Read Zokam James 4 Bible Online

James 4 - Zokam bible

James 4

¹Note lakah kitotna le kidona bang in piangsak ahi hiam? Nomau sunga kido den lunggulhna pana piang hi lo ahi hiam?

²Na khatpeuh na deih uh a, ahi hangin na ngah kei uh hi. Tual na that uh a, na deihgawh uh a, ahi hangin na deih uh na ngah tuan kei uh hi. Na kitawng uh a, na kilai uh hi. Pasian tungah ngen lo na hi manun na deih uh na ngah tuan kei uh hi.

³Na nget uh ciangin na ngah kei uh hi, bang hang hiam cih leh na ngahte uh nomau nopsak nadinga na zat theih nading uh tupna man lo tawh na ngen uh hi.

⁴No angkawm hat mite aw, leitung tawh kilawmtakna in Pasian lama muhdahna ahilam thei lo na hi uh hiam? A lawm dinga leitung a teelte peuhmah Pasian gal a suak hi.

⁵Ahi kei leh Laisiangtho in, eite sungah a nuntaksak kha in eng hi, a cih a thu om lopi-a a cih in ngaihsun na hi uh hiam? a[7]

⁶Ahi hangin amah in eite hehpihna a tamzaw hong pia hi. Tua hangin Laisiangtho in: "Pasian in a kisatheite do a, a kiniamkhiatte a hehpih hi," b[8] ci hi.

⁷Tua ahi ciangin Pasian tungah no le no kipia un. Dawimangpa do un, amah taimang ding hi.

⁸Pasian naih un; amah in zong hong naih ding hi. No mawhneite aw, na khut uh sil un; no lungkate aw, na lungtang uh hahsiang un.

⁹Lunggimin, thumin, kapkap un. Na nuihna uh thumna suaksak unla, na nuamna uh maigumna suaksak un.

¹⁰Topa mai-ah no le no kiniamkhiat un; amah in hong lamto ding hi.

¹¹Sanggamte aw, khat le khat ki gensia kei un. Ama sanggampa a langgena, a tunga thu a khen peuhmah, thukham langgen-a, thukham tunga thukhen ahi hi. Thukham thu na khen ciangin thukham thu a mang lo na hi-a, thukham tunga thukhena a tutu na hi hi.

¹²Thukham a pia pa le Thukhen pa khat bek om-a, a honkhia thei le a susia thei pa ahi hi. Ahi hangin na vengte thu a khen vial pa nang kua na hi hiam?

¹³"Tuni hiam zingciang hiam in hih khuapi, tua khuapi-ah pai-in tua lai-ah kum khat taamin sum bawlin sum va zong ning," a ci note aw, tu-in ngai un.

¹⁴Zingciangin bang piang ding cih nangawn na thei kei uh hi. Na nuntakna uh bang ahi hiam? Note, tomcik sung a kilat khit ciangin a mangthang pah tuikhu na hi uh hi.

¹⁵Tua sangsik in, "Pasian deihna ahileh i ci dam dinga, hihte, huate i sem ding hi," na cih zawk ding uh ahi hi.

¹⁶Note tua bangin kihisakin kisialhna kam na pau uh hi. Tua bang kisialhnate khempeuh gitlohna ahi hi.

¹⁷Tua ahi ciangin ama sep dinga kilawm a hoih thei napi, a sem lo mi peuhmah a mawh ahi hi.