Read Zokam Thukhente 11 Bible Online

Thukhente 11 - Zokam bible

Thukhente 11

¹Gilead-te, Jephthah a thahat galhang khat ahi hi. A pa Gilead hi-a, a nu numei kizuak khat ahi hi.

²Gilead zi in zong tapa mah nei-a, amaute a gol uh ciangin Jephthah a hawlkhia uh hi. Amaute in, "Nang numei dang khat tapa na hi manin ko innkuan sungah luah bangmah na ngah kei ding hi," a ci uh hi.

³Tua ciangin Jephthah a sanggamte kiang panin taikhia a, Tob gamah tengin tua lai-ah mi ngoltol pawlkhat kikhawmin amah a zui uh hi.

⁴Tua nung a sawt lo, Ammon-te in Israel tungah gal a phuan uh ciangin,

⁵Gilead-a upate, Jephthah sam dingin Tob gamah a pai uh hi.

⁶Amaute in, "Hong pai-in hong makaih lecin Ammon-te i do thei ding hi," a ci uh hi.

⁷Jephthah in amaute kiangah, "Hong mudahin ka pa inn pan nong hawlkhiatsa uh hi lo hiam? Na lungkham uh ciangin bang hang kei kiangah hong pai na hi uh hiam?" a ci hi.

⁸Gilead upate in ama kiangah, "Bangbang ahi zongin tu-in nang lama hong kihei ka hi uh hi, Ammon-te do dingin hong zui in, Gilead a tengte khempeuh lutang in nong om ding hi," a ci uh hi.

⁹Jephthah in, "A zenzenin Ammon-te do dingin hong ciahpih kikin TOPA in amaute kei khutah hong piak leh - na lutang uh ka hi taktak ding hiam?" ci-in a dawng hi.

¹⁰Gilead upate in, "TOPA ka teci uh ahi hi; na gen bangin ka hih taktak ding uh hi," ci-in a dawng kik uh hi.

¹¹Tua ciangin Jephthah in Gilead upate zui-a, mite in amah lutangin nei uh a amaute makaipi in a koih uh hi. Tuateh hih a kammalte khempeuh Mizpah a TOPA mai-ah a gen pha kik hi.

¹²Tua ciangin Jephthah in Ammon-te kumpipa kiangah kamtai khat sawla: "Ka gam uh nong sim nadingun ko tungah bang lungkimlohna nei na hi uh hiam?" ci-in a dongsak hi.

¹³Ammon-te kumpipa in Jephthah kamtaite kiangah, "Israel-te Egypt pan hong paikhiat toh lai-un Jordan lampi dung tengah ka gam uh Arnon pan Jabbok dong hong laksak uh hi. Tu-in thudamtakin hong pia kik un," ci-in a dawng uh hi.

¹⁴Jephthah in Ammon-te kumpipa kiangah kamtai sawl kik a:

¹⁵"Jephthah gen hih ahi hi: Israel in Moab gam ahi a Ammon-te gam ahi zongin a laksak kei hi.

¹⁶Ahi hangin Egypt pan hong paikhiat toh un, sehnel-gam kantanin San Tuipi a ah Kedesh dong a tung uh hi.

¹⁷Tua ciangin Israel in Edom kumpipa kiangah kamtai sawla, ‘No gam kantanin hong paisak un,’ a cihsak hangin Edom kumpipa in a thu ngai lo hi. Moab kumpipa kiangah zong sawl a, amah in a nial hi. Tua ciangin Kedesh ah Israel a tam phot hi.

¹⁸"Tua zomin amaute sehnel gam tengah zin kawikawi-in Edom le Moab gamte kimvelin pai uh a, Moab gam nisuahna lampang tawnin Arnon galah giahphual a sat uh hi. A gamgi Arnon ahi manin amaute Moab gam sung a lut kei uh hi.

¹⁹"Tua ciangin Heshbon a kumpi a sem Amor-te kumpipa Sihon kiangah Israel in kamtai sawla, ‘Ko muna ka pai nadingun na gam hong kantansak in,’ a ci hi.

²⁰Ahi hangin Israel b in a gam a kantan ding Sihon in a muang zo kei hi. A mite khempeuh kikhawmsakin Jahaz ah giahphual sat uh a Israel tawh a kido uh hi.

²¹"Tua ciangin TOPA Israel’ Pasian in Israel’ khutah Sihon le a mite khempeuh pia-a amaute in a zo uh hi. Israel in tua gama teng Amor-te gam khempeuh la khina

²²Arnon pan Jabbok le sehnel-gam pan Jordan dong a vekin a la khin uh hi.

²³"Tu-in TOPA Israel’ Pasian in ama mi Israel mai-ah Amor-te a hawlkhiat nungsangin no ngah theih nading bang thu nei na hi uh hiam?

²⁴Nang na pasian Chemosh hong piak tang lo ding na hi hiam? Tua mah bangin TOPA kote Pasian in ko hong piaksate ka tang ding uh hi.

²⁵Moab kumpipa Zippor’ tapa Balak sangin hoihzaw na hi hiam? Amah Israel tawh kitawngin kido ngei ahi hiam?

²⁶Israel in Heshbon, Oroer a kima tengte le Arnon dunga khuapite khempeuh kum zathum sung a neihsa uh ahi hi. Bang hangin tua hun sunga la kik lo na hi uh hiam?

²⁷No tungah ka khial kei hi, ahi hangin note in nong simna uh tawh kei tungah na khial khin uh hi. Tuni-a Israel le Ammon-te kikal-a kitotna ah TOPA in Thukhenpa c semin thu khentat ta hen," a ci hi.

²⁸Ahi zongin Ammon kumpipa in Jephthah thupuak a thusim kei hi.

²⁹Tua ciangin Jephthah tungah TOPA Kha a tung hi. Amah in Gilead le Manasseh kantanin Gilead a Mizpah nawksuak a tua panin Ammon-te sim dingin a kuan hi.

³⁰Tuateh TOPA tungah Jephthah kiciama, "Ka khut sungah Ammon-te nong piak leh

³¹Ammon-te tunga gualzo a ka ciah ciangin ka inn kongkhak pana hong dawna hong pusuak masa penpen TOPA ading hi dinga, meihal biakna-in kong pia ding hi," a ci hi.

³²Tua ciangin Ammon-te sim dingin Jephthah kuankhia a, TOPA in a khut sungah amaute a pia hi.

³³Amah in Aroer panin Minnith kiang mahmah a Abel Karamim ciang dong khua sawmnih a vatmai hi. Hih bangin Israel in Ammon a nuaisiah hi.

³⁴Mizpah a, a inn ah Jephthah a ciah ciangin amah dawn dingin kuama dang pusuak lo-a, a tanu khuangneu tumin lamsa-in pusuak masa mawk hi! Ama a ta khat neihsun ahi hi. Amah longal tanu ahi a tapa ahi zongin a nei kei hi.

³⁵Amah in tuanu a muh ciangin a puan balkekin kap-a," Oh! Ka tanu! Hong lunggimsak hong neusak sicia maw, bang hang hiam cih leh ka palsat theih loh dingin TOPA tungah ka kiciam hi," a ci hi.

³⁶Tuanu in, "Pa aw, TOPA tunga na kiciamsa ahi hi. Tu-in TOPA in na gal Ammon-te tungah phu hong laksak hi, na ciamsa bangin kei tungah hih in.

³⁷Ahi hangin hih kong ngetna khat hong pia in: Pasal nei ngei lo ding ka hi manin mual tungah ka lawmte tawh kap-a ka vak kawikawi theih nadingin kha nih hun hong pia in," a ci hi.

³⁸Amah in, "Pai in," a ci hi. Tuateh kha nih a paisak hi. Tuanu numeinote tawh mualtungah pai uh a, pasal nei ngei lo ding ahi manin a va kap uh hi.

³⁹Tua kha nih a cin ciangin a pa kiangah ciah kika, a pa in a kiciamsa bangin a tanu tungah a hih hi. Tua ciangin amah nungak bit ahi hi. Hih thu panin Israel-te ngeina pianga

⁴⁰kum simin Gilead-te Jephthah’ tanu phawkna-in Israel numeinote nili a paikhia uh hi.