Read Zokam Hebrews 4 Bible Online

Hebrews 4 - Zokam bible

Hebrews 4

¹Tua ahi ciangin ama khawlna sunga lut nading kamciam om lai ahi manin khatpeuh tua sunga lut dingin a cin zawh loh khak ding kidawm ni.

²Ahang in, amaute zak bang tektekin eite kianga hong kihilh lungdamna-thu i za hi; ahi hangin a zate in upna tawh a gawmkhawm loh manin, amaute zaksa thupuak, amau adingin kimanna a nei kei hi. c[18]

³Pasian in, "Tua ciangin ka heh a, ‘Amaute ka khawlna ah a lut ngei kei ding uh hi,’ ci-in kiciamin ka genkhia hi," d[19] a cih bang tektek in, tu-in a umsa eite tua khawlna ah i lut hi. Tua hi-a leitung a kipiansak khit nungsang a nasep a zawhsa ahi hi.

⁴Ahang in, mun khatah: "A ni sagihna ni-in a nasepna khempeuh panin Pasian a khawl hi," e[20] ci-in tua kammalte tawh ni sagihna thu a gen hi.

⁵A tunga thumal sung mah ah, "Amaute ka khawlna sungah a lut ngei kei ding uh hi," ci kik hi.

⁶Pawlkhatte tua khawlna ah lut thei lai ding uh a, a beisa hun sunga a kiangua lungdamna-thu kigen a zasate, amau thumanlohna hangin a lut thei kei uh hi.

⁷Tua ahi manin Pasian in ni dang khat seh kikin, tu-ni, ci-a tua a cih khit a sawtpi ciangin a ma-a a gensa bangin David tungtawnin, "Tu ni-in ama aw na zak uh leh, na lungtangte uh khauhsak kei un," na ci hi.

⁸Ahang in, Joshua in amaute khawlna pia khin hileh, Pasian in tua khitin ni tuam khat thu gen nawn lo ding hi.

⁹Tua ahi ciangin Pasian mite adingin Sabbath khawlna khat om lai hi.

¹⁰Ahang in, Pasian khawlna sunga a lutte khempeuh in Pasian ama nasepna pan a khawl bang tektekin amau nasepna panin khawl ciat ding uh hi.

¹¹Tua ahi manin amaute hong lah thumanlohna zui-in kuamah puk lo-a, tua khawlna-ah i lut nadingin i hih theih zahzah in hahkat ni.

¹²Pasian thu nungta in hihtheihna a nei hi. Langnih a hiam namsau sangin hiamzaw a, nuntakna le kha, tang le guhngekte nangawn pailetin khen thei a, lungsim ngaihsutnate le lungtang tupnate khentel thei hi.

¹³A kipiangsak khempeuh Pasian muhna pan a kisel bangmah a om kei hi. I thu i tut nading mitmuhin a kisin bangmah om loin kitel sinsen in a om hi.

¹⁴Tua ahi manin eite in, vantungte f[21] khengin a pai tulpi Pasian Tapa Jesu i neih khit nungsang i pulak tua upna kiptakin len ni.

¹⁵Ahang in, eite zawn khalna hong thuakpih thei lo tulpi nei i hi kei hi; ahi hangin eite thuak mah bangin zia-etna a pawlpawl a thuak ngei, ahi hanga mawhna a nei lo tulpi khat i nei hi.

¹⁶Tua ahi ciangin eite in lainatna i ngah a, i kisap hunhuna hong huh ding hehpihna i ngah nadingin kimuangtakin hehpihna tokhom zuan ni.