Read Zokam Thukhente 6 Bible Online

Thukhente 6 - Zokam bible

Thukhente 6

¹TOPA mit ah Israel-te a sia-in gamta leuleu uh a amah in kum sagih sung Midian-te khutah amaute a pia hi.

²Midian-te vang in amaute nuainet lua ahi manin Israel-te in a bukna dingun mualtung leihawm, suangheng le mun muanhuaite a bawl uh hi.

³Israel in khaici a tuh peuhpeuh uh ciangin Midian-te, Amalek-te, le nisuahna lama midangte in tua gam va sim zel uh hi.

⁴Amaute in gam sungah giahphual satin, Gaza tun dong lampi dunga ankungte susia in, Israel ading nuntakna nei khempeuh - tuuhon, bawnghon, le laate hawi a nei kei uh hi.

⁵A ganhonte uh tawh kuanto-in a puanbuk uh kauphe hon-om a bang hi. Amaute le a kala-oh-te uh kisim zo lo a; amaute in tua gamsimin na khempeuh a susiamang uh hi.

⁶Midian-te in Israel-te gentheisak lua uh a, amaute huh ding ngenin TOPA tungah a kiko uh hi.

⁷Midian hangin Israel-te TOPA tungah a kiko uh ciangin,

⁸amah in amaute kamsang khat puak a tuapa in, "Hih in TOPA Israel Pasian gen ahi hi: Note salsuahna gam Egypt panin kong paikhiatpih to hi.

⁹Egypt vangliatna pan le no hong nengniamte khempeuh khut sung panin note kong bawhkhia hi. Note mai-ah amaute hawlkhia-in a gam uh no kong pia hi.

¹⁰Keimah in no tungah, ‘Keimah TOPA note Pasian, ka hi hi; amaute gama na tenna uh Amor-te pasiante bia kei un,’ kong ci hi. Ahi hangin ka thu na ngai kei uh hi," a ci hi.

¹¹TOPA vansawltak va pai-a Abiezeri-te Joash neihsa Ophrah-a tawsaw nuai-ah a tu hi; Midian-te muh loh dingin tua lai-a lenggah-sukna ah a tapa Gideon in mangbuh a cil hi.

¹²Gideon tungah TOPA vansawltak kilanga, "A thahat galhangpa aw, TOPA in nang hong ompih hi," a ci hi.

¹³Gideon in, "Ahi zongin pu aw, TOPA in kote hong ompih ahileh bang hangin ko tungah hihte khempeuh hong tung ahi hiam? Ka pate un, ‘TOPA in Egypt panin hong paikhiatpih to hi lo ahi hiam?’ a cih uh ama nalamdang bawlte khempeuh koi-ah om khin ta hiam? Tu-in TOPA in ko hong nusia-a Midian-te khut sungah hong koih khin hi," ci-in a dawng hi.

¹⁴Tua ciangin TOPA ama lamah kihei-a, "Tu-a na neih thahatna tawh pai-in Midian khut panin Israel honkhia in. Nang hong sawl lo ka hi hiam?" a ci hi.

¹⁵Gideon in, "Ahi hangin Topa a, Israel bangci hotkhiat thei ding ka hi hiam? Ko bawng’ lah Manasseh ah a hat lo pen hi-a, ko innkuan sungah kei a neu pen ka hi hi," a ci hi.

¹⁶TOPA in, "Nang kong ompih dinga, mihing khat bangin Midian-te na sattuk ding hi," ci-in a dawng hi.

¹⁷Gideon in, "Nong angvan taktak ka hileh kei nong hopih taktak lam limtakin hong lak in.

¹⁸Nong hehpihna-in, hong pai kika biakna hong puakin na mai-ah kong lui mateng na paikhia nai kei in," ci-in a dawng kik hi. Tuateh TOPA in, "Nong kileh kik mateng kong ngak ding hi," a ci hi.

¹⁹Gideon sungtum-a, keelno khat go-in annel ephah b khat silngo sawh loh anlumin a bawl hi. Seng khatin sa koih-a, beel khatin satui koihin tawsaw nuai-a ama kiangah a va puak hi.

²⁰Pasian vansawltak in, "Sa le silngo sawh loh anlum la inla, hih suangpi tungah koih-in satui buak in," a ci hi. Tuateh Gideon in a cih bangin a hih hi.

²¹TOPA vansawltak in a khuta a tawi ciangkhut mukin sa le silngo sawhloh anlum a su hi. Suangtumpi panin mei pianga sa le anlum a haltum hi. Tua ciangin TOPA vansawltak a mang hi.

²²Gideon in TOPA vansawltak ahilam a tel ciangin kigaih a, "Ah, Thuneipen TOPA! TOPA vansawltak tawh kimaituahin a mu khin lah ka hi a!" a ci hi.

²³Ahi hangin TOPA in ama kiangah, "Lungnuam in! Kihta kei in. Na si kei ding hi," a ci hi.

²⁴Tua ciangin Gideon in tua lai-ah TOPA biakna-tau khat dawh-a, a min "TOPA in lemna hi" a ci hi. Tuni dong Abiezri-te gam Ophrah ah a om lai hi.

²⁵Tua zan mah in TOPA in ama kiangah, "Na pa bawnghon panin kum sagih a pha c bawngtal a nihna go in. Na pate in Baal a biakna uh biakna-tau phelkhia inla a kianga Asherah khuam d - milim phuktan in.

²⁶Tua ciangin hih asanna dawnah TOPA na Pasian adingin biakna-tau kician e khat dawh in. Na phuktan Asherah khuam-milim sing zangin meihal biakna-in bawngtal nihna f hal in," a ci hi.

²⁷Tua ciangin Gideon in a nasemte lakah sawm tawh TOPA in ama tunga a gensa bangin a hih hi. Ahi hangin a innkuanpihte le khuasung mite kihta a, sunin sem loin zanin a semzaw hi.

²⁸Tua khua mite zingsang a thawh uh ciangin Baal biakna-tau na kiphiatmai-in a kianga Asherah khuam na kiphukpai-a, biakna-tau kibawl thak tungah bawngtal-nihna-a biakna a na om hi!

²⁹Amaute in, "Kua hih hiam?" ci-in khat le khat a kidong uh hi. A thu limtaka a kantel uh ciangin, "Joash’ tapa Gideon hih ahi hi," ci-in amaute tungah kigen hi.

³⁰Khua sung mite in Joash kiangah, "Na tapa hong pusuaksak in. Amah in Baal-te biakna-tau phelkhia-in a kianga Asherah khuam phuktan ahi manin a sih pelmawh kul hi," ci-in a kal uh hi.

³¹Ahi hangin Joash in ama kimkota a lungso mihonpite tungah, "Note in Baal thu panpih ding na hi uh hiam? Amah hot sawm na hi uh hiam? Amah a dopih peuhpeuh zingsang ciangin kithat ding hi! Baal pen pasian taktak hileh amah biakna-tau a kiphelkeksakin amah-mah in dal thei ding hi," ci-in a dawng hi.

³²Gideon in Baal-te biak-na-tau phelkek ahi manin, "Baal in amah mawhsiat hen," a cihna un, tua ni-in amaute in Gideon min "Jerub Baal" g a ci uh hi.

³³Tu-in Midian-te Amalek-te le nisuahna-lam a om mite khempeuh in a galhiam uh gawmin Jordan galkah uh a Jezreel Kuam ah giahphual a sat uh hi.

³⁴Tua ciangin Gideon tungah TOPA Kha tunga, amah a zui ding Abiezri-te a sapna-in pengkul khat a mut hi.

³⁵Amah in Manasseh buppi ah kamtai sawlin kigalgingsa-in amaute samsak-a, Asher, Zebulun le Naphtali-te in zong gal do dingin amaute a zuih toh theih nadingun a gensak hi.

³⁶Gideon in Pasian kiangah, "Nong ciamsa bangin kei khutin Israel na hotkhiat takpi ding leh - en in,

³⁷ancilna sual tungah tuumul ka koih ding hi. A tuumul tung bekah daitui kai-a, a leitual a keu leh tua ciangin na gensa bangin kei khutin Israel na hotkhiat ding lam ka thei ding hi," a ci hi.

³⁸A cih bangin a na piang hi. A zing ciangin Gideon thobaih a, amah in tuumul sukin a hekkang ciangin - tui kuang-uk dim khat a pha hi.

³⁹Tua ciangin Gideon in Pasian kiangah, "Kei tungah heh kei in. Na khat hong ngensak lai in. Tuumulin khatvei hong zia-etsak lai in. Tu-a pen a tuumul keusak inla a leilak khempeuh daitui tuamsak in," a ci hi.

⁴⁰Tua zanin Pasian in tua bangin a hisak hi. Tuumul bek keu-a; a leilak khempeuh daitui in a tuam hi.