Read Zokam 1 John 3 Bible Online

1 John 3 - Zokam bible

1 John 3

¹Eite, Pasian tate cih-a i om nadingin Pa in eite tunga hong sunleet itna lian mahmah si! Ei lah tua mah i hi hi! Leitung in eite hong theih lohna amah a theih loh hang ahi hi.

²Kong it lawmte aw, tu-in eite, Pasian tate i hi a, mailamah bang i hi lai ding hiam, hong kitheisak nai lo hi. Ahi hangin amah hong kilat b[7] ciangin amah ahi banga mu ding i hi manin amah i bang ding hi cih i thei hi.

³Ama sunga hih lametna a nei peuhmah, amah a siantho bang tektekin amah le amah a kisiangthosak hi.

⁴A mawh peuhmah thukham palsat ahi hi; a taktakin mawhna pen thukham palsatna ahi hi.

⁵Ahi hangin i mawhnate a lakmang theih nadingin amah hong kilang ahilam na thei uh hi. Ama sungah ahileh mawhna a om kei hi.

⁶Ama sunga nungta mi khatpeuh, mawhna a zongsang kei hi. Mawhna a zongsang mi peuhmah amah a mu nai lo, a thei nai lo ahi hi.

⁷Kong it tate aw, mi khatpeuh na kipimangsak kei un. Amah a thumaan bang tektekin amaana gamta mi peuh mah a thumaan ahi hi.

⁸A kipatcil-a kipan dawimangpa a mawhden ahi manin mawhna a bawl mi peuhmah dawimangpa pana piang ahi hi. Pasian Tapa hong kilatna ahang pen dawimangpa nasepna a susia ding ahi hi.

⁹Pasian pana piang peuhmah, Pasian cii ama sungah omden ahi manin mawhna a zongsang kei ding hi; bang hang hiam cih leh amah Pasian pana piang ahi manin mawhna a zong sang kei hi.

¹⁰Hih in Pasian tate le dawimangpa tate i theihkak theih nading ahi hi. Mi khatpeuh amaana a gamtat kei a, ama sanggampa a it kei leh Pasian ta ahi kei hi.

¹¹A cil-a kipan na zak uh thupuak in: Eite khat le khat i ki-it ding ahi hi.

¹²Gilopa aa ahi, a sanggampa a that pa Cain na bang kei un. Tua ahileh bang hangin amah that ahi hiam? Bang hang hiam cih leh ama gamtatnate gilo-a, a sanggampa gamtatnate amaan hang ahi hi.

¹³Ka sanggamte aw, leitung mite in note hong muhdah leh lamdang sa kei un.

¹⁴Eite in i sanggamte i it manin sihna pan paikhia-in nuntakna sungah i lut zo cih i thei hi. A it lo mi peuhmah sihna sungah a om lai hi.

¹⁵A sanggam a it lo mi peuhmah tualthat hi-a, tualthat kuamah in ama sungah nuntak tawntungna a neih loh lam na thei uh hi.

¹⁶Itna bang ahi hiam cih i theihna hih ahi hi: Jesu Christ in eite adingin a nuntakna hong khaam hi. Tua bangin eite in i sanggamte adingin i nuntakna i khaam ding kul hi.

¹⁷Mi khatpeuh in neih le lam nei-in a sanggampa kisap lam thei napi amah a hehpih kei leh bangci bangin ama sungah Pasian itna om thei ding ahi hiam?

¹⁸Kong it tate aw, a thu le kamsiam bek tawh ki-it loin gamtatna le thutakin ki-it ni.

¹⁹Tua in, thutak aa i hina i theihna le eite i lungtang in hong mawhpaih peuhpeuh ciangin ama mai-ah i lungsim tawlngakna i theihna ahi hi.

²⁰Ahang in, i lungtang sangin Pasian lianzaw a, na khempeuh a thei hi.

²¹Kong it lawmte aw, i lungtang in eite hong mawhpaih kei leh Pasian mai-ah kimuanna nei-in,

²²ama thupiakte manga, amah lungkimsak i hi manin ama tungah i nget khatpeuh i ngah thei hi.

²³Ama thupiak hih ahi hi: Ama Tapa Jesu Christ min up ding le amah in eite hong thupiak bangin khat le khat i ki-it ding ahi hi.

²⁴Ama thupiakte a mangte ama sungah nungta a, amaute sungah amah a nungta hi. Hih in amah eite sungah a nuntak lam i theihna ahi hi: Eite in ama hong piak Kha-in tua i thei hi.