Read Zokam Thukhente 10 Bible Online

Thukhente 10 - Zokam bible

Thukhente 10

¹Abimelech khit ciangin Israel honkhia dingin Issachar mipa, Dodo tapa Puah, Puah tapa Tola a khang hi. Amah Ephraim mualtung gam sung Shamir ah a teng hi.

²Amah in kum sawmnih le thum sung Israel makaih a in tua ciangin si a Shamir ah kivui hi.

³Ama zomah Gilead-te Jair in Israel-te kum sawmnih le kumnih sung a makaih hi.

⁴Amah in laa sawmthum a tuang tapa sawmthum a nei hi. Amaute in Gilead sunga om tuni donga Havvoth Jair b a kici khuapi sawmthumte a uk uh hi.

⁵Jair a sih ciangin Kamon ah kivui hi.

⁶TOPA mit ah Israel-te gamtatsia leuleu uh hi. Amaute in Baal le Ashtoreth-te le Aram’ pasiante, Sidon’ pasiante, Moab’ pasiante Ammon pasiante le Philistia-te’ pasiante’ na a sem uh hi. Israel-te in TOPA taisan uh a, ama na a sep nawn loh uh ciangin

⁷amaute tungah a heh mahmah hi. Amah in Philistia-te le Ammon-te tungah amaute zuaka,

⁸tua kumin amaute a kisiazan gawp uh hi. Amaute in Jordan nisuahna-lam Amor-te gam sung Gilead a om Israel-te khempeuh kum sawm le giat sung a nuainet uh hi.

⁹Judah, Benjamin le Ephraim innkuante sim dingin Ammon-te Jordan gal nangawn ah kah uh a; Israel-te lungdong mahmah uh hi.

¹⁰Tua ciangin Israel in TOPA tungah, "Nang tungah kong mawh khin uh a ka Pasian uh hong taisanin Baal-te’ na ka sem uh hi," ci-in a kiko uh hi.

¹¹TOPA in, "Egypt-te, Amor-te, Ammon-te, Philistia-te

¹²Sidon-te, Amalek-te le Maon-te c in hong nuainet uh a, huh ding ngenin nong kiko uh ciangin amaute khut panin hong honkhia lo ka hi hiam?

¹³Ahi hangin kei nong taisan uh a, pasian dangte na na sem uh hi; tua ahi ciangin kong honkhia nawn kei ding hi.

¹⁴Pai unla na pasian dingua na teelte uh va ko un. Na lungkham uh ciangin amaute kihonkhiasak un!" ci-in a dawng hi.

¹⁵Ahi hangin Israel-te in TOPA kiangah, "Ka mawh khin uh hi. Ko adingin a hoih pena na ngaihsut bangin hong bawl inla, ahi zongin nong hehpihna-in kote tu-in hong hukhia in," a ci uh hi.

¹⁶Tua ciangin amaute laka a pasiante uh paikhia-in TOPA’ na a sem uh hi. Tuateh amah in Israel’ gimthuakna a thuakzo nawn kei hi.

¹⁷Ammon-te galvan tawh kithawi-in Gilead ah giahphual sat dingin a kisap ciangin, Israel-te kikaikhawm in Mizpah ah giahphual a sat uh hi.

¹⁸Gilead makaite khat le khat, "Ammon-te sim dinga a kipan ngam peuhpeuh Gilead a tengte’ lutang a suak ding hi," a kici uh hi.