Read Zokam Hebrews 1 Bible Online

Hebrews 1 - Zokam bible

Hebrews 1

¹A beisa hunin Pasian in kamsangte tungtawnin i pu i pa-te tungah lam tuamtuamin thu na gen a,

²ahi hangin hih ni nunungte ah khuavannuai a bawlpa na khempeuh a luah dinga a sehpa, ama Tapa zangin eite tungah thu hong gen zo hi.

³Tua Tapa in Pasian ahina taktak a kilatkhiatna le a minthanna tankhiatna hi-a, ama kammal vangliatna tawh na khempeuh a lenkip hi. Mawhnate siansak nading a bawl khit ciangin vantung Thupina taklam ah a tu hi.

⁴Tua ahi ciangin vansawltakte sangin min thupi zawtham a luah mah bangin vansawltakte sangin a thupi zawtham hi.

⁵Ahang in, Pasian in vansawltakte kua kiangah, "Nang ka Tapa na hi hi; tu ni-in na Pa ka suak zo hi, a[1] " b[2] ci ngei ahi hiam? Ahikeh "Kei ama Pa ka hi dinga, amah ka Tapa ahi ding hi," c[3] ci-in gen ngei ahi hiam?

⁶Tua banah, Pasian in a ta masa pen leitungah hong paisak ciangin amah in, "Pasian vansawltakte khempeuh in amah bia uh hen," d[4] ci hi.

⁷Amah in vansawltakte a gen lai-in, "Amah in a vansawltakte huihte suaksakin, ama nasemte, meikuangte a suaksak hi," e[5] ci hi.

⁸Ahi hangin Tapa thu ah amah in, "Pasian aw, na kumpi tokhom, a tawntungin om den dinga, a kumpi-gam ukna sik ciangkhut, thumaanna hi ding hi.

⁹Thumaanna it-in, tatsiatna na mudah hi; tua ahi manin Pasian, na Pasian lungnopna sathau nilhna tawh na pawlte khempeuh sangin, nang hong tawisang zaw hi," f[6]

¹⁰Tua banah zong, "Topa aw, a tungin leitung bulpite na phut a, vantungte na khutin na bawl ahi hi.

¹¹Tuate a kisia ding uh a, nang na om den hi; tuate khempeuh puan bangin a patkhia ding uh hi.

¹²Puantualpi bangin tuate na zialkhia dinga, puansilh bangin kikheng ding hi. Ahi hangin nang na kikhel kei a, kumte a bei ngei kei hi," g[7] ci hi.

¹³Pasian in, vansawltakte kua tungah: "Na galte khempeuh na khepekte ngak nadinga ka bawl khit matengin ka taklam ah na tu-in," a[8] ci-in gen ngei ahi hiam?

¹⁴Vansawltakte khempeuh, hotkhiatna luah dingte nasem dinga, kisawl khate hi lo ahi hiam?