Read Zokam 2 Timothy 4 Bible Online

2 Timothy 4 - Zokam bible

2 Timothy 4

¹Pasian mai le misite le mihingte thukhen ding pa Christ Jesu mai-ah, hong kilat nading le a gam paulamin hih nasep kong guan hi:

²Thu hilh in; ahun ahi-a, ahun ahi kei zongin kigingsa-in om in; kuhkaltak le kidawm mahmah kawmin lam lakin, bawlpha in, tai-in, hanthawn in.

³Ahang in, mite in thu-up bucing a cimtak hun hong tung ding hi. Tua sangsikin, amaute lunggulhna tawh kituakin, a bil thakna uh tawh kituak, a zaknophuai lel thu a gen dingin amau kiangah sia tampitak a kaikhawm ding uh hi.

⁴Amaute in thutak lehngatsan ding uh a, phuahtawm tangthu lamah a nga ding uh hi.

⁵Ahi hangin nang na hileh bangmah peuhah pilvang inla, haksatna thuakin sawltak na sem inla, na Pasian nasepna ah na nasep khempeuh zo in.

⁶Ahang in, dawntheih-a biakna banga sun dingin a mansa in ka om a, ka pai hun hong tung zo hi.

⁷Galdona hoih do khin in, tai kidemna ka tai zo a, upna ka kemcing zo hi.

⁸Tu-in thumaana thukhenpa Topa in tua ni cinga kei hong piak ding thumaanna lukhu kei ading a om zo hi. Kei bek hong kipia loin ama kilat ding lawpa a ngakte khempeuh zong a pia ding hi.

⁹A manlang theithei-in ka kiangah hong pai dih in.

¹⁰Ahang in, Demas in hih leitung a it manin kei hong taisan a, Thessalonica ah a pai hi. Galatia ah Crescens pai zo a, Dalmatia ah Titus a pai hi.

¹¹Kei kiangah Luke bek a om hi. Mark hong zawn inla hong tonpih in. Bang hang hiam cih leh ka nasepna ah amah ka phattuampih mahmah hi.

¹²Ephesus ah Tychicus ka sawl hi.

¹³Nong pai ciangin Troas a Carpus kianga ka nusiat ka puantualpi le ka laizialte a diakdiak in ka savun laizialte hong puak in.

¹⁴Sum sungpa Alexander in nakpi in kei hong bawlsia hi. Ama hihsa tawh kituakin Topa in a thukkik ding hi.

¹⁵Amah in ka thupuak uh langdo lua mahmah ahi manin, nang zong kidawm mahmah in.

¹⁶Ka kihutna thu ka gen masak lai-in kuamah in kei hong panpih lo-a, a kuamahpeuh in hong taisan uh hi. Amaute kimawhsak kei ta hen.

¹⁷Ahi hangin ka gei-ah Topa dinga, kei tungtawnin Gentile-te khempeuh in tua thupuak a zak nadingun kicingtaka ka tangko theih nading tha hong guan hi. Tua hi-a, humpinelkai kam panin kei hong hukhia hi.

¹⁸Gitlohna tawh hong kisukna citeng panin Topa in kei hong hu dinga, ama vantung gamah bittakin hong tunpih ding hi. Ama tungah a tawntungin minthanna om den ta hen. Amen.

¹⁹Priscilla a[2] le Aquila le Onesiphorus-te innkuan na hopihsak in.

²⁰Korinth ah Erastus taam-a, Miletus ah Trophimus cinasa in ka nusia hi.

²¹Phalbi ma-in hih lai tun hong sawm teitei in. Eubulus in nang hong hopih a Pudens, Linus, Claudia le sanggamte khempeuh in zong hong hopih uh hi.

²²Topa in na kha hong ompih ta hen. Hehpihna in nang hong ompih ta hen.