Read Zokam 2 Timothy 1 Bible Online

2 Timothy 1 - Zokam bible

2 Timothy 1

¹Christ Jesu sunga om nuntakna kamciamsa tawh kizui-a Pasian deihna hanga Christ Jesu sawltakpi Paul in.

²Ka tapa it Timothy tungah: Pa Pasian le i Topa Christ Jesu tung pana hehpihna, lainatna le lemna om ta hen.

³Ka thungetnate ah sun le zanin nang kong phawk tawntung a, ka pu ka pa-te hihsa bangin lungsim kitheihna siang tawh a na ka sep Pasian tungah lungdam ka ko hi.

⁴Lungnopna tawh ka kidim theih nadingin na khituite phawk kikin nang kong muh ding ka lunggulh mahmah hi.

⁵Na up taktakna ka phawka, tua thu-upna, na pi Lois sungah nungta masa-in, tua khitteh na nu Eunic sungah nungta a, tu-in nang sungah zong nungta hi cih teltakin ka taksang hi.

⁶Hih thu hangin nang tunga ka khut kong ngakna tungtawna, nang sunga om Pasian letsong pen na zapkuang den ding kong phawksak kik hi.

⁷Ahang in, Pasian in eite, zahkaina kha hong pia loin, vangliatna, itna le ei le ei ki-ukzawhna kha hong piazaw hi.

⁸Tua ahi ciangin i Topa thu na genkhiat ding maizum kei inla, ama thongkia ka hina zong maizumpih tuan kei in. Ahi hangin Pasian vangliatna tawh lungdamna-thu hanga ka thuak, hong thuakpih in.

⁹Eite sepsa khatpeuh hang hi loin ama ngimna le hehpihna hangin hong honkhia a, nuntakna siangtho-a nungta dingin hong sam hi. Hun kipat ma-in hih hehpihna Christ Jesu sungah eite hong kipia zo hi.

¹⁰Ahi hangin tua hehpihna, eite’ Honpa Christ Jesu hong kilatna tungtawnin tu-in hong kilaakkhia hi. Amah in sihna susia a, lungdamna-thu tung tawnin nuntakna le sih theihlohna hong puak hi.

¹¹Tua hi-a hih lungdamna-thu tawh kisai-in a tangkopa sawltakpipa le siapa dingin kei hong kiseh hi.

¹²Tua thu hangin hih banga a thuak ka hi hi. Tua hi napi ka maizum kei hi; bang hang hiam cih leh ken ka up pa ka thei a, amah ka kepsakte tua ni adingin kem zo ding cih teltakin ka thei hi.

¹³Kei tung pana na zaksate, Christ Jesu sunga om upna le itna tawh, hilhna kician lahna-in lenkip in.

¹⁴Nang hong kikemsak na hoih kemin, eite sunga teng a Khasiangtho huhna tawh na cing in.

¹⁵Phygelus le Hermogenes-te zong kihel in, Asia gama omte khempeuh in kei hong taihsat lam na thei hi.

¹⁶Topa in Onesiphorus-te innkuan tungah a lainatna na lak ta hen. Bang hang hiam cih leh amah in ka kolbulh maizumpih loin thathak hong ngahsak ngitnget hi.

¹⁷Hong maizumpih gen loh Rome ah a om lai-in kei hong muh matengin haksapi in hong zong hi.

¹⁸Tua ni teh Topa kiang pana lainatna mu dingin Topa in seh ta hen! Amah in Ephesus ah lam tampi in kei hong huh lam teltakin na thei hi.