Read Zokam Thukhente 8 Bible Online

Thukhente 8 - Zokam bible

Thukhente 8

¹Tua ciangin Ephraim-te in Gideon kiangah, "Bang hangin ko hong hici bawl na hi hiam? Midian-te do dinga na kuanun ko hong zawn lo na hi hiam?" ci-in a dong uh hi. Amaute in a nak mawhsak mahmah uh hi.

²Ahi hangin Gideon in, "No tawh tehin ken’ bang hih zo ngap ka hi hiam? Abiezer lenggah lak buppi sangin Ephraim lenggah lawh hoih zaw hi lo hiam?

³Pasian in Midian-te makai Oreb le Zeeb no khut sungah hong pia hi. No aa tawh tehin ken bang sem zo ka hi hiam?" ci-in a dawng hi. Hih thu a gen ciangin a tunga a hehna uh a dai hi.

⁴Gideon le a mi zathumte gim khin mahmah napi delhdelh lai uh a, Jordan tungin a galkah uh hi.

⁵Succoth mite kiangah, "Ka galkapte gim lua hi, anlum tawmkha hong piaksak un, kei lah Midian kumpite Zebah le Zalmunna delh kimlai ka hi hi," a ci hi.

⁶Ahi hangin Succoth uliante in, "Zebah le Zalmunna-te khut no aa suak khin nai ahi hiam? Bang hangin na galkapte anlum pia ding ka hi uh hiam?" a ci uh hi.

⁷Tua ciangin Gideon in, "Na takpi uh maw, TOPA in Zebah le Zalmunna ka khutah hong piak ciangin sehnel-gam lingte le lingkungte in na sa uh ka kuikek ding hi," ci-in a dawng hi.

⁸Tua lai panin Peniel a ah paito-a, a nget ngei bangin a nget hangin amaute in Succoth-te dawn bangin a na dawng uh hi.

⁹Tua ciangin Peniel in mite kiangah, "Gual zo-a kong ciah ciangin hih tausang ka balkhia ding hi," a ci hi.

¹⁰Tu-in nisuahna-lam galkap khempeuh pana a omlai mi tul sawm le tulnga bang tawh Zebah le Zalmunna Karkor ah om uh a; namsau tawi tulza le tul sawmnih a si khin uh hi.

¹¹Nobah le Jogbehah nisuahna-lama, a lal kawikawite lampi zui-in Gideon pai to a galkapte a bingphawn hi.

¹²Midian-te kumpi nihte, Zebah le Zalmunna a tai uh hi; ahi hangin amah in galkap honpi delhkekin amaute gel nungdelha, a man hi.

¹³Tua ciangin Joash’ tapa Gideon a galsimna pan Heres Ciangka tawnin a ciah kik hi.

¹⁴Amah in Succoth-te tangvalno khat manin thu donga, tuapa in Succoth ulian sawm sagih le sagihte le tua khuapi sunga upate min a gelhsak hi.

¹⁵Tua ciangin Gideon pai-in Succoth mite kiangah, "Note in kei kiangah, ‘Zebah le Zalmunna-te khut no aa suak khin nai ahi hiam? Bang hangin na mi thabeite anlum pia ding ka hi uh hiam?’ ci-a nong selnoh uh Zebah le Zalmunna hih lai-ah a om hi," a ci hi.

¹⁶Khuapi upate samin, amaute sehnel-gam ling le lingkungte tawh dan pia-in Succoth mite a thuhilh hi.

¹⁷Peniel-te tausang zong kaipukin khua sung mite a that hi.

¹⁸Tua ciangin Zebah le Zalmunna kiangah, "Tabor a na thahte uh a koici mi hiam?" ci-in a dong hi. Amaute in, "Nang tawh kibangin kumpi tapa meel a pua uh hi," ci-in a dawng uh hi.

¹⁹Gideon in, "Tuate ka nu’ tapa keima sanggamte ahi hi. TOPA nuntakna-in ka kiciam hi, amaute na hinkhawi le uh cin kong that kei ding hi," a ci hi.

²⁰A tapa upa pen Jether lamah kihei-in, "Amaute that in!" a ci hi. Ahi hangin Jether naupangno hi-a lau ahi manin a namsau a dok kei hi.

²¹Zebah le Zalmunna in, "Nang mahmah hong pai inla hih in. "‘Pisal in pisal tha mah paai hi,’ kici hi," a ci uh hi. Tua ciangin Gideon dingto-a amaute thatin a kala-oh ngawng zepnate uh a la hi.

²²Israel-te in Gideon kiangah, "Nang, na tapa le na tupate in - ko hong uk un bang hang hiam cih leh Midian-te khut panin hong honkhia nang na hi hi," a ci uh hi.

²³Ahi hangin Gideon in amaute kiangah, "Ken note kong uk kei dinga, ka tapa in zong hong uk kei ding hi. TOPA in note hong uk ding hi," ci-in a gen hi.

²⁴Tuateh amah in, "Kong nget nop khat om hi, vanlakte na tanh lak panun bilbah khat ciat hong pia un," a ci hi. (Ismael-te in kham bilbah a bat uh a ngeina uh ahi hi.)

²⁵Amaute in, "Hong pia mahmah nung," ci-in a dawng uh hi. Tua ciangin amaute in puan khat phah uh a, a van lakte uh panin kual khat ciat a lot uh hi.

²⁶Ama nget kham kualte - kizepna, awh theih le Midian kumpite silh a dupsante le a kala-oh ngawng-ua khainiangte simlohin kham shekel b tul khat le zasagih a khai hi.

²⁷Gideon in tua khamte awmtuam in bawla, ama khuapi Ophrah ah a koih hi. Israel-te khempeuh tua bia-in paktat uh a, Gideon le a innkuanpihte adingin thang khat a suak hi.

²⁸Tua bangin Israel-te mai ah Midian guallel-a, a lu a phong kik zo nawn kei hi. Gideon nuntak kum sawmli sung tua gam lungmuang in a nuamsa hi.

²⁹Joash’ tapa Jerub-Baal inn-a teng dingin a ciah hi.

³⁰Zi tampi nei ahi manin tapa sawm sagih a nei hi.

³¹Shechem-a teng a zino in zong amah tawh tapa khat nei a amin Abimelech a phuak hi.

³²Joash’ tapa Gideon tekkuutin si-a Abiezeri-te neihsa Ophrah-a, a pa Joash’ hanah kivui hi.

³³Gideon a sih zawh sawt loin Israel-te Baal tawh va paktat kik leuleu uh hi.

³⁴Amaute in a pasian dingun Baal-Berith koih uh a, a munmunah a galte khempeuh uh pana a hukhia TOPA a Pasian uh a phawk nawn kei uh hi.

³⁵Jerub-Baal (Gideon cihna) in amaute adingin na hoih a sepsakte hangin a innkuanpihte tungah lungdam a thuh ding uh zong a don nawn kei uh hi.