Read Zokam 2 Peter 1 Bible Online

2 Peter 1 - Zokam bible

2 Peter 1

¹Jesu Christ nasem le sawltakpi Simon Peter in, Eite Pasian le i Honpa Jesu Christ thumaanna tungtawnin kote aa banga a manpha upna a ngahte tungah:

²Pasian le i Topa Jesu theihna tungtawnin hehpihna le lemna adimin note aa hi ta hen.

³Ama minthanna le a hoihna tawh hong sampa, amah i theihna tungtawnin nuntak nading le i pasianmi theih nadinga kisam khempeuh ama Pasian vangliatna in hong pia zo hi.

⁴Hihte tungtawnin pasian pianngei ah tanh na neih theih nading uh leh lunggulhna gilo in a piansak leitung siatna pan note na suahtak theih nadingun amah in tuate tungtawnin alian pha mahmah le a manpha a kamciamte eite hong pia zo hi.

⁵Hih thu hang mahmah in, na theih tawpun na upna uh tungah hoihna, hoihna tungah theihna;

⁶theihna tungah pumpi ki-ukzawhna; pumpi ki-ukzawhna tungah sikdona; sikdona tungah pasian-mina

⁷le pasian-mina tungah sanggam kikhualna le sanggam kikhualna tungah itna na behlap un.

⁸Ahang in, hih hoihnate ah na khan semsem uh leh i Topa Jesu Christ na theihna uhah muibut lohna le gahsuah lohna panin hong hu ding hi.

⁹Ahi hangin mi khatpeuh in tuate a neih kei leh muhna tom le mittaw hi-a, ama mawh nasate a kisiansak khit lam a mangngilh zo ahi hi.

¹⁰Tua ahi manin sanggamte aw, note hong kisapna le hong kiteelna a ki ciansak dingin na lawp semsem un. Ahang in, hih nate na hih uh leh na puk ngei kei ding uh a,

¹¹eite Topa le Honpa Jesu Christ tawntung kumpi-gamah note thupitakin hong kimuak ding hi.

¹²Tua ahi ciangin tu laitaka na theih uh thutak ah, a kipsa a khosa le tuate a theisa na hi uh zongin hih nate kong phawksak kik tawntung ding hi.

¹³Hih pumpi puanbuk sunga ka ten laiteng na theihtheihna uh kong thaksuaksak ding amaan hi, ci-in ka ngaihsun hi.

¹⁴Bang hang hiam cih leh i Topa Jesu Christ in teltaka kei hong theihsak bangin hih puanbuk ka koihkhiat pah ding ka thei hi.

¹⁵Kong paisan khit ciangin hih nate phawk den thei na nuteh cih thei-in ka hih theih tawpin ka hih ding hi.

¹⁶Note tungah i Topa Jesu Christ vangliatna le hong pai kik nading thu kong hilh lai-un, piltaka kiphuak tawm tangthute peuh zui hi loin ama thupina mita a mute ka hi zaw uh hi.

¹⁷Ahang in, a Thupi Minthanna pana aw in ama kiangah, "Hih in ka lung hong kimsak mahmah ka it ka Tapa ahi hi," a[1] ci-a a gen lai-in, Pa Pasian tung pana pahtawina le minthanna a ngah hi.

¹⁸Tua mual siangtho tunga amah tawh ka om laitakun kote mahmah in vantung pana hong ging hih aw ka za uh hi.

¹⁹Khuamialna mun khatah khuavak a tan bangin note lungsungah phalvak tung zingsol a suah mateng in, eite in a kicianzaw kamsangte thugen i nei hi; note in, tuate na thusim uh leh na hoih sem na hi ding uh hi.

²⁰Tuate khempeuh banah, Laisiangtho sunga genkholhna peuhmah kamsangpa in a khiatna a gentawm mawk ahi loh lam na theitel pelmawh un.

²¹Ahang in, genkholhna peuhmah mihing deihna pan hi ngei lo-a, Khasiangtho hihsakna bangbangin mite in Pasian tung pana a gen uh hizaw hi.