Read Zokam Hebrews 5 Bible Online

Hebrews 5 - Zokam bible

Hebrews 5

¹Tulpi peuhmah mihing lak pana kiteel hi a, Pasian tunga nasep khempeuh amau tanga sem ding mawhnate hanga biakpiakna le letsongte a pia dinga kiseh ahi hi.

²Amahmah zong thanemna ah om ngei zo ahi manin a thei lo mite le a gammangte lungnemtakin kem thei hi.

³Hih thu hangin, amah in ama mawhnate le mite mawhnate tang dingin biakpiakna a piak ding kul hi.

⁴Pasian in Aaron a sap bang tektekin a sap mite longal kuamah in ama thu-in hih pahtawina a la kei hi.

⁵Tua hi-a Christ in zong tulpi suahna minthanna ama tungah amahmah in a la kei hi. Ahi hangin Pasian in ama tungah, "Nang ka Tapa na hi hi; tu ni-in na Pa ka suak zo hi, g[22]" h[23] ci hi.

⁶Tua ciangin mundang khatah, "Nang, Melchizedek gui zui-in siampi khat na hi tawntung hi," i[24] a ci hi.

⁷Jesu leitungah a nuntak hunlai-in amah sihna pan a honkhia thei pa tungah nakpi in kahna le khitui luanna tawh thu ngetnate le ngetnate ngena zahtakna tawh a ki-ap manin kisang hi.

⁸Amah tapa hi napi a thuaknate panin thuman’na sin a,

⁹khatvei hoihkim khinin, ama thu a mangte khempeuh adingin hotkhiatna nak hong suak zo a,

¹⁰Melchizedek gui zui-in Pasian in tulpi za pia zo hi.

¹¹Hih thu tawh kisai gen ding tampi om a, ahi hangin theihna ah tuantual na hi manun teltaka gen ding haksa hi.

¹²A taktak in, siate suakin mite na hilh ding uh hun ta hi napi Pasian thu thutak bulpite hong hilh kik ding mi khat na kisam uh hi. Antak hi lo nawizu na kisam uh hi.

¹³Nawizu-a kivak peuhmah naungek hi lai ahi manin, thumaanna tawh kisai thuhilhnate na thei nai kei uh hi.

¹⁴Ahi hangin antak pen, a sia le a pha khen thei a, zangin zongsang a, amau le amau a kisek sa, a picing sate ading ahi hi.