Read Zokam Hebrews 10 Bible Online

Hebrews 10 - Zokam bible

Hebrews 10

¹Thukham pen hong tung ding na hoihte liim bek hi-a a taktakte hi lo hi. Hih thu hangin thukham in kum khat khit kum khat a kipia kikkik biakpiaknate zangin, a bia dinga a kianga a va naihte a hoihkimsak thei ngei kei hi.

²Hoihkimsak thei hileh tua piaknate kitawpsak khin lo ding ahi hiam? Ahang in, a biate khatvei a kimangden siansaksa hi dinga amau mawhnate hangin mawh kisakna a nei nawn kei ding uh hi.

³Ahi hangin tua biakpiaknate kum sima mawhna phawksak kikna ahi hi,

⁴bang hang hiam cih leh bawngtalte le keelte sisan in mawhna a lakhiamang thei kei hi.

⁵Tua ahi manin Christ leitungah hong pai lai in: "Biakpiakna le biakna na lunggulh kei hi, ahi hangin kei ading pumpi khat nong bawlkholhsak zo hi.

⁶Meihal biakna le mawhna hanga biaknate in hong lungkimsak lo hi.

⁷Tua ciangin ken, ‘Kei hih lai-ah ka om hi laizial sungah kei thu a kigelh zo hi — Pasian aw, na deih bang a sem dingin kong pai hi,’ d[39] ka ci hi," a ci hi.

⁸Amah in a masa penin, "Biakpiaknate le biaknate, meihal biakna le mawhna hanga biaknate na lunggulh kei a, tuate tawh zong na lungkim tuan kei hi," (thukham in tuate bawl ding na kal napi) a ci hi.

⁹Tua ciangin amah in, "Kei hih lai-ah ka om hi, na deihna sem dingin kong pai hi," ci khin zo hi. A nihna a kipsak nadingin a masa pen a nawlkhin hi.

¹⁰Tua thuseh hangin khatvei-a manden dingin Jesu Christ pumpi-a biakpiakna tungtawnin eite hong kisiangthosak zo hi.

¹¹Siampi peuhmah in ni khat khit ni khat dingin ama biakna nasepte a sem hi; mawhnate a lakhiamang thei lo kithoihnate mah a pia kikkik hi.

¹²Ahi hangin hih siampipa in hun khempeuh ading mawhnate biakpiakna khat a piak khit ciangin Pasian taklamah a tu hi.

¹³Tua khit nungsang ama galte a khepek ngakna a kisuahsak ding a ngak hi;

¹⁴ahang in, a kisangthosak mite, khatvei biakpiakna tawh a tawntungin a hoihkimsak hi.

¹⁵Hih thu Khasiangtho in eite tungah teci a pang hi. A masa in,

¹⁶"Tua hun khit ciangin amaute tawh ka bawl ding, thukhun hih ahi hi, Topa in ci hi. Amaute lungtang sungah ka thukhamte ka koih dinga, amaute lungsim sungah tuate ka gelh ding hi," e[40] ci hi,

¹⁷Tua khit ciangin: "Amaute mawhnate le thukham palsat-a a gamtatnate uh ka phawk nawn kei ding hi," f[41] a cihbeh lai hi.

¹⁸Tua ahi ciangin hihte a kimaisak nasa mun ah mawhna hanga biakpiakna khat beek a om nawn peuhmah kei hi.

¹⁹Tua ahi manin sanggamte aw, Jesu sisan hangin Mun Siangtho Pen ah lut ding kimuanna i neih nungsang,

²⁰eite adingin tua puanzak kantanin a nungta le a thak lampi khat kihong zo a; tua pen ama pumpi ahi hi.

²¹Tua hi-a Pasian innkuan tungah eite in siampilian khat i neih nungsang,

²²eite lungsim kisuantakna panin i lungtangte thehsiangsa le i pumpi tuisiang tawh silsa in, upna hanga kitheihtelna kim tawh Pasian kiang zuan ni.

²³Eite hong kamciampa muanhuai ahi manin i sansa lametna hoihtakin lenkip ni.

²⁴Tua bangin eite khat le khat itna le gamtat hoih lama i kithanopsuah theih nadingin ngaihsun ni.

²⁵Pawlkhatte a kingeinaseh bang uh hi loin kikhop khawmna nusia kei ni. Ahi hangin, tua Ni in hong naih ta cih na theih bangun khat le khat kihanthawn semsem ni.

²⁶Thutak theihna i ngah nungin thei gegu pi mahin mawhna i bawl lai leh mawhnate biakpiak nading om nawn lo a,

²⁷ahi hangin thukhenna le Pasian galte a valhtum ding meikuang zuahzuah a lauhuai lametna bek a om lai hi.

²⁸Moses thukham a nial peuhmah teci nih hiam, thum hiam om nak leh lainatna om loin a si hi.

²⁹Amah a siangsak thukhun sisan, a siangtho lo na bangin simmawh a, hehpihna Kha engko-in, Pasian Tapa a khenuai-a a tuancil mi, bangzah ta-a, a nasiazaw-in gawttakin na ngaihsun hiam?

³⁰Ahang in, "Phulakna kei aa hi-a, ken ka thuk ding hi," a[42] cih le "Topa in a mite thu a khen ding hi," b[43] a ci kik pa i thei hi.

³¹A nungta Pasian khut sunga puk ding mulkimhuai mahmah hi.

³²Note in khuavak na ngah khit nungua haksatna mai-ah panmun la a, nasiataka na do lai uh ni masate phawk un.

³³Khat veivei note, mi tampi mai-ah engko ding le bawlsiat dingin hong kipholaka, a hun dangte ah a kibawlsiate tawh na ding khawm uh hi.

³⁴Thong sunga kiate na khasiat uh a, na neih na lamte uh hong laksakna uh zong lungnuamtakin na sang uh hi, bang hang hiam cih leh note mahmah in no adingin a hoihzaw le a tozaw neihsa na nei uh cih na thei uh hi.

³⁵Tua ahi ciangin na kimuanna lungsim uh na paikhia kei un; pahtakman tampi hong kipia ding hi.

³⁶Pasian deihna na sep uh ciangin ama hong ciamsa na ngah nadingun na sikdo ding uh kisam hi.

³⁷Ahang in, hun tomno khat sungah, "Hong pai ding pa amah hong pai dinga a ziakai kei ding hi.

³⁸Ahi hangin ka mi thumaanpa c[44] upna tawh a nungta ding hi. Amah a nungtolh leh ama tungah ka lungkim kei ding hi," d[45]

³⁹Eite i hileh nungtolh-a kisiate laka i hi kei a, ahi hangin uma kihonkhiate i hizaw hi.