Read Zokam 1 Timothy 3 Bible Online

1 Timothy 3 - Zokam bible

1 Timothy 3

¹Hih lai-ah thugen muantak khat a om hi: Mi khatpeuh in pawlpi kem c[4] suah ding a ut leh nasep thupi sem nuam ahi hi.

²Pawlpi kem ahileh: ngawh bei, zi khat bek a nei, a kidaam thei, amah ki-uk zo, a zahtak baang, zindo a siam, a hilh thei,

³lenggahzu a kham lo, a ngongtat lo, a lungnem, kitot a hat lo, sum iplah lo hi pelmawh ding hi.

⁴Ama innkuan sung ukzo a a tate in zahtakna takpi tawh a thu a mante hi pelmawh ding hi.

⁵(Mi khatpeuh in ama innkuan sung a uk nading zia a theih kei leh Pasian pawlpi bangci kep thei ding ahi hiam?)

⁶A piangthak tung hi lo ding hi. Tua hi kei leh kimisak dinga, dawimangpa thuak bang thukhenna a thuak kha ding hi.

⁷A maimawl loh nading le dawimangpa thanga a awk loh nadingin pualam mite in hoihtaka a zahtak hi pelmawh ding hi.

⁸Tua mah bangin pawlpi upate zong, zahtak a baang mi, a thutak, lenggahzu a hai lo, a maan lo metna a zong lo mi hi ding hi.

⁹Amaute lungsim kitheihna siangtak tawh a thuk upna thutakte a lenkipte hi pelmawh ding hi.

¹⁰A pel loin amaute kizia-et masa dinga, paubaanna a om kei leh upa kisemsak pan ding hi.

¹¹Tua mah tawh kibangin a zite d[5] uh zong zahtak a baang numei hi dinga, migensiat hat loin na khempeuh a kidaam thei, a muantak mi hi ding hi.

¹²Pawlpi upate, zi khat bek a nei hi pelmawh ding a, ama innkuan sung le a tate hoihtaka a uk zo hi pelmawh ding hi.

¹³Limtaka na a semte in ama ading a hoih pen mun le Christ Jesu sunga a upna uh kitelcianna lianpi a ngah uh hi.

¹⁴No kianga kong paipah ding ka lamet hi napi, hih lamlahnate kong gelh hi.

¹⁵Kong ziakai khak leh Pasian innkuan sunga mite in amau le amau bangci gamtat ding cih na theih nading uh ka deihna ahi hi. Tua Pasian innkuan, a nungta Pasian pawlpi hi-a thutak khuampi le bulkip ahi hi.

¹⁶A lian mahmah nial nading a om lo pasian-mina thuthuk ahi: Amah e[6] pumpi-in f[7] hong kilang a, Kha in dik tangsakin vantung mite in mu uh a, minamte lakah a thu kihilhin leitungah ki-um a, minthanna tawh kilato hi.