Read Zokam 1 John 4 Bible Online

1 John 4 - Zokam bible

1 John 4

¹Kong it lawmte aw, kha khatpeuh um kei un; ahi hangin leitung ah kamsang zuau tampi paikhia khin ahi manin amaute kha Pasian pan hi hiam, hi lo hiam cih sittel un.

²Pasian Kha na khentel theih nading uh hih bang ahi hi: Jesu Christ mihingin hong pai hi, ci-a a sang kha peuhmah Pasian pan hi-a,

³ahi hangin tua banga Jesu a sang lo kha peuhmah Pasian pan hi lo hi. Hih in antichrist kha hi-a, hong pai ding ci-a na zaksa uh, tu nangawnin leitunga a om khin zo ahi hi.

⁴No, kong it ka tate Pasian pan na hi uh a, leitunga om pa sangin no sunga om pa lianzaw ahi manin amaute na zawhsa uh ahi hi.

⁵Amaute leitung pan hi uh a, tua ahi manin leitung ngaihsutna tawh thu genin leitung in amau thu a ngai hi.

⁶Eite Pasian pan i hi-a, Pasian a thei peuhmah in i thu a ngai uh hi. Ahi hangin Pasian pan ahi lo peuhmah in i thu a ngai kei uh hi. Thutak Kha a[8] le zuauna kha i khentel theihna hih bang ahi hi.

⁷Kong it lawmte aw, Pasian pana itna hong pai ahi manin eite khat le khat ki-it ni. A it thei mi peuhpeuh, Pasian pana suak hi-a Pasian a thei hi.

⁸A it thei lo mi peuhmah in Pasian a thei kei hi; bang hang hiam cih leh Pasian in itna ahi hi.

⁹Pasian in ama itna eite lakah hong lahna hih bang ahi hi: Ama tungtawna eite i nuntak theih nadingin amah in a Tapa neihsun b[9] leitungah hong sawl hi.

¹⁰Itna hih ahi hi: Eite in Pasian i it cihna hi lo, amah in eite hong it-a, i mawhnate thoihdamna dingin c[10] biakna-in a Tapa hong sawlna ahi hi.

¹¹Kong it lawmte aw, Pasian in eite hi zaha hong it khit nungsangin eite zong khat le khat i ki-it ding kisam hi.

¹²Mi khat beek in Pasian a mu ngei kei hi; ahi hangin eite khat le khat i ki-it leh, Pasian eite sungah hong tengin i sungah a itna kicingsak hi.

¹³Amah in eite ama Kha hong pia khin ahi manin eite ama sungah i nungta a, amah eite sungah a nungta cih i thei hi.

¹⁴Tua hi-a Pa in leitung Honpa dingin ama Tapa hong sawl zo hi, cih eite in i mu khin a, teci i pang hi.

¹⁵Mi khatpeuh in, Jesu, Pasian Tapa hi, ci-a a san leh ama sungah Pasian tenga, Pasian sungah amah a teng hi.

¹⁶Tuaci bangin Pasian in eite hong it lam i thei a, tua itna tungah i kinga hi. Pasian in itna ahi hi. Itna sungah a nungta mi peuhmah Pasian sunga nungta hi-a, ama sungah zong Pasian a nungta hi.

¹⁷Thukhen ni cianga muang taka i om nadingin hih bangin eite lakah itna hong kicingsak hi. Bang hang hiam cih leh hih leitung ah amah tawh i kibang hi.

¹⁸Itna sungah launa a om kei hi. Ahi hangin a kicing itna in launa a hawlkhia hi; bang hang hiam cih leh launa pen gawt ding kihtakna ahi hi. A lau mite, itna sungah kicinsak nai loh ahi hi.

¹⁹Amah in eite hong it masa ahi manin eite in i it hi.

²⁰Mi khatpeuh in, "Pasian ka it hi," ci napi a sanggampa a muhdah lai leh zuauphuak pa ahi hi. Ahang in, a muh gige a sanggampa a it lo mi in, a muh nai loh Pasian a it thei kei hi.

²¹Amah in eite hih thupiak hong pia zo hi. Pasian a it peuhmah in pel loin a sanggampa zong it hen.