Read Zokam Hebrews 3 Bible Online

Hebrews 3 - Zokam bible

Hebrews 3

¹Tua ahi manin vantung-lam sapna a ngah a siangtho sanggamte aw, eite in i pulak tua sawltakpi le tulpi Jesu tungah na ngaihsutnate uh kipsak un.

²Pasian inn sung khempeuh ah Moses a muanhuai bang tektekin amah a sehpa tungah amah a muanhuai hi.

³Inn sangin a lampa in pahtawina a ngah zawk bang tektek in Moses sangin Jesu in pah tawina thupizaw a ngah ding kilawm hi.

⁴Ahang in, inn peuhmah a lam mi khat om a, ahi hangin na khempeuh a lam Pasian ahi hi.

⁵Moses pen mailam a kigen ding thute teci a pang, Pasian innkuan sung khempeuh ah nasem muanhuai ahi hi.

⁶Ahi hangin Pasian innkuan tungah Christ tapa muanhuai ahi hi. Eite in i hanna le i kisialhpih tua lametna i letkip suak leh ama innkuan i hi hi.

⁷Tua hi-a, Khasiangtho in: "Tu ni-in ama aw na zak uh leh,

⁸gamlak a zia-etna hun sungin na lehdo lai bangun, na lungtang uh khauhsak kei un.

⁹Tua lai-ah na pate un kei hong zia-et in hong sin uh a kum sawmli sung ka hihte a mu uh hi.

¹⁰Tua khang tungah ka heh a, tua ciangin, ‘Amaute lungtang lam pial tawntung a, ka lampite a thei kei uh hi,’ ka cihna tua hang ahi hi.

¹¹Tua ciangin ka heh a, ‘Amaute ka khawlna-ah a lut ngei kei ding uh hi,’ ci-in kiciamin ka genkhia hi," h[15] a ci hi.

¹²Sanggamte aw, note a kuamah peuh lungtang ah mawhdim le umlah in, a nungta Pasian kiang pan na pialmang loh nadingun kikem un.

¹³Ahi hangin tuni a kici sungin mawhna’ khemhatna hangin kuamah in a lungsim a khauhsak loh nadingin nisimin khat le khat na kihan thawn un.

¹⁴Eite in a masa-a i neih kimuanna, a tawp dongin kiptaka i letkip leh Christ sungah tanh a nei i hi hi.

¹⁵Amah in, "Tu ni-in ama aw na zak uh leh, na lehdo lai bangun na lungsim uh khauhsak kei un," a[16] na ci khin phet hi.

¹⁶Za napi-a, a lehdo kuate ahi hiam? Egypt pana Moses in a pikhiatte hi lo uh ahi hiam?

¹⁷Amah kum sawmli sung a hehna kuate tung ahi hiam? Mawhna bawla, a pumpi uh gamlaka, a pukte tung hi lo ahi hiam?

¹⁸Pasian in ama khawlna ah amaute a tung ngei kei ding uh hi, ci a, a tomlawh, a thumang lote b[17] tung lo kua tung hi ding hiam?

¹⁹Tua ahi ciangin amaute uplahna hangin a lut thei kei uh hi, cih i thei hi.