Read Zokam Titus 3 Bible Online

Titus 3 - Zokam bible

Titus 3

¹Tua mite in gam-ukte le thuneite thu nial lo-a, a thu uh mangin, a hoih peuhpeuh sem dingin kiging kholin,

²kuamah gensia loin mi tawh kilemin, mi ading khualin mi khempeuh tungah kiniamkhiatna taktak a lah dingun phawksak kik in.

³Hun khat lai-in eite zong ahai, a thumang lo, mi khemsa le pumpi lung gulhna namkim le noptatna sila i hi hi. Gitlohna le hazatna tawh kidim in, mite muhdah le khat le khat kimuhdahna tawh i nungta hi.

⁴Ahi hangin eite Honpa Pasian migitna le itna hong kilat ciangin,

⁵amah in thu maana na i sep hang hi lo, ama lainatna hangin eite hong hon hi. Amah in eite suahkikna-a silsiangna le a Khasiangtho bawlphat thakna tungtawnin hong hon hi.

⁶Amah in eite Honpa Jesu Christ tung tawnin tua Kha Siangtho cingtakin eite tungah hong sungkhia hi.

⁷Tua pen ama hehpihna hanga diktansak, nuntak tawntungna lametna a nei gouluahte i suah theih nading ahi hi.

⁸Hih in a muantak thugen ahi hi: Pasian a muangte in a hoih peuhmah hih dinga, amau le amau a kipiak zawh nadingun hih thute na uang gen ding kong deih hi. Hihte in mi khempeuh adingin a hoih pen le a phatuam pen ahi hi.

⁹Ahi hangin a haihuai kikalhnate, khang tangthute, thukham thu a kiselnate le kitotnate peel in. Bang hang hiam cih leh hihte, phattuamna nei lo le a kimanna bei ahi hi.

¹⁰Pawl khen nuam mipa khatvei vauhilh inla, tua khitin a nihveina vauhilh lai in. Tua khit ciangin amah thudon nawn kei in.

¹¹Tua bang mite a tuampian le mawhdim hi-a, amah le amah kimawhpaih hi cih ciantakin na thei ding hi.

¹²Artemas ahikeh Tychicus no kiangah kong sawl phetin Nicopolis ah ka kiangah pai hong sawm teitei in. Bang hang hiam cih leh tua lai-ah phalbi sung va om dingin ka khentat khin hi.

¹³Tangdingpa Zenas le Apollos na huh theih bangbangun na huh unla, a kisap khempeuh uh na thei un.

¹⁴I mite mawk nuntak loin a nisim kisapnate uh a kisiktawm zawh nadingun na hoih sem dingin amau le amau a kipiak nadingun kisin pelmawh uh hen.

¹⁵Kei tawh a omkhawm teng in hong hopih kim uh hi. Upna sunga ei hong itte na hopihsak in. Hehpihna in note khempeuh hong ompih ta hen.