Read Zokam Thukhente 18 Bible Online

Thukhente 18 - Zokam bible

Thukhente 18

¹Tua hunin Israel in kumpi a nei kei hi. Tua hunin Israel behte laka Dan behte amau luah nading munah pai nai lo uh ahi manin amau tanh ding, a ten nading uh mun a zongzong uh hi.

²Tua ciangin Dan-te in Zorah le Eshtoal panin gamsung thu khankhia-a a theician dingin galhang mi nga a sawl uh hi. Hih mite amau bawng’ ciat tanga pai ahi uh hi. Amaute in, "Pai-in gam va encian un," a ci uh hi. Tua mite Ephraim mualtung gamah lut uh a, Micah inn ah tungin tua lai-ah a giak uh hi.

³Micah inn gei a tun uh ciangin Levi tangvalpa a aw in thei uh a, kihei-in inn sungah lutin "Nang hih lai-ah kua’n hong puak hiam? Hih munah bang hih na hiam? Bang hangin hih lai-ah om na hiam?" ci-in a dong uh hi.

⁴Amaute kiangah, "Micah in kei hong cial hi-a ama siampi ka hi hi," ci-in ama hihna teng a gen hi.

⁵Amaute in, "Ka khualzinna uh ka lawhcing ding uh hiam, nong hehpihna-in Pasian hong dotsak in," a ci uh hi.

⁶Siampipa in, "Lungnuamin pai un. Na khualzinna uh TOPA in pha a sa hi," ci-in a dawng hi.

⁷Tua ciangin tua mi ngate in paisanin Laish tung uh a, tua lai-a mite in Sidon-te mah bangin galmuangin lungmuangtak le ngaihmuangtaka a ten uh a mu uh hi. Amau gamah bangmah kisam lo ahi manin amaute a nuamsa a mahmah uh hi. Sidon-te panin gamlapi ah teng uh a kuama b dang tawh zong a kizom kei uh hi.

⁸Amaute Zorah le Eshtoal ah a ciah kik uh ciangin a sanggamte un, "Nate bang na cih muh uh hiam?" ci-in a dong uh hi.

⁹Amaute in, "Hong pai un va sim ni! A gam ka muhsa uh hi-a hoih mahmah hi. Bang khat beek hih loin ommawk ding na hi uh hiam? Ziakai kei un tua lai-ah pai-in va la ni.

¹⁰Tua lai na tun uh ciangin, Pasian in no khut sungah a koihsa bangmah a phawk lo, kisapna bangmah a nei lo gam zapi na mu ding uh hi," ci-in a dawng uh hi.

¹¹Tua ciangin Dan-te bawng’ pasal zaguk galsim dinga kithawisa-in Zorah le Eshcoal pan a kuankhia uh hi.

¹²Lamkalah Judah sunga Kiriath Jearim kiangah giahphual a sat uh hi. Tua ahi manin tua Kiriath Jearim nitumna mun tuni dong Mahaneh Dan c kici hi.

¹³Tua lai panin Ephraim mualtung lamah pai lai uh a Micah’ inn a tung uh hi.

¹⁴Tua ciangin Laish thu kana a pai mi ngate in a sanggamte uh kiangah, "Hih innte laka khatah siampi puan khat, innsung pasiante a kiseek milim le a kisung milim a om lam na thei uh hiam? Tu-in na hih ding uh thei un," a ci uh hi.

¹⁵Tua ciangin tua lai-ah kihei-in Micah omna-a Levi tangvalpa innah pai-in a hopih uh hi.

¹⁶Gal sim dinga kithawisa Dan-te zaguk kongpi lutna ah a ding uh hi.

¹⁷Siampipa le galsim dinga kithawisa mi zaguk kongpi lutna-ah a din laitakun, tua gam thu a kankhia mi nga-te a sungah lut uh a, a kiseek milim, siampi puan, innsung pasiante le a kisung milim-te a la uh hi.

¹⁸Hih mite Micah inn sungah lutin a kiseek milim, siampi puan, inn sung pasian dangte le a kisung milim a lak uh ciangin siampipa in, "Bang hih na hi uh hiam?" a ci hi.

¹⁹Amaute in, "Pau ken! Bangmah gen ke’n. Ko hong zui inla, ka pa uh le ka siampi uh hong hi in. Mi khat inn sung beka siampi-a na om sangin Israel beh khat bawng’ khata na nasep ding hoihzaw sa lo na hi hiam?" ci-in a dawng uh hi.

²⁰Tua ciangin siampipa a lungdam hi. Amah in siampi puan, innsung pasian dangte le a kiseek milim la-in tua mite a zui hi.

²¹A taneute uh, a ganhonte uh le a neihsate uh nusia-in a paikhiatsan uh hi.

²²Amaute Micah inn pan a gamla simsim a tun uh ciangin Micah inn kianga tengte kikhawm uh a, Dan-te a pha uh hi.

²³Amaute a nung panun a otsan uh ciangin Dan-te in lehetin, "Na mite uh samkhia-a nong sim nading uh bang thu hang ahi hiam?" a ci uh hi.

²⁴Micah in, "Ka bawlsa pasiante le ka siampipa na paikhiatpih uh hi. Ke’n bang nei lai ka hi hiam? Bangci a, ‘Bang thu hang ahi hiam?’ ci-a hong dong thei na hi uh hiam?" a ci hi.

²⁵Dan-te in, "Bangmah hong kal kei in, a heh khat in hong simin na innkuanun sikha nuteh," ci-in a dawng uh hi.

²⁶Tuaci-in Dan-te paipai uh a, Micah in amah guakin amaute zawh ngap lo ahi manin kilehin a ciah hi.

²⁷Tua ciangin amaute in Micah bawlsa nate le a siampipa laksak uh a bangmah phawk lo-a lungnuamtak a om Laish lam manawhin a sim dingin a kuan uh hi. Amaute namsau-in sim uh a, a khuapi uh a haltum uh hi.

²⁸Amaute Sidon pan gamlapi ah tengin kinaipih dang nei lo uh ahi manin kuamah in amaute a hu kei hi. Beth Rehob kianga kuam sungah tua khuapi a om hi. Dan-te in khuapi lam kik uh a, a teng uh hi.

²⁹Khuapi min Laish a kicisa ahi zongin - Israel tapa Dan min pua-in Dan a ci uh hi.

³⁰Tua lai-ah Dan-te mahmah in milim tung uh a Moses’ d tupa Gershom’ tapa Jonathan le a tapate, tua gam sal-a a kikaih dong Dan behte siampi ahi uh hi.

³¹Shiloh ah Pasian inn a om hun sung tawntung amaute in Micah bawlsa milimte a zangsuak uh hi.