Read Zokam Hebrews 11 Bible Online

Hebrews 11 - Zokam bible

Hebrews 11

¹Tu-in upna pen, i lamette tel cianna le i muh lohte theihtelna ahi hi.

²Tanglai mite a kiphatna hihte hang ahi hi.

³A kimu theite a kimu thei pana kibawl hi loin, khuavannuai, Pasian thupiaka piang ahi hi, cih upna-in i theitel hi.

⁴Abel in upna hangin Cain sangin biakpiakna hoihzaw Pasian tungah a pia hi. Pasian in ama biaknate a phatgen lai-in upna hangin mi thumaan a hina a phat hi. Amah a sih khit hangin upna hangin thu gen lailai hi.

⁵Enok in upna hangin sihna a thuak khak loh nadingin hih nuntakna pan a kilakhia hi; Pasian in amah lakhiamang zo ahi manin a kimu zo nawn kei hi. Ahang in, amah a kilak ma in, Pasian a lungkimsak pa khat hi, ci-a kiphatsa khat ahi hi.

⁶Tua hi-a upna loin Pasian a kilungkimsak thei kei hi. Bang hang hiam cih leh ama kianga hong pai peuhmah in amah a om takpi mah hi, amah citaka a zongte pahtakman a pia hi, ci-a up ding a kul hi.

⁷Noah in upna hangin a kimu nai lo nate ah a kivauhilh ciangin kihtakna siangtho tawh, a innkuanpihte hotkhiat nading gunkuangpi a lem hi. Ama upna hangin leitung mawhpaih a, upna hanga thumaanna a luahpa a suak hi.

⁸Abraham in upna hangin a nung cianga, a luah dinga a ngahna muna pai dingin a kisap lai-in koi lamah pai ding cih nangawn a theih loh hangin mangin a pai hi.

⁹Amah in a upna hangin gamdang a kiciamna gamah mikhual bangin inn a lam hi. Amah tawh a kibanga ciamna a luahpih Isaac le Jacob mah bangin tuipuan bukte ah a teng hi.

¹⁰Ahang in, bulpite a nei khuapi lian khat a lamen hi. Tua khuapi a geelpa le a lampa Pasian ahi hi.

¹¹Abraham in upna hangin, amah tek lua ta-in Sara mahmah lah tasel hi napi ama tunga thu a ciampa muanhuai a sak manin amah pa khat a suah theihna e[46] kipia hi.

¹²Tua hi-a hih a si tawh a kibang mi khat panin vantunga om aksite zaha tam le tuipi sehtak-a sehnel kisim zo lote zah, suan le khakte zong a piang hi.

¹³Hih mite khempeuh upna tawh a nuntak lai mah un a si uh hi. Amaute in a kiciamsa nate ngah lo uh a, tuate gamlapi panin galmuh in a galmuak bek uh hi. Tua hi-a amaute leitungah gamdang mi le mikhual ahilam uh a kiphawk uh hi.

¹⁴Tua bang a ci mite in amau ading gam khat a zong uh hi, cih a kilangsak hi.

¹⁵Amaute in a nusiatsa uh gam na lunggulh den uh hileh ciah kik nading hun hoih nei khin tham ding uh hi,

¹⁶Tua sangsikin, amaute in gam hoihzaw khat vantung gam a lunggulh uh hi. Pasian in amaute ading khuapi lian khat bawlkhol zo ahi manin, amau Pasian a kicih ding a maizum kei hi.

¹⁷Pasian in a zia-et ciangin Abraham in upna hangin biakpiak nadingin Isaac a pia hi. Tua kam ciamna a ngahpa in a tapa khat neihsun biakpiakna-a pia dingin a kithawi hi.

¹⁸Tua mah lah Pasian in, "Isaac tungtawnin na suan na khak a[47] a kiminlawh ding hi," b[48] a cihna pa hi lai hi.

¹⁹Abraham in, Pasian in misisate thosak thei, ci-in ngaihsun a tehpih in gen leng, amah in Isaac misi pan a ngah kik ahi hi.

²⁰Isaac in upna hangin Jacob le Esau mailam ding ngaihsunin thupha na pia hi.

²¹Jacob in a sih kuanin upna hangin Joseph tapate thupha pia ciat-a a ciangkhut tungah kingamin na bia hi.

²²Joseph a sih kuanin upna hangin Israel mite Egypt pan a paikhiat nading le ama guhte tawh kisai lamlahna na pia hi.

²³Moses nu le pa-te in upna hangin, amah a suah khit kha thum sung sel uh hi. Bang hang hiam cih leh amaute in amah naupang mawkmawk hi lo cih mu uh ahi manin kumpipa thupiak a kihta kei uh hi.

²⁴Moses in a khan khit ciangin upna hangin Pharaoh tanu’ tapa a kicih ding a nial hi.

²⁵Mawhna nopsakna-a tomvei sung gualnop sangin Pasian mite tawh bawlsiatna a thuak khawm ding teelzaw hi.

²⁶Mailam ah pahtakman a san ding a etkholh manin Christ hanga maimawkna pen Egypt gam goute sangin manphazaw a sa hi.

²⁷Amah in upna hangin kumpipa hehna kihta loin Egypt nusia hi; amah in muh theih loh mipa a muh manin a thuak keeikai hi.

²⁸Amah in, upna hangin ta masa a thatpa in Israel ta masa a sukkhak loh nadingin Paisan-pawi le sisan thehna a na bawl hi.

²⁹Tua mite in upna hangin leihul a pai bangin San Tuipi c[49] a kantan uh hi; ahi hangin Egypt mite in tua bangin hih a sawm uh leh amaute tui ah kialum uh hi.

³⁰Mite in upna hangin, Jericho ni sagih sung a kimkot khit uh ciangin khulhte a cim hi.

³¹Numei kizuak Rahab in, upna hangin thukansimte a tunsak manin thumang lote d[50] tawh a kithat khawm kei hi.

³²Bang genbeh lai ding ka hi hiam? Gideon Barak, Samson, Jephtha, David, Samuel le kamsangte thu gen nading ka hun a kicing kei hi.

³³Amaute in upna tungtawnin kumpi gamte zo uh a, thutang tawh ukin, a kiciamsate a ngah uh hi; amaute in humpinelkai kamte khak uh a

³⁴meikuangpi phelhmitin namsau ma pan suakta uh hi. Amaute thanemna thakhauhna suakin galdona ah vanglian uh a, gamdang galte zo mang uh hi.

³⁵Numeite in amau misite, a nungtasa-in ngah kik uh hi. Adangte kigawt-a, thawhkikna hoihzaw ngah dingin a kikhah khiat ding a nial uh hi.

³⁶Adangte sikkhainiang tawh kikhihin thong sungah a kikhum laitakin pawlkhatte in ciamnuih bawlna le sat gawpna a thuak uh hi.

³⁷Amaute suang e[51] in kideng, amaute singat tawh tumnih kisuah; amaute namsau tawh kithat hi. Amaute in tuu vun, keel vunte silhin vakvai uh a, gentheih bawlna, bawlsiatna le khel bawlna kithuaksak hi.

³⁸Amaute adingin leitung tenna taak hi lo hi. Amaute gamlak mualsang, suanghawm le kaw hawm sungah a tai kawikawi uh hi.

³⁹Amaute in a upna uh hangin phatna a ngah uh hi. Tua hi napi amaute kuamah in tua ciamsa pen a ngah kei uh hi.

⁴⁰Pasian in eite ading a hoihzaw khat geel khin zo ahi manin eite tawh i kimkhawm ciang bekin amaute kihoihkimsak ding hi.