Read Zokam 2 Thesalonica-te 2 Bible Online

2 Thesalonica-te 2 - Zokam bible

2 Thesalonica-te 2

¹Sanggamte aw, i Topa Jesu Christ hong pai nading le ama kianga eite hong khop nading tawh kisai-in

²Topa ni hong tung khin zo hi, ci-a a kigenkholhna pawlkhat ahi zongin, thu kigensawn ahikeh ko kiang pan hi a kici laikhakte hang ahi zongin, na linglawng, na patauh loh nadingun kong thum hi.

³Lam khat peuhpeuh ah kuamah na kikhemsak kei un, ahang in, lehdona piangin, siatna-a kisehsa thukham palsatna c[3] mipa hong kilak mateng in tua ni hong tung lo ding hi.

⁴Amah in Pasian a kici na khempeuh ahikeh a kibia khempeuh langdo dinga, Pasian biakinnpi sungah kikoihin, amah le amah kitawisangin amah le amah Pasian kici-in a kitangko hi.

⁵Note tawh i omkhawm lai-a kong gen zel hih thute phawk nawn lo na hi uh hiam?

⁶A hun liana, a kilaak theih nadingin amah bang in dal hiam, cih tu-in na thei uh hi.

⁷Ahang in, thukham neihlohna in a simtham-a a neih vangliatna in a nasep pan zo hi; ahi hangin tu-a amah a dalpa a kilakkhiat masiah amah in tua bangin a kham lailai ding hi.

⁸Tua tak ciangin thukham nei lo pa hong kilang dinga, Topa Jesu in a kam pana a hu tawh amah zothal-in ama hong paina a thupina in amah a susia ding hi.

⁹Thukham nei lo pa hong paina ahileh nalamdang, lim le a lamdang khemte tawh a kilak Satan nasepna tawh kizui hi-a,

¹⁰a mangthang dingte a khem gitlohna namkimin hong pai ding hi. Amaute in thutak it ding le a kihotkhiat ding a nial manun a mangthang uh hi.

¹¹Hih thu hangin amaute in zuauthu a up nadingun Pasian in a vanglian lam pialsakna a puak hi,

¹²tua in, thutak um lo a, gitlohna nuam a sate khempeuh a mawhpaih nading ahi hi.

¹³Ahi hangin Topa in hong it sanggamte aw, a cilin Pasian in Kha siansuahna nasepna tungtawn le thutak upna tungtawna hotkhiat nadingin note hong teel a[4] manin Pasian tungah lungdam ka koh den ding mah uh ahi hi.

¹⁴I Topa Jesu Christ minthanna na ngah theih nadingun amah in note, hih ka gen uh lungdamna-thu tungtawnin hong sam zo hi.

¹⁵Tua ahitak ciangin sanggamte aw, kammal tawh ahi zongin, laikhak tawh ahi zongin no tunga kong puaksawn uh thuhilhnate b[5] lenin kiptakin ding un.

¹⁶Eite hong itin ama hehpihna hanga tawntung hanthawnna le lametna pha hong pia i Topa Jesu Christ mahmah le i Pa Pasian in,

¹⁷na lungtang uh hong hanthawnin a hoih na gamtatnate uh le a hoih na pauna tenguhah hong tha khauhsak ta hen.