Read Zokam 1 Timothy 1 Bible Online

1 Timothy 1 - Zokam bible

1 Timothy 1

¹Eite Honpa Pasian le i lamet Christ Jesu thupiakna hangin Christ Jesu sawktakpi keimah Paul in,

²Upna sunga ka tapa taktak Timothy tungah: Pa Pasian le i Topa Christ Jesu tung pana hehpihna, lainatna le lemna om ta hen.

³Macedonia ah ka pai lai-a kong kut bangin Ephesus mah ah na tam lai in. Tua pen mi pawlkhat in thu upna maan lo hilh nawn lo a,

⁴tangthu phuahtawm le a bei thei lo khang ciamtehna peuh kana, a kipumpiak nawn loh nadingun thu na piak theih nading ahi hi. Hihte in upna hanga piang Pasian nasepna sangin kinialna a piangsak zaw hi.

⁵Hih thupiakna ngim kung in, lungsim siangtho, eima kitheihna hoih le upna taktak pana piang itna ahi hi.

⁶Mi pawlkhatte, hihte panin gamlapi gam mang zo uh a, a khiatna nei lo holimna ah a pial uh hi.

⁷Thukham sia suak nuam uh a, ahi hangin a thugen uh a theih loh banuah hi taktak sa-a, kipsana a gente uh zong bang hiam cih a thei kei uh hi.

⁸Mi khat in thukham ahi banga a zat nak leh hoih hi, cih i thei hi.

⁹Eite theihna ah thukhama pen mi hoihte adinga kibawl hi loin; thukham a[1] palsatte, a langdote, a pasian-milote le mawhdimte, a siangtho lote le biakna nei lote; a nu a pa a thatte, tualthatte,

¹⁰angkawmte le a lehtatte, sila zuaka summet bawlte le zuautheite, zuauthu-a a kiciamte le thu-up maantak tawh kilehbulh peuhmahte adinga kibawl hizaw a,

¹¹tua thu-up maantak pen, amah in kei hong kepsak thupha Pasian aa ahi, a minthang lungdamna-thu tawh kituak ahi hi.

¹²Muanhuai hong sa a, ama nasem dinga hong koih, tha hong guan i Topa Christ Jesu tungah ka lungdam hi.

¹³Khatvei lai-in Pasian daisakpa, mi bawlsiapa, a ngongtatpa ka hi napi in, theihlah man le uplah mana gamta ka hi manin lainatna kei hong kipia hi.

¹⁴Christ Jesu sunga om upna le itna zui-in i Topa hehpihna a dimletin kei tungah hong kisungkhia hi.

¹⁵Hih lai-ah a bupa santham thugen muanhuai khat om a, tua in: mawhneite hon dingin Christ Jesu leitungah hong pai hi, ci hi. Tua mawhneite lakah kei a sia pen ka hi hi.

¹⁶Ahi hangin tua thu hang tektekin Christ Jesu in, amah um a, nuntak tawntungna a sang dingte etteh dingin mawhneite khempeuh laka a sia pen keima tungah a bei thei lo ama lungduaina a latsak theih nadingin lainatna kei hong kilak zo hi.

¹⁷Tu-in tawntung Kumpipa, a si thei lo, a kimu thei lo, amah bek Pasian tungah, a tawntungin pahtawina le minthanna om den ta hen.

¹⁸Ka tapa Timothy aw, nang thu tawh kisai, khatvei lai-a genkholhnate tawh kituakin hih lamlahnate kong pia hi. Tua lamlahnate zui-a, upna le lungsim kitheihna hoih lenin galdona hoih na do theih nading ahi hi.

¹⁹Mi pawlkhat in hihte nolh uh a, a upna uh a siasak ngi-ingei uh hi.

²⁰Amaute lakah, Pasian a gendai loh nadingun a kihilh dinga Satan tunga ka ap Hymenaeus le Alexander zong a kihel uh hi.