Read Zokam Hebrews 7 Bible Online

Hebrews 7 - Zokam bible

Hebrews 7

¹Hih Melchizedek pen Salem kumpipa hi-a a Sang Pen Pasian siampi ahi hi. Amah in, kumpite zo khina hong ciah, Abraham na dawnin thupha pia-a,

²tua ciangin Abraham in, amah na khempeuh ah sawm ah khat a pia hi. A masa penin a min khiatna "thumaanna kumpipa" hi a, tua ciangin "lemna kumpipa" cihna "Salem kumpipa" zong ahi hi.

³Nu nei lo, pa nei lo, khangsimna nei lo, kipat ni le nuntakna bei ni a nei lo, Pasian Tapa bangin, a tawntungin siampi-in a om den hi.

⁴Amah bangzah takin lian hiam, ngaihsun dih ni. Pupi Abraham nangawn in a galvan matte panin sawm ah khat pia tanghial hi!

⁵Tu-in Levi suan le khak siampi a suakte in a sanggamte uh ahi Abraham suan le khakte hi taleh amaute tung panin sawmah khat a kaih ding uh thukham in a kal hi.

⁶Bangbang ahi zongin hih mipa in a pianna Levi pan sut lo napi, Abraham tung pan sawmah khat na kai-a, kamciamte a ngahpa thupha na pia hi.

⁷Tua hi-a a lianzawpa in a neuzawpa thupha a piak pen theihkhialh nading a om kei hi.

⁸Thukhat ah, a si thei mihingte in sawmah khat kai uh a, a thudang khatah a nungta hi a kici pa in a kai hi.

⁹Sawmah khat a kai Levi in Abraham tungtawnin sawmah khat pia hi, nangawn kici thei ding hi.

¹⁰Bang hang hiam cih leh Melchizedek in Abraham a na dawn hun laitakin Levi in a pubul pumpi sungah a om lai hi.

¹¹Levi-te siampi nasepna tungtawnin kicinna kingah hileh (ahang in, tua hihna kibulphuh in mite tungah thukham a kipia ahi hi.) bang hanga Aaron gui ahi lo, Melchizedek gui siampi dang hong pai kul lai ding ahi hiam?

¹²Ahang in, siampi hina kilaihna a om bangin thukham zong laih pelmawh a kul hi.

¹³Hih nate a kigenna pa ahileh beh tuam mi khat hi-a, tua beh panin kuamah biakna-tau ah nasem ngei a om kei hi.

¹⁴Ahang in, eite Topa lah Judah suan le khak ahilam kitel zo a, tua beh tawh kisai-in Moses in siampite thu bangmah a gen kei hi.

¹⁵Melchizedek bang siampi dang khat hong kilang ahi ciangin thugen hong kitelzaw semsem a,

¹⁶tua siampi hong suakpa pen a pu a pa ua ngeina tawh hong suak hi loin, a kisia thei lo nuntakna’ vangliatna pansanin siampi hong suak ahi hi.

¹⁷Ahang in, "Nang, Melchizedek gui zui-in tawntung siampi na hi hi," d[28] ci-in kipulak hi.

¹⁸Ngeina masa pen thanemin kiman na nei lo ahi manin kinawlkhin a,

¹⁹(ahang in, thukham in bangmah a hoih kimsak kei hi.) a hoihzaw lametna hong kipia in, tua tungtawnin Pasian kiang i nai hi.

²⁰Tua nangawn zong kiciamna lo tawh hi peuhmah lo hi! Adangte kiciamna khat beek om loin siampi a suak uh hi.

²¹Ahi hangin Pasian in kiciamna tawh ama tungah thu a gen khit ciangin siampi hong suak a: "Topa kiciam in, a lungsim a khel kei ding hi: "Nang tawntung siampi na hi hi," a[29] ci hi,

²²Hih kiciamna hangin, Jesu a hoihzaw thukhun kipsakpa hong suak hi.

²³Tu-in sihna in amaute nasep a khaktan nungsangin siampi tampi a om hi.

²⁴Ahi hangin Jesu nungta tawntung ahi manin amah a kipden siampi ahi hi.

²⁵Tua ahi manin ama tungtawnin Pasian kianga a paite khempeuh kicingtakin b[30] honkhia thei hi; bang hang hiam cih leh amaute tanga a thumsak dingin a nungta tawntung hi.

²⁶Tua bang tulpi khat - a siangtho, a kawkbaang lo, a siang, mawhneite pana kikhenkhia, vante tunglama a kitawisang pa khat in, eite kitaksapna hong pia zo mahmah hi.

²⁷Tulpi dangte tawh kibang lo a, a masa in ama mawhna, tua ciangin mite mawhnate, biakpiakna ni khat khit ni khatin piak a kul kei hi. Amah in amaute mawhna ading amahmah biakpiakna-a a kipiak ciangin khatvei in cin khin hi.

²⁸Ahang in, thukham in a thanem mite’ tulpi in seh-a, ahi hangin thukham nunga hong pai kiciamna in a tawntunga hoihkim-a kibawl, Tapa a seh zo hi.