Read Zokam Thukhente 7 Bible Online

Thukhente 7 - Zokam bible

Thukhente 7

¹Zingsang tungin Jerub-Baal (tua pen Gideon) le a mite khempeuh in Harod tuinak ah giahphual a sat uh hi. Amau omna leilu-lam Moreh mual kianga kuam sungah Midian-te’ giahphual a om hi.

²TOPA in Gideon kiangah, "Amaute khut sungah Midian-te ka piak nadingin na mite tam lua hi. Israel in ama hatna tawh a kihonkhia zo kisa in kei tungah a kisaktheih khak loh nadingin

³mite tungah zasak inla, ‘Lau-a, ling peuhmah ciahin Gilead Vum nusia thei hi,’ ci in," a ci hi. Tuaci-in mi tul sawmnih le tulnih ciah uh a, tul sawm a om lai hi.

⁴Ahi hangin TOPA in Gideon kiangah, "Mi tam lua lai hi. Tui omna ah paipihsuk inla, tua lai-ah keima’n kong sittelsak ding hi. Keimah in, ‘Hihpa kuanpih in,’ ka cih leh amah pai dinga, ‘Hihpa kuanpih kei in,’ ka cih leh a pai kei ding hi," a ci hi.

⁵Tua ciangin Gideon in mite tui phualah a paipih suk hi. Tua lai-ah TOPA in, "Tui dawn dingin a khukdinsukte le ui bangin a leii-a a liakte khen in," a ci hi.

⁶Mi zathum in a khutkuak pan a kamin a hup uh hi. Adangte khempeuh tui dawn dingin a khukdin suk uh hi.

⁷TOPA in Gideon kiangah, "A khuta dawn mi zathum-te in note hong honkhia-in Midian-te no khutah kong pia ding hi. Adangte khempeuh amau omna mun ciatah ciahsak in," a ci hi.

⁸Tua ciangin Gideon in Israel dangte amau puanbuk ah ciahsak-a, zathumte omsakin amaute in adangte lam-ante pengkulte a la uh hi. Tua hunin Midian-te giahphual ama khanglam kuam sungah a om hi.

⁹Tua zanin TOPA in Gideon kiangah, "Tho un, kuansukin giahphual sim un, no khut sungah kong pia ta ding hi.

¹⁰Na sim ding na kihtakpian leh, na nasempa Purah tawh giah phualah paisuk-in

¹¹a thugen uh va ngai in. Tua khit ciangin thakhauhin giahphual na simngam ding hi," a ci hi. Tua ciangin amah le a nasempa Purah giahphual-a galvilte omna ah a paisuk uh hi.

¹²Tua lai-ah Midian-te, Amalek-te le nisuahna-lam mite khempeuh kuam sungah giahphual sat uh a, kauphe honpi a bang uh hi. A kala-oh-te uh tuipi gei-a sehnel bangin sim zawh ding hi lo hi.

¹³Gideon a tunsuk phetin mi khatin a lawmpa kiangah a mang a gen hi. Amah in, "Mang khat ka man hi, ka mangin Midian-te giahphual sungah mangbuh-ham anlum pum khat hong tuksuk hi. Tua in nakpi-in puanbuk kha-a, a puanbuk kilumletin a kisiagawp hi," ci-in a mang a gen hi.

¹⁴A lawmpa in, "Israel-te Joash’ tapa Gideon’ namsau lo adang hi lo ding hi. Pasian in Midian-te le giahphual buppi ama khutah pia khin ahi ve," ci-in a dawng kik hi.

¹⁵Gideon in mang le a khiatna a zak ciangin Pasian a bia hi. Amah Israel giahphual ah ciah kika, "Tho un! TOPA in Midian-te giahphual note khut sungah hong pia khin hi," ci-in a genkhia hi.

¹⁶Mi zathumte pawl thumin khena a vekun a khut-uah pengkulte le beelhawmte tawisakin a sungah meilah a kengsak hi.

¹⁷Amah in amaute kiangah, "Kei hong en gige unla kong makaihna bangbang zui un. Giahphual mong ka tun ciangin kei hih bang tektekin hih un.

¹⁸Kei le kei tawh a omte in ka pengkul uh ka mut uh ciangin no zong giahphual kimkot pan no aa ciat na mut unla, ‘TOPA le Gideon ading,’ ci-in awng un," a ci hi.

¹⁹Gideon le mi zakhat, vil laita galvil a kilaih khit phetin giahphual mongah a tung uh hi. Amaute in pengkul mut uh a, a khut ua a tawi uh beelte a sukham uh hi.

²⁰Pawl thumte in zong pengkul mutin leibeelte a sukham uh hi. A veilam khutun meilah a taklam khutun penkul tawi-in mut uha, "TOPA ading le Gideon ading namsau!" ci-in a awng uh hi.

²¹Giahphual kimkot amau panmun ciat panin a tua cih uh ciangin Midian-te khempeuh tai-in a tai kawmun a kiko uh hi.

²²Pengkul zathum a gin ciangin TOPA in giahphual sunga om mite khempeuh khat le khat a namsau un a kisat tuahsak hi. Galkapte in Beth Shittah ah Zererah lam manawh uh a, Tabbath kianga Abel Meholah gamgi dong a tai uh hi.

²³Naphtali, Asher le Manasseh pana Israel-te khempeuh kisamkhia uh a, Midiante a delh huan uh hi.

²⁴Gideon in Ephraim mualtung gam khempeuh ah kamtai paisak-a, "Midian-te do dingin hong kuansuk unla a manawh lam ua Jordan tuite Beth Barah dong hong lasuk un," a cisak hi. Tua ciangin Ephraim-a mi khempeuh kisamkhia-in Beth Barah dong Jordan tuite a la khin uh hi.

²⁵Amaute in Midian-te makai Oreb le Zeeb zong a man uh hi. Amaute in Oreb suang ah Oreb that uh a, Zeeb lenggah sukna ah Zeeb a that uh hi. Midian-te delh uh a, Jordan gei-a om Gideon kiangah Oreb le Zeeb lutang a puak uh hi.