Read Zokam James 1 Bible Online

James 1 - Zokam bible

James 1

¹Pasian le Topa Jesu Christ nasem keimah James in, Minamte lakah kithehthang beh sawm-le-nihte: Kong hopih hi.

²Ka sanggamte aw, zia-etna a tuam tuam na thuak uh ciangin nuamna takpi-in na ngaihsun un.

³Bang hang hiam cih leh upna hong kizia-et ciangin sikdona khangsak zaw hi, cih na thei uh hi.

⁴Bangmah kisam loin picingin na kicin nadingun sikdona in no tungah na a sep khit pelmawh kul hi, cih na thei uh hi.

⁵Note lakah pilna kisam khatpeuh a om leh, kuamah tai lo-a cingh taka a pia pa Pasian kiangah ngen leh amah kipia ding hi.

⁶Ahi hangin a nget ciangin lunghei nei loin a up pelmawh kisam hi. Bang hang hiam cih leh a lunghei neite, huih muta kilok tuipi hual tawh kibang hi.

⁷Tua bang mi in Topa tung pan na khatpeuh ngah dingin kingaihsun kei hen.

⁸Amah lungka mi hi-a, a hihna khempeuh ah kipna mel a nei lo mi ahi hi.

⁹A nuntakna a niam sanggamte in a dinmun sang uh kisaktheihpih uh hen.

¹⁰Ahi hangin a hau mi khatin, a dinmun niamna kisaktheihpih hen, bang hang hiam cih leh amah gamlak pakte bangin a mangthang ding hi.

¹¹Ahang in, ni suakin nakpi-in sa-a singno a kungkeu hi; a pakte pulh-a; a mel hoihna teng kisusia hi. Tua mah bangin a haute a sumbawl laitak nangawnun a vuaimang ding uh hi.

¹²Zia-etna thuaka, a sikdo mi thupha ngah ahi hi. Bang hang hiam ci leh zia-etna a thuak zawh khit ciangin Pasian in amah a itte a kamciamsa nuntakna lukhu a ngah ding hi.

¹³Amah a kizia-et ciangin kuamah in, "Pasian in kei hong zia-et hi," ci kei hen. Gitlohna-in Pasian kizia-et thei lo-a, amah in zong gitlohna tawh kuamah a zia-et kei hi;

¹⁴ahi hangin mi khatpeuh ama gitloh lunggulhna in kai-a a zol ciangin zia-etna a thuak ahi hi.

¹⁵Tua lunggulhna a gaii khit ciangin mawhna a suakkhia hi; mawhna a picin khit ciangin sihna a suak hi.

¹⁶Kong it sanggamte aw, mi khemsa-in om kei un.

¹⁷A hoih le a bukim letsong peuhmah tunglam pan hi-a, vantung khuavakte’ Pa pana hong kipia ahi hi. Amah, niliimte banga a kilaihlaih hi lo hi.

¹⁸Ama piansak khempeuh lakah a gahmasate i suah theih nadingin thutak thu tawh a suak dingin eite hong teel hi.

¹⁹Kong it sanggamte aw, hih thu ciamteh un: A kuamah peuh thuzak ding manlang hen. Kampau ding le heh ding manlang kei hen.

²⁰Ahang in, mihing hehna in Pasian deih, a thumaan nuntakna a tun kei hi.

²¹Tua ahi manin a kithangzat a kihhuai gamtatna khempeuh na tang un; note hong honkhia thei, note sunga kisuan thu lungnemin na sang un.

²²No le no kikhemin thu ngai lelte hi kei un. Thu banga a gamtate na hi un.

²³Mi khatpeuh in thu za napi in thu bangin a gamtat kei leh, a maitang limlangin en a,

²⁴a ki-et khit ciangin paikhia a, amah bang tawh kibang hiam cih a mang ngilhpahte tawh kibang ahi hi.

²⁵Ahi hangin suahtakna a pia thei a hoihkim thukham limtakin en-a, thu bangin gamta-a a zaksate mangngilh loin a sempah mi, ama sepna ah thupha kipia ding hi.

²⁶Mi khatpeuh, amah le amah biakna uukmi in kingaihsun napi, a leii a kep zawh kei leh amah le amah a kikhem suaka, ama biakna kimanna a om kei hi.

²⁷Eite Pa Pasian in khialhna nei lo le a sianga a san biakna in: tagahte le meigong numeite a lungdon ciangin don-a leitung nitsakna pana kikepna ahi hi.