Read Zokam 2 Timothy 2 Bible Online

2 Timothy 2 - Zokam bible

2 Timothy 2

¹Tua ahi ciangin nang ka tapa aw, Christ Jesu sunga om hehpihna hangin thahat in.

²Teci mi tampi mai-ah ka gen na zaksa nate midangte zong a hilh thei dinga a cin, a muanhuai mite na kemsak in.

³Christ Jesu galkap hoih bangin haksatna kote hong thuakpih in.

⁴Galkap nasem mi kuamah in tangpi vai vasaipih loin amah a makaih mangpa a lungkimsak nuam hi.

⁵Tua mah tawh kibangin kidemna sunga kihel mi khat peuh in kidemna ngeinate zui a, a dem kei leh a gualzote ngah lukhu a ngah kei hi.

⁶Hahkattaka nasem, lokhopa in a gahte tang masa pen hi.

⁷Topa in hihte khempeuh a sungthu hong theisak ding ahi manin, kong thugen ngaihsun kik in.

⁸David suan le khak misi pana a kithosak Jesu Christ phawk gige in.

⁹Tualthat mawhna a nei khat banga kolbulhna ciang dong ka thuakna hih ka lungdamna-thu hang mah ahi hi. Ahi hangin Pasian thu kol a kibulh kei hi.

¹⁰Tua ahi manin Christ Jesu sunga om hot khiatna a tawntung minthanna tawh a ngah khawm nadingun tua a teelsate hangin na khempeuh ka thuak hi.

¹¹Hih lai-ah a muantak thugen khat a om hi: Amah tawh i sih khawm leh, amah tawh i nungta khawm ding hi;

¹²eite in i thuak leh, amah tawh i uk khawm ding hi. Amah leh amah kinial thei lo ahi manin amah i nial leh, amah in zong eite hong nial ding hi;

¹³eite i muanhuai kei zongin, amah a muanhuai den ding hi, ahang in, amah le amah a kinial thei kei hi.

¹⁴Hih thute amaute phawksak kik den in. Thumalte peuh tawh kisai-a a kitot loh nadingun Pasian mai-ah amaute vauhilh in; tua in kimanna nei loin a ngai mite a siasak bek hi.

¹⁵Maizumna om lo thutak thu diktakin a zang a santak nasempa bangin, Pasian tunga na kipiak theih nadingin na hih theih tawpin hih in.

¹⁶Pasian thusimlohna, thu mawk gengen nate pel in. Bang hang hiam cih leh tua bang thu-a a uangte a pasian-mi kei semsem ding hi.

¹⁷Amau thuhilhna, a banmuat meima bangin kizel hi. Amaute lakah Hymenaeus le Philetus,

¹⁸thutak pana pialmangte kihel uh hi. Amaute in, "Thawhkikna tung khin ta hi," ci uh a, pawlkhatte upna a siasak uh hi.

¹⁹Ahi zongin Pasian bulkippi kiptakin dinga, "Topa in ama aate a thei hi," a[1] cih le "Topa min a pulakte peuhmah in tatsiatna a taisan pelmawh ding uh hi," ci-a kigelh tawh a tungah kiciamteh hi.

²⁰Inn lianpi sungah ngun le kham tawh kibawl nate bek om lo a, sing le bellei tawh kibawl zong a om hi; pawlkhat a zatna thupi a, pawlkhatte a gina kei hi.

²¹Tua a nunung pen pana mi khat amah le amah a kisiansak leh a zatna a thupi-a vanzat siangtho suaka, a Pu adingin kimanna a nei na hoih peuhpeuh sem dinga kimang thei a suak hi.

²²Khangno gitloh lunggulhnate taisan inla, lungsim singtho-a Topa a sam mite tawh thumaanna, upna, itna le lemna na delh in.

²³A haihuai le thugina lo kiselnate in kitotna piangsak cih thei na hi manin tuate ah kikum kha kei in.

²⁴Topa nasemte kuamah tawh kitawng peuhmah lo ding uh hi; tua sangsikin mikim tungah migi-in, thu hilh thei dinga, zakdah hau lo ding hi.

²⁵Amah a langdote lungnemtakin lamlak pelmawh hen, Pasian in amaute kisiksakin kiheisak dinga thutak theihna ah a pi ding hi.

²⁶Tua ciangin khua hong phawk ding uh a, ama deihna bang sem dinga sal-a a khawi dawimangpa thang pan a suakta ding uh hi.