Read Zokam 1 Timothy 6 Bible Online

1 Timothy 6 - Zokam bible

1 Timothy 6

¹Pasian min le eite hilhna a kigen siat loh nadingin sila hakkol nuai-a omte khempeuh in, a pute uh na khempeuh ah a zahtak tham cingin ngaihsun uh hen.

²Thu um mi pu-a, a neite in zong, amaute sanggamta ahi uh zongin zahtak lo tuan kei hen. Tua sangsikin, amaute nasepna hanga hamphatna a ngahte in, thu-umte le amau a itte ahi manin a na uh a hoihzaw a, a sepsak ding uh hizaw hi. Hihte na hilh ding le amaute tunga na kut ding ahi hi.

³Mi khatpeuh in thu-upna maan lo hilh a, i Topa Jesu Christ lamlahna bucing le Pasian thu lama hilhna a lungkim kei leh,

⁴amah a kimisak hi a, bangmah a theitel lo ahi hi. Amah in kikalhna leh kiselna ah ukna maan lo a nei hi a, tuate in enna, kitotna, kigensiatna, a hoih lo lama kimuanmawhnate,

⁵le lungsim sia mite kikalah kinawt ngitngetna a piangsak hi; amah thutak paii lo le pasian-mina, summet bawl nading beka a ngaihsun pa ahi hi.

⁶Ahi hangin lungkimtaka pasian-mina in metna lianpi ahi hi.

⁷Ahang in, eite in leitung ah bangmah i keng kei a, bangmah i puakhia thei kei hi.

⁸Ahi hangin annek ding le puansilh ding i neih nak leh tua tawh i lungkim ding ahi hi.

⁹Ahau nuam mite ahileh khemna le thang, a haihuai le a nasak thei lunggulh-luatnate hangin siatna le manthanna sungah a puk uh hi.

¹⁰Ahang in, sum itna in siatna namkim bulpi ahi hi. Mi kimkhatte in sum deih lua-in tua upna pan pialkhia uh a, dahna tampi-in amau le amau a kisunlet uh hi.

¹¹Ahi hangin nang Pasian mipa aw, hihte khempeuh taisan inla, thumaanna, pasian-mina, upna, itna, sikdona le lungnemna na delh in.

¹²Upna galdona hoih na do in. Hong theihpih tampite mai-ah kipulakna hoih na neihsa, hong sapna, tua nuntak tawntungna limtakin lenkip in.

¹³Na khempeuh tungah nun takna a pia pa Pasian le Pontius Pilate mai-a pulakna hoih a pulak Christ Jesu mitmuh in:

¹⁴Topa Jesu Christ hong kilat ni matengin a melhemna omlo, a kawk baang loin hih thupiakte na kep ding kong suan hi.

¹⁵Tua hun pen Pasian thupha ngah amah bek Ukpa, kumpite’ Kumpi, tote’ Topa in ama hun lianin hong piangsak ding hi;

¹⁶amah bek a si thei lo, a kineh thei lo khuavak sunga nungtapa, kuama muh ngei loh le a muh theih loh pa ahi hi. Ama tungah pahtawina le thahatna om tawntung ta hen. Amen.

¹⁷Tu huna hih leitung sumhaute kiang ah, a ki-uatsak loh nading uh le a kician lo hauhna muang lo a, eite i lungnop nadingin na khempeuh kicingtaka hong piapa Pasian, a muan zawk nadingun thu pia in.

¹⁸A hoih semin, gamtat hoih tampi a gamtat nading uh le cingh in mi a hop nop nadingun thu pia in.

¹⁹Amaute in nuntakna taktak a letkip theih nadingun hong tung ding khanghun ah bulkip ahi dingin hih bangin gou a khol ding uh hi.

²⁰Timothy aw, na kep dinga hong kipia, limtakin cing in. Pasian nei lo thu mawk genna le a maan lopi-a theihna a kici, ngaihsutna kituak lote kiheimang san in.

²¹Mi pawlkhatte tua bang nei a kicih hangun upna panin a pialmang uh hi. Hehpihna nang tawh om ta hen.