Read Zokam Hebrews 12 Bible Online

Hebrews 12 - Zokam bible

Hebrews 12

¹Tua ahi manin hihzah taka a tam teci meiipite in i kimkot ah hong um ahi ciangin eite hong dal na khempeuh le baihtaka hong awksak ziau thei mawhna paikhia-in eite adingin i mai-a kiciamtehsa tai kidemna zui-in sikdotakin tai ni.

²Ama mai-a kikoih lungnopna a ngah nadinga singlamteh ah simmawh bawlsiatnate a thuak keeikai khit ciangin Pasian taklamah a tu, i upna a piang sakpa le a hoihkimsakpa Jesu mitsuan gige ni.

³Note lungkia a, thanemin na om loh nadingun mawhdim mite in amah a langbawlna a thuakpa na ngaihsun un.

⁴Mawhna do-a na panna-uhah na sisan uh a luan dongin na do nai kei uh hi.

⁵Tapate banga note kianga hong gen, "Ka tapa aw, Topa hong sekna neu ngaihsut kei in; amah in nang hong tai ciangin na lung kiasak kei in;

⁶bang hang hiam cih leh Topa in a itte sek-a, tapa-a a sante peuhmah dan a tuaksak hi" f[52]

⁷Haksatnate sekna hi, ci-in thuak keeikai un; Pasian in tapa bangin hong bawl hi. Ahang in, a pa in a sek loh ta bangci ta ahi hiam?

⁸Note hong kisek kei leh (mi peuhmah in sekna a thuak hi.) tapate taktak hi loin zawlta na hi-ua hi ding hi.

⁹Tua tham loin eite khempeuh in pianna pa i nei teka amaute in ei hong sekin tua hangin amaute i zahtak hi. I khate’ Pa tungah ki-ap zawthamin nungta lo ding i hi hiam?

¹⁰I pate in tomcik sunga dingin, amau in hoih pen a sak uh bangin eite hong sek uh a, ahi hangin Pasian in ama sianthona i tanhpih theih nadinga i hoih nadingin hong sek ahi hi.

¹¹Hong kisek laitakin sekna a nuam om loin na velval hi. A kisin khinsate in a nung ciangin thumaanna le lemna gah gahkhia uh hi.

¹²Tua ahi manin a zawngkhal na bante uh le a thanem na khukte uh hatsak un!

¹³Khebaite kilawi loin a dam zawk nadingin, "Na khete uh ading lamphei sial un." g[53]

¹⁴Mi khempeuh tawh kilemin nungta a, na siantho nadingun nakpi-in hanciam un; sianthona lo tawh kuamah in Topa a mu kei ding hi.

¹⁵Kuamah in Pasian hehpihna ngah lo-a, a om loh nading le a khaatna zung po toin buaina piangsaka, mi tampi a ninsak ding tua zung a sel loh nadingin kikem un.

¹⁶Kuamah in numei-pasal paktatna bawl kei hen, ahikeh an nek khat tawh tapa upa luahna za a zuak pasian-milo Esau bangin om kei hen.

¹⁷Na theihsa bangun tua khit ciangin hih thupha a luah nop hangin amah kinial ta hi. Khitui luangin tua thupha a zon kik hangin lungsim kikhelna a suah zo kei hi.

¹⁸Note a kilawng thei, mei-a a kang thei, khuamialpi, khuazing le huihpi;

¹⁹pengkul mutna ahikeh thu kigen a zate in amau tunga tua bang thu a kigen nawn loh nadinga a nget zawzen uh aw a ginna mual a tung na hi kei uh hi.

²⁰Bang hang hiam cih leh, "Ganhing nangawn in tua mualpi a sukkhak leh suangin kidenglum pelmawh ding hi," a[54] ci-a thu kipia amaute in a thuak zo kei uh hi.

²¹Tua a muh pen lipkhaphuai lua ahi manin Moses in, "Lau in ka ling hi," b[55] na ci hi.

²²Ahi hangin note hong tunna mual pen Zion Vum hi-a, a nungta Pasian khuapi ahi vantung Jerusalem ahi hi. Note, vansawltak tul tampi mun tul tampite lungnuama a kikhopna,

²³van tungah a min uh a kigelhsa, ta masa pawlpi kiang hong tung ta na hi uh hi. Mi khempeuh tunga thukhenpa: mi thumaante kha a hoihkimsakpa Pasian kiang,

²⁴thukhun thak palai pa Jesu kiang le Abel sisan sanga thu hoihzaw a gen sisan kitheh kiang tung zo na hi uh hi.

²⁵Tua thu a genpa na nial loh nading un kikem un. Leitung ah amaute a vauhilhpa a nial uh ciangin suakta lo uh ahileh vantung pana eite hong vauhilhpa nungngatsan lehang i suahtak nading baih lo semsem ding hi lo ahi hiam?

²⁶Tua hun laitakin a aw ging in lei lingsaka ahi hangin tu-in, "Khatvei lai, lei bek hi lo vante zong ka lingsak ding hi," c[56] ci-in thu a ciam zo hi.

²⁷Tua kammal "khatvei lai" cih in a kipiangsak nate, a kiling thei khempeuh paikhiat nading le a kiling lote om den theih nading cihnopna ahi hi.

²⁸Tua ahi manin eite, a kiling thei lo gam a ngah i hi nungsangin lungdam ni. Tua ciangin zahtakna le launa tawh san theih dingin Pasian bia ni.

²⁹Ahang in, eite Pasian pen a haltum mei ahi hi d[57].