hih thu a piang ding hi.

⁸Amah in Pasian a thei lote le i Topa Jesu lungdamna-thu a mang lote a gawt ding hi.

⁹Topa ompihna pan le a vangliatna thupina panin amaute kikhenkhia dinga, tawntung siatna-in kigawt ding hi.

¹⁰Amah hong pai ni-in a misiangthote sungah kiminthangsak dinga amah a um mite khempeuh lakah piandang a kisa ding hi. Note kianga ka teci panna uh na upna un note zong a umte lakah hong kihelsak hi.

¹¹Hihte khempeuh phawk kawmin i Pasian in hong sapna tawh kilawm hong sak theih nading le na tup uh a hoih peuhmah le na upna uh hanga piang nasep khempeuh, ama vangliatna tawh a tangtunsak nadingin note ading thu ka ngen niloh uh hi.

¹²Eite Pasian le Topa Jesu Christ b[2] hehpihna tawh kizui-in, note sungah i Topa Jesu min a kithansak nading le ama sungah note hong min thansak nadingin hih bangin thu ka ngen uh hi.