Read Zokam Hebrews 13 Bible Online

Hebrews 13 - Zokam bible

Hebrews 13

¹Sanggam bangin khat le khat ki-it tawntung un.

²Mikhualte zindo ding mangngilh kei un; tua banga a hih pawlkhatte in a theih loh kalun van sawltakte a zindo uh ahi hi.

³Thongkiate tawh a kiakhawm bang le bawlsiatna a thuakte tawh nang mahmah a thuak khawm bangin amaute na phawk den un.

⁴Numei-pasal paktatnate khempeuh le angkawmte tungah Pasian in thu khen ding ahi manin, mi khempeuh in, kitenna pahtawi-in nupa lupna siangthosak uh hen.

⁵Pasian in, "Nang kong nusia kei dinga nang kong taisan ngei kei ding hi," e[58] ci ahi manin sum iplahluatna panin kikem unla, na neih zahzah uh tawh lungkim un.

⁶Tua ciangin eite in kimuangtakin, "Topa in kei hong huhpa hi; ka lau kei ding hi, mihing in kei bang hong cih thei ding ahi hiam? f[59] ci hi.

⁷Note tunga Pasian thu hong gen na makaite uh phawk gige un. Amaute nuntakzia pana hong piangkhiate ngaihsun unla, amau upna etteh un.

⁸Jesu Christ zanni tuni le a tawntungin kibang den hi.

⁹Thuhilhna tuamdangte khempeuh na kipimangsak kei un. A nete adingin kimanna a nei lo biakna ngeina ante sangin, hehpihna hanga a kithakhauhsak i lungtangte adingin a hoih hi.

¹⁰Eite in biakbuk sunga nasemte in a nek theih lohna biakna-tau khat i nei hi.

¹¹Tulpi in, mawhna hanga biakna-in Mun Siangtho Pen ah gante sisan paipih hi; ahi hangin a luangte giahphual pualamah kihal hi.

¹²Tua mah tawh kibangin Jesu in, ama sisan tungtawnin mite a siangthosak nadingin khuapi pualam ah thuak khin zo hi.

¹³Tua ahi ciangin ama thuak maimawkna thuak dingin giahphual pua ama kiangah pai ni.

¹⁴Ahang in, hih lai-ah a om den ding khuapi i nei kei a, ahi hangin hong tung ding khuapi i zong hi.

¹⁵Tua ahi manin Pasian tungah Jesu tungtawna phatna biakpiakna-a ama min a lo mukte gah pia tawntung ni.

¹⁶A hoih sep ding le midangte hop ding mangngilh kei ni; tua bang biakpiaknate tawh Pasian kilungkimsak hi.

¹⁷Na makaite uh thu mangin amau thuneihna ah ki-ap un. Amaute nasepna a pulak pelmawh ding mi bangin note hong vil uh ahi hi. Amau nasepnate ah vangik suak lo a, lungnopna a suah nadingin amaute thu na mang un; tua hi kei leh no adingin phatuam lo ding hi.

¹⁸Ko ading thu hong ngetsak un. Lungsim kisuantakna nei lo le lam khempeuh ah pahtawitaka nuntak ding ka lunggulh lam uh ka telcian uh hi.

¹⁹A diakdiakin note kianga kong pai kik theih baih nading thu nong ngetsak ding uh kong thum hi.

²⁰Tawntung thukhun sisan tungtawn in a lian Tuu cingpa i Topa Jesu misi pana a thosak tua lemna Pasian in,

²¹ama deihna sep nadingin a hoih na khempeuh note hong guanin Jesu Christ tungtawnin eite sungah ama lungkimna bangbangin hong sem henla ama tungah a tawntungin minthanna om den ta hen. Amen.

²²Sanggamte aw, laikhak tomno khata kong gelh ahi manin kong hanthawnnate nong thuakzawh ding uh kong thum hi.

²³I sanggampa Timothy kikhah khia zo, cih na theih ding uh ka deih hi. Amah hong tun baih leh no tawh kimu dingin kong paikhawm ding uh hi.

²⁴Na makaite khempeuh uh le Pasian mite khempeuh na hopihsak un. Italy pana mite in hong hopihna uh hong khak uh hi.

²⁵Note khempeuh tawh hehpihna om ta hen.