Read Zokam Thukhente 14 Bible Online

Thukhente 14 - Zokam bible

Thukhente 14

¹Timnah ah Samson paisuk-a tua lai-ah Philistia nungak khat a mu hi.

²A ciah ciangin a nu le a pa kiangah, "Timnah ah Philistia numei khat ka mu hi; ka zi dingin hong laksak un," a ci hi.

³A nu le a pa in, "Ei tanau sung le i mipih khempeuh lakah lak theih ding numei om lo ahi hiam? Vun at loh Philistia-te zi-a va neih pelmawh kul se ahi hiam?" ci-in a dawng uh hi. Ahi hangin Samson in a pa kiangah, "Hong laksak hoh un. Tuanu kei tawh kituak mahmah hi," a ci hi.

⁴(A nu-le-pate hih pen TOPA kiang pan ahilam a thei kei uh hi; amah in Philistia-te a mawhsak nading a zon laitak hi-a; tua hunin Philistia-te in Israel a uk laitak ahi hi.)

⁵Samson a nu le a pa tawh Timnah ah a paisuk khawm uh hi. Timnah-te lenggui huan a manawh laitakun thakhatin humpinelkai khanglai khat hawkin a mah a bawh hi.

⁶Keelno khat a balzan bangin a khut guakin humpinelkai a balzan zawh nadingin TOPA Kha thahatna ama tungah a tung hi. Ahi hangin a hihsate a nu tung ahi-a a pa tung ahi zongin a gen kei hi.

⁷Tua ciangin paisukin numei hopiha, a deih hi.

⁸Tua khit a sawt lo tuanu pi dingin a kuan kik uh ciangin lam piala humpinelkai luanghawm a va en hi. A sungah khuai kai-in na takta a,

⁹a khutin sawka a lampai kawmin a ne hi. A nu-le-pate a phak ciangin hawma amau zong a ne uh hi. Ahi hangin humpinelkai luanghawm sunga a lak ahilam a gen kei hi.

¹⁰Tu-in numei en dingin a pa a paisuk hi. Tuateh Samson in zineipa hih ngeina bangin tua lai-ah pawi a bawl hi.

¹¹Amah a kilaak ciangin a pawl ding mi sawmthum kipia hi.

¹²Samson in amaute kiangah, "Thubukteh khat hong gen ningin hih pawi ni sagih sungin a dawnna na gen theih uh leh saihadial puan silh sawmthum le puansilh kop sawmthum kong pia ding hi.

¹³No a khiatna na theih kei uh leh saihadial puan silh sawmthum le puansilh kop sawmthum nong pia ding uh hi," a ci hi. Amaute in, "Na thubukteh hong gen in, za phot dih ni," a ci uh hi.

¹⁴Amah in, "A nepa sung pan nek ding khat piangkhia-a, thahatpa sung pan a khum khat piangkhia hi," a ci hi. Amaute in ni thum sungin a khiatna a gen thei kei uh hi.

¹⁵A nilina a ni-in amaute in Samson zi kiangah, "Na pasal in a thubukteh ko tungah hong gen nadingin na zol kei leh nang le na pa innkuan khempeuh kong haltum ding uh hi. Ka na uh hong sut nuama hong sam na hi hiam?" a ci uh hi.

¹⁶Tua ciangin Samson zi kidiksa-in a ang kidenna a, "Kei hong mudah teh! Hong it taktak kei teh. Ka mite thubukteh khat na pia-a, ahi hangin a khiatna nong gen kei hi," a ci hi. Samson in, "Ka nu le ka pa tung nangawn ah ka gen lohpi bang hangin nang tungah hong gen ding ka hi hiam?" ci-in a dawng kik hi.

¹⁷Tuanu pawisung buppi ni sagih sung a kap hi. Tua banga phuphu den ahi manin a ni sagihna ni- in, a tawpna-ah, a gen hi. Tuanu in a mipihte kiangah a hilhsawn hi.

¹⁸A ni sagihna nitum ma-in khua sung mite in ama kiangah, "Khuaizu sangin bang khum zaw hiam? Humpinelkai sangin bang hatzaw hiam?" a ci uh hi. Samson in amaute kiangah, "Ka bawngla-in kho kei le uh cin ka thubukteh na thei khia zo kei ding uh hi," a ci hi.

¹⁹Tua ciangin TOPA Kha ama tungah thahatna tawh a tung hi. Ashkelon ah amah paisuk-a a mite uh sawmthum satpai-in a neih khempeuh uh hawkkhiatsak-a a puante uh thubukteh a dawng theite tungah a pia hi. Hehsa-in a pa inn a zuanto hi.

²⁰Tuateh Samson’ zi a kiten ua amah a liah a lawmpa zi dingin kipia hi.