Read Zokam Thukhente 4 Bible Online

Thukhente 4 - Zokam bible

Thukhente 4

¹Ehud a sih khit ciangin, TOPA mitah Israel-te a sia-in gamta leuleu uh hi.

²Tua ciangin TOPA in amaute Hazor a kumpi a sem Canaan kumpi khat Jabin khutah a zuak hi. A galkap mangpa Sisera hi a, Harosheth Haggoyim ah a teng hi.

³Amah in sik sakolleng zakua nei-a, kum sawmnih sung Israel-te khelbawlin nengniam ahi manin amaute in TOPA huh ding a ngen uh hi.

⁴Tua hunin Lappidoth’ zi kamsangnu Deborah in Israel a makaih i hi.

⁵Amah in Ephraim mualtung gam sung Ramah le Bethel kikal Deborah Nisuh nuai thukhen zumin nei-a, kitotna thukhen ding a nei Israel-te ama kiangah a pai uh hi.

⁶Tuanu in Napthtali-a Kedesh panin Abinoam’ tapa Barak vaikhak a, "TOPA, Israel Pasian in nang hong sawla: ‘Pai-in, Naphtali le Zebulun mite tulsawm tonpih inla Tobar Vum lam zuatpih in.

⁷Keimah in Jabin galkap mangpa Sisera, a sakollengte le a galkapte tawh Kishon Gun ah ka zol dinga na khutah kong pia ding hi,’ ci hi," a ci hi.

⁸Barak in tuanu kiangah, "Nong zuih leh ka pai dinga nong zuih kei leh ka pai kei ding hi," a ci hi.

⁹Deborah in, "Hoih mahmah hi, kong zui ding hi. Ahi zongin TOPA in numei khat khutah Sisera pia ding ahi manin hih a na pai nadinga pahtawina nang aa ahi kei ding hi," a ci hi. Tua ciangin Deborah in Kedesh ciang Barak a zui hi;

¹⁰amah in tua lai-ah Zebulun le Naphtali a sam hi. Amah mi tulsawm in zui-a, Deborah in zong a zui hi.

¹¹Tu-in Ken-te khat Heber in Moses sungpa b Ken-te khat mah Hobab nusia-in Kedesh kiang Zaanannim - a singkungpi gei ah a puanbuk a zal hi.

¹²Amaute in Sisera kiangah Abinoam’ tapa Barak Tabor Vumah paito khin hi, ci-a a gen uh ciangin

¹³a sik sakolleng zakuate le amah tawh a om khawmmite Harosheth Haggoyim panin Kishon gun ah a kaikhawm hi.

¹⁴Tua ciangin Deborah in Barak kiangah, "Pai ta ou! TOPA in Sisera na khut sungah hong piak ni tuni ahi hi. Na ma ah TOPA pai khin hi lo hiam?" a ci hi. Tua ciangin Tabor Vum ah Barak paisuk a, mi tulsawm in a zui uh hi.

¹⁵Barak in a nawk ciangin TOPA in Sisera le a sakolleng le a galkapte khempeuh namsau-in delhkek-a, a sakolleng nusia-in Sisera a khe-in a tai hi.

¹⁶Ahi hangin Barak in sakollengte le galkapte Haroseth Haggoyim dong a delh hi. Sisera galkapte khempeuh namsau-in puk uh a; mi khat beek a suakta kei hi.

¹⁷Ahi hangin Sisera a khe-in tai a, Ken-te Heber’ zi Jael puanbuk ah a tung hi, bang hang hiam cih leh Hazor kumpipa Jabin le Ken-te Heber bawng’in kihotheihna a nei uh hi.

¹⁸Sisera dawnin Jael pusuakkhia-a ama kiangah, "Ka topa aw, hong pai-in a sungah tum in. Lau kei in," a ci hi. Tua ciangin amah tuanu buk ah tum a, amah a tungah khuhna khatin a khuh hi.

¹⁹Amah in, "Ka dangtak hi, tui tawm hong pia in," a ci hi. Tuanu in nawitui koihna savun-umin a dawn ding pia-a a khuhcip hi.

²⁰Amah in, "Puanbuk kongah ding inla mi khatpeuh hong pai-in, ‘Hiah mi khatpeuh a om na?’ hong cih leh, ‘Om kei!’ ci in," a ci hi.

²¹Ahi hangin Heber’ zi Jael in puanbuk khetphim khat le sek khat la-a, gimlua-a a ihsip ciangin a kiangah damtakin a pai hi. A panggui-ah khetphimin lei tawh khencip-a, a si hi.

²²Sisera a nungdelh Barak tua munah tunga Jael in amah a na dawn hi. Tuanu in "Hong pai in, na mi zon kong lak ding hi," a ci hi. Tua ciangin amah tuanu tawh buk sungah luta, tua lai-ah Sisera a panggui-a puanbuk-khetphim ki-khenletin a sisa-a lum a mu hi.

²³Tua ni-in Pasian in Canaan-te kumpipa Jabin, Israel-te a nuaisiahsak hi.

²⁴Tuateh Canaan-te kumpipa Jabin a siatsak matengin Israel-te khut a khauh semsem hi.